Mulimo Wesu Nzyouzuzyikizya
1. Mbuti Jehova mbwaubona mulimo wesu, alimwi ino bantu baubona buti?
1 Ijwi lya Leza lipandulula Banakristo kuti balimukweenda caluzundo mumulimo wa Jehova. (2 Kor. 2:14-16) Notuzibya luzibo lwa Leza, mulimo wesu uli mbuli tununkilizyo tubotu kuli Jehova. Bamwi balakkomana abubotu bwa makani mabotu; pele bamwi balaakaka. Nokuba boobo, ikukaka makani mabotu nkobacita banji takwaambi kuti mulimo wesu tauzwidilili. Amulange-lange mulimo wesu nzyouzuzikizya.
2. Ino mulimo wesu utugwasya kutondezya nzi?
2 Kulemeka Jehova: Saatani uzumanana kwaamba kuti bantu babelekela Jehova akaambo kakuyanda zintu zimwi. (Job. 1:9-11) Mulimo wesu wa Bunakristo utupa coolwe cakutondezya kuti kulyaaba kwesu kuli Leza nkwakasimpe. Basikumwaya banji balatobela lulayo lwa kukambauka akugwasya bamwi kuba basikwiiya nokuba kuti bali mubukkale bukatazya, noliba ciindi banji nobatateeleli. Ikuzumanana kusyomeka kuli boobu kulamukkomanisya Leza.—Tus. 27:11.
3. Nkaambo nzi ncokuyandika kapati kuti tutolelele kuzyibya zina lya Leza amakanze aakwe?
3 Mulimo wesu uli alubazu mukuzuzikizyigwa kwamakanze aa Leza. Kujatikizya lunyonyooko lwa nyika ya Saatani luboola, Jehova waamba kuti: “Bamasi bayooziba kuti ndime Jehova.” (Ezk. 39:7) Kutegwa bamasi bacizyibe eeci, cilayandika kapati kuti babelesi ba Leza batolelele kwaambilizya zina lyakwe amakanze aakwe ‘kubamasi boonse akumisyobo yoonse akumyaambo yoonse akumikowa yoonse.’—Ciy. 14:6, 7.
4. Muunzila nzi mulimo wakukambauka mbouli ntalisyo anakuyeeme lubeta?
4 Mpayeeme Lubeta: Alimwi kukambaukwa kwamakani mabotu mpaanakuyeeme lubeta. Imwaapostolo Paulo wakaamba kuti Jesu Kristo uyakupilusya bubi ‘kuli baabo batamuzi Leza abataswiilili Makani Mabotu aaMwami wesu Jesu.’ (2 Tes. 1:8, 9) Bantu bayakubetekwa kweelana ambobaatambula makani mabotu. Ncobeni babelesi ba Leza bali amukuli mupati. Kutegwa tutakabi amulandu wabulowa, tatweelede kuleka kuzyibya mulumbe wa Bwami uupa buumi.—Inc. 20:26, 27.
5. Ino luse lwa Leza lutondezyegwa buti mumulimo wesu?
5 Kusola-sola kwesu ikugwasya basimukoboma kuba acilongwe a Leza ncitondezyo caluse lwa Jehova. (1 Tim. 2:3, 4) Akaambo kakuzyiba kuti maumi aa bantu alacinca lyoonse, tulajokelela ciindi aciindi kuya kubakulwaizya kuyandaula Jehova ciindi nociciliko. Kwiinda mukucita boobu tutondezya ‘luzyalo lwa Leza wesu’ walo ‘uutayandi kuti bantu bafwidilile, pele kuti boonse bajane ciindi cakweempwa.’—Lk. 1:78; 2 Pet. 3:9.
6. Ino kujata bubi mumulimo wa Jehova kutugwasya buti?
6 Kugwasyigwa Tobeni: Kujata bubi mumulimo wa Jehova kulatutabilila. Kutugwasya ‘kuyandisya buzuba bwakusika kwa Leza’ akweeleba kusofwaazyigwa abukkale bubyaabi bwamazuba aano. (2 Pet. 3:11-14; Tit. 2:11, 12) Aboobo, ‘atukakatile, tutazungaani. Atupangike myoyo yesu lyoonse kumilimo yaMwami,’ katuzi kuti kusoleka kwesu mumulimo wa Bunakristo takuli kwabuyo.—1 Kor. 15:58.