Sena Inga Mwagwasya?
1 Jehova lyoonse ulanga-langa nzila zyakugwasya babelesi bakwe basyomeka. (2 Mak. 16:9; Is. 41:10, 13) Jehova keelanisyigwa kumweembezi uulanganya, Isaya wakalemba kuti: “Ulabunganya twana akuboko kwakwe, ulatukumbatila akaango kakwe, azyalo zinyonsya ulazyeenzya kabotu.” (Is. 40:11) Atulange-lange nzila zimwi nzyotukonzya kwiiya Jehova caboola kumakani aakubikkila maano bantu caluyando.
2 Amubagwasye Bapya: Tulakonzya kubagwasya bapya kwiinda mukubatamba kuti batusangane kukuyanzana kuyaka. (Tus. 13:20) Kayeeya mbuli bamwi mbobakacikonzya kumugwasya naakatalika kuswaangana, imukwesu umwi wakati: “Muziindi zinji, mukwasyi uumwi wakali kundibikkilizya muciiyo cabo camukwasyi. Nondakaya ambele, banabukwetene bacili bana-bana bapainiya bakali kundilomba lyoonse kuunka ambabo mumulimo buzuba boonse. Lyoonse twakali kuba amubandi wakumuuya mubotu.” Wakayungizya kuti: “Kanditanaba Munakristo, ndakali kuunka kukulikondelezya muli Bwasanu a Mujibelo masiku. Pele ciindi ncondakali abakwesu cakazuzikizya kuyanzana nkondakali kuyandika.” Kubikkila maano kwambungano kwaluyando kwakamugwasya ooyu mukwesu kuti azyate alimwi akukkalikana mulusyomo alimwi lino ngumwi wamukwasyi wa Bbeteli.—Kol. 2:6, 7.
3 Atuyakane: Tulakonzya kubona kuti ncoolwe ikugwasya bakwesu ciindi nobali mubukkale bukatazya. Sena inga mwacita bubambe bwakucita bukambausi bwaaluwaile asikumwaya uukompeme naa kumulomba kuunka anguwe kuciiyo ca Bbaibbele antela kuleta sikwiiya kuŋanda yasikumwaya ooyo? Sena muzyali uujisi bana basyoonto uyandika lugwasyo nali mumulimo? Sena kuli bamwi bajisi nsoni bakonzya kugwasyigwa nomucita nyendo zyakupilukila naa nomucita mbazu zimwi zyamumulimo? Kubabikkila maano caluyando bakwesu kuyootukulwaizya kuyandaula nzila zyakuyakana.—Rom. 14:19.
4 Mbotwiiya kubikkila maano nkwajisi Jehova kubabelesi bakwe, tulayumizyanya aumwi, alimwi kulagwasya kukamantanya mbungano antoomwe muluyando alimwi ooku kulamulemeka Taateesu wakujulu.—Ef. 4:16.