Amuzumanane Kubikkila Maano Kukumana Kwaciindi!
1 Jesu wakalizyi kuti ciindi ncaakajisi anyika cakumanizya mulimo wa Bausyi cakali cisyoonto. (Joh. 9:4) Aboobo, wakuubeleka mulimo wakwe kazyi ikumana kwaciindi alimwi wakabayiisya basikwiiya bakwe kucita mbubonya. (Lk. 4:42-44; 8:1; 10:2-4) Zintu zyakumubili izyakali kupa kukkala kabotu tiizyakali kuyandika kapati kulinguwe. (Mt. 8:20) Aboobo wakali kukonzya kumanizya mulimo Jehova ngwaakamupa kucita.—Joh. 17:4.
2 Ciindi Ncisyoonto: Iciindi cakukambauka makani mabotu kubantu bali “munyika yoonse” acalo ncisyoonto. (Mt. 24:14) Ibusinsimi bwa Bbaibbele buyubununa kuti tukkede kwini kumamanino aaciindi. Ino-ino “kulibaabo abatamuzi Leza akutaswiilila Makani Mabotu aa-Mwami wesu Jesu . . . bayoobetekelwa lunyonyooko lutamani.” (2 Tes. 1:6-9) Lunyonyooko oolo lugambya luyoosika cakutayeeyelwa. (Lk. 21:34, 35; 1 Tes. 5:2, 3) Bantu beelede kupakamana kuti bukkale bwabo buli muntenda. Aboobo, ooyo mmukuli wesu wakubagwasya kuyandaula luzyalo lwa Jehova nokucili ciindi.—Zef. 2:2, 3.
3 Kubeleka Kusikila Mpotugolela: Kuzyiba kuti “Ciindi ncifwiifwi,” kubabelesi ba Leza mulimo wakukambauka ncintu cakusaanguna mubuumi bwabo. (1 Kor. 7:29-31; Mt. 6:33) Bamwi baliimya zintu zyakumubili kutegwa bayungizye ciindi camumulimo. (Mk. 10:29, 30) Bamwi bazumanana ‘kubikka myoyo yabo lyoonse kumilimo ya Mwami’ nokuba kuti masunko alazumanana. (1 Kor. 15:58) Banji bali kukambauka kubuleya makani mabotu kwamakumi aamyaka kakunyina kuzungaana. (Heb. 10:23) Jehova takulubi kulyaaba kuli boobu kucitwa mukugwasyilizya makanze aa Bwami.—Heb. 6:10.
4 Kubikka myoyo yesu kubukombi bwa Jehova, kwalo kubikkilizya amulimo wakukambauka, kulatugwasya kubuyeeya buzuba bwa Jehova lyoonse. Kulatukwabilila mukunyonganisyigwa anyika ya Saatani alimwi kulatukulwaizya kuzumanana akusala kwesu kwakuba abukkale busalala. (2 Pet. 3:11-14) Mmasimpe, kuubeleka mulimo wesu akubona mbocimanide ciindi kulakonzya kutufwutula alimwi abaabo batuswiilila.—1 Tim. 4:16.