Amwaambilizye Bulemu bwa Jehova
1 Sintembauzyo wakaambilizya kuti: “Amwiimbile Jehova, nonyika yoonse. . . . Amukanane bulemu bwakwe akati kabamasi, amaleele aakwe akati kamisyobo yoonse.” Notuyeeyesya ali zyeezyo Jehova nzyaakacita, nzyacita anzyayootucitila, tulakulwaizyigwa kwaambilizya bulemu bwakwe.—Int. 96:1, 3.
2 Mumulimo Wesu: Bakamboni ba Jehova bajisi coolwe cilibedelede cakwiitwa azina lya Leza akulitembaula caantangalala munyika yoonse. (Malk. 1:11) Eelo kuli kwiindana kapati abasololi ba Bunakristo Bwanyika, balo cakulisumpula ibagwisya zina lya Leza mubusanduluzi bwama Bbaibbele aabo! Mulimo wakuzyibya zina lya Leza ulayandika kapati, mbokunga bantu beelede kulilila muzina eelyo calusyomo kutegwa bakafwutulwe kumapenzi mapati aaboola. (Rom. 10:13-15) Kunze lyaboobo, luumuno mububumbo boonse, kubikkilizya aluumuno akati kabantu bamunyika, luyeeme akusalazyigwa kwazina lya Leza. Masimpe, milimo ya Leza yoonse iliswaangene azina lyakwe.
3 “Jehova mupati, ulatembaulika loko.” Pele ikutegwa bantu ‘bape Jehova bulemu bweelede izina lyakwe,’ beelede kuzyiba kasimpe kujatikizya nguwe. (Int. 96:4, 8) Nokuba boobo, ibamwi balakazya kuti Leza nkwali. (Int. 14:1) Bamwi balamusampaula kuti tajisi nguzu, naa kwaamba kuti tabikkili maanu kubukkale bwabantu. Notugwasya babombe myoyo kuba aluzibo lwini-lwini kujatikizya Mulengi wesu, makanze aakwe, abube bwakwe butaliboteli, tulamulemeka Jehova.
4 Kwiinda Mubukkale Bwesu: Kupona buumi bweendelana azyeelelo zya Jehova ziluleme, kulamulemeka. Bukkale bwesu bubotu bulabonwa. (1 Pet. 2:12) Mucikozyanyo, ikuboneka kabotu kwesu kulakonzya kupa kuti bamwi batulumbaizye, calo cikonzya kutupa coolwe cakwaamba mpindu zyakupona kweelana anjiisyo zijanwa mu Jwi lya Leza. (1 Tim. 2:9, 10) Eelyo tulakkomana kaka ciindi ibamwi ‘nobabona milimo yesu mibotu akulemeka Taata wesu uuli kujulu’!—Mt. 5:16.
5 Kwiinda muŋambawido amicito yesu, atumutembaule cabusungu Leza wesu mubotu abuzuba, akutobela kukulwaizya kukkomanisya kwakuti: “Amwiimbile Jehova, mulumbe izina lyakwe; Amuluule makani aalufutuko lwakwe mazuba oonse.”—Int. 96:2.