Kamuciya Buyakana
1 Mwaapostolo Paulo wakasoleka canguzu kuyumya basyominyina. (Inc. 14:19-22) Aswebo, tulabikkila maanu ciindi bakwesu nobali mubukkale bukatazya, alimwi tuyanda kubagwasya. Ibbaibbele litondezya kuti boonse kutali baalu balikke, beelede kubabikkila maanu bamwi. (Rom. 15:1, 2) Amulange-lange nzila zyobile motukonzya kuccilila lulayo lwaluyando lwakuti: “Kamuciya bugwasyanya akuyakana, umwi aumwi kumweenzinyina.”—1 Tes. 5:11.
2 Amuzizyibe Nzyobabulide Bamwi: Ijwi lya Leza lyaamba kuti Dorika “wakalizywide milimo mibotu, aluzyalo.” (Inc. 9:36, 39) Wakababikkila maanu aabo bakali kubulizya akubagwasya munzila njaakali kukonzya. Eelyo kubota kaka cikozyano ncaakatusiila! Mulakonzya kubona kuti umwi mukwesu uucembeede uyandika lugwasyo mukweenda kuya kukuswaangana. Naa kulakonzya kakuli mupainiya uunyina wakubeleka limwi mumulimo mukati kansondo buzuba bumwi masikati. Ikuti kamuzyi umwi uuyandika lugwasyo lwamusyobo ooyu, amweezyeezye mbwakonzya kukulwaizyigwa muntu ooyu!
3 Mibandi Yakumuuya: Tulakonzya kuyaka bamwi kwiinda mumibandi yesu. (Ef. 4:29) Mwaalu uusimide wakaamba kuti: “Ikuti kamuyanda kuba muntu uukulwaizya, amubandike makani aakumuuya. Mulakonzya kutalika mubandi uuyaka kwiinda mukubuzya mubuzyo uutakatazyi mbuli wakuti, ‘Ino kasimpe mwaakaiya buti?’” Amubabikkile maanu ibana bali mumbungano. Amubabikkile maanu ibatyompedwe abaabo bali ansoni. (Tus. 12:25) Mutalekeli makani aakulikondelezya kwamunyika kumulida ciindi cakubandika makani aakumuuya abasyominyoko.—Rom. 1:11, 12.
4 Ino ntwaambo nzi ntomukonzya kwaamba kutegwa muyakilile bamwi? Muciiyo canu cakubala akwiiya Bbaibbele, sena kuli njiisyo njomwakajana iyakamuyumya kumuyandisya akumulumba Jehova? Sena kuli kaambo kakamukulwaizya nkomwakamvwa mumakani aabuleya naa mu Ciiyo ca Ngazi Yamulindizi? Naa sena mwakakulwaizigwa acakuluula cimwi ciyumya lusyomo? Ikuti kamwaabikkila maanu makani aakumuuya aali boobu, lyoonse munakujisi twaambo tukulwaizya twakubandika abamwi.—Tus. 2:1; Lk. 6:45.
5 Atutolelele kuyakana kwiinda mukupa lugwasyo akubelesya lulimi lwesu munzila iiluzi.—Tus. 12:18.