Ikubeleka Canguzu Mumulimo Wabukamboni Mbotuyabuswena Kumamanino
1 Iciindi cakutebula nciindi calukkomano. Nciindi alimwi cakubeleka canguzu. Iciindi ncisyoonto cakuyobolola butebuzi. Tacili ciindi babelesi ncobeelede kuwayawaya kucita mulimo wabo.
2 Jesu wakakozyanisya “mamanino aaciindi” aciindi cakutebula. (Mt. 13:39) Tukkede muciindi camamanino, aboobo ciindi cakupa bukamboni “munyika yoonse” caceya. (Mt. 24:14) Mbotuyabuswena kumamanino, tweelede kubelekesya mumulimo oyu. Ino nkaambo nzi? Jesu wakapandulula kuti: “Kutebula kwavula, batebuzi bacea.”—Mt. 9:37, 38; Rom. 12:11.
3 Amuusungwaalile: Jesu naakatalika mulimo wakwe mupati wakukambauka, wakapedwe buyo myaka yotatwe acisela yakuti amanizye mulimo ngwaakapedwe. Wakakambauka kazi kuti ciindi cakali cisyoonto, wakati: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.”—Lk. 4:43.
4 Jesu wakakulwaizya basikwiiya bakwe kucita mulimo cakufwambaana. (Mk. 13:32-37) Nkakaambo kaako “mazuba oonse tabakalekede kwiisya akukambauka muntempele amumaanda kuti Jesu ngo-Kristo.” (Inc. 5:42) Teebakasungwaalila zintu zitayandiki kapati pe. Nokuba kuti bakali basyoonto, bakazwidilila kukambaukila “bantu boonse baansi ano” makani mabotu.—Kol. 1:23.
5 Iswebo mane tulijisi kaambo kapati loko kakusungwaalila lino nkaambo “mamanino aazintu zyoonse ali afwaafwi.” (1 Pet. 4:7) Jehova wabikka buzuba aciindi noitikamane nyika eyi. (Mt. 24:36) Mulimo wakukambauka uyoomana muciindi ciceede. Nkakaambo kaako ncotweelede kuzumanana kubelekesya kukambaukila bantu banji makani mabotu.
6 Ikuti naa twabelekesya mumulimo wakukambauka mamanino mbwaayabuswena afwaafwi, tuyookkomana kwaamba mbuli mbwaakaamba Jesu kuti: ‘Twazulizya mulimo oyo ngookatupa kuti tuucite.’—Joh. 17:4.