Amubabikkile Maano Bacembeede Aabo Basyomeka
1 Nokuba kuti wakali mukamufwu alimwi uucembeede, Ana iwakajisi myaka yakuzyalwa iili 84 “taakali kuzwa muntempele.” Ikusyomeka kwakwe kwakapa kuti Jehova amulongezye munzila iilibedelede. (Lk. 2:36-38) Mazubaano, ibakwesu alimwi abacizi banji batondezya muuya nguwenya iwakajisi Ana nokuba kuti bali mubukkale ibukatazya. Iciindi babelesi basyomeka aaba nobapenzyegwa akuciswa-ciswa antela eelyo nobatakonzyi kucita zimwi zintu akaambo kakukomena, zimwi ziindi balakonzya kutyompokelwa. Atulange-lange mbazu zimwi oomo motukonzya kubakulwaizya alimwi akubagwasya kuti bazumanane abukkale bwabo bubotu bwakumuuya.
2 Miswaangano Alimwi a Mulimo: Iciindi bamwi nobalisungula kubagwasya kujatikizya cakweendela, banji ibacembeede aabo basyomeka balakonzya kunoojanika kumiswaangano ya Bunakristo lyoonse kakunyina penzi. Eeci cilabayumya lwakumuuya babelesi aaba bali kubeleka cakusyomeka kwaciindi cilamfwu alimwi abantu bali mumbungano abalo balagwasyigwa eelyo nobayanzana ambabo. Sena kuli nomwakaucitide mulimo mubotu ooyu?—Heb. 13:16.
3 Ikutola lubazu lyoonse mumulimo nkobacita Banakristo bakasimpe kulabakkomanisya alimwi akubakkazyika moyo. Pele eeci cilakonzya kubayumina bacembeede alimwi abaabo bakompeme. Pele, sena cilakonzyeka kuti umwi wabayandwa besu aaba amusangane kutegwa abe ‘simulimonyoko’ munzila imwi yamulimo wabukambausi? (Rom. 16:3, 9, 21) Ambweni mulakonzya kubalomba kuti bamusangane mubukambausi bwaaluwaile naa kuunka andinywe munyendo yakupilukila antela kuciiyo ca Bbaibbele. Ikuti naa bacembeede kabatabukili bulo, sena tamukonzyi kulomba muntu ngomwiiya limwi Bbaibbele kuunka kuŋanda yabo kuti mukayiile nkuko?
4 Ikwiiya Alimwi Akuyanzana: Zimwi ziindi, bamwi balakonzya kutamba bacembeede naa bakompeme kuti babasangane kuciiyo cabo camukwasyi, nokuba kuya kuyiila kuŋanda yabaabo bacembeede. Mukaintu umwi wakatola bana bakwe bobile kuŋanda yamucizi umwi uucembeede kuti bakaakuyiile nkuko ciiyo cabo mubbuku lyakuti, Ibbuku Lyangu Lyamakani Aa-Bbaibbele, aboobo boonse bakakulwaizyigwaa kuyanzana ooku. Bantu aaba balabotelwa kapati ikuti mwabatamba kucakulya naa kumusangana mukulikondelezya. Ikuti naa kabakompeme cakuti inga tabacikonzyi kweenda naa kuyooswaya, mulakonzya kubaswaya kuŋanda yabo kwakaindi kasyoonto akubabalila, kupaila antoomwe ambabo naa kubalwiida cimwi cintu cakacitika icikulwaizya.—Rom. 1:11, 12.
5 Jehova ulababikkila maano bacembeede ibasyomeka. (Heb. 6:10, 11) Tulakonzya kumwiiya kwiinda mukubabikkila maano bacembeede alimwi akubagwasya kuzumanana mubukkale bwabo bubotu bwakumuuya.