Ncinzi Cikonzya Kutugwasya Kukakatila Mulusyomo?
1 Kuzwa leelyo notwakatalika kuyanzanaa mbunga ya Jehova, tulikkomene kapati kaka akuyaambele nkotwacita munzila yakumuuya! Pele ikutegwa ‘tusimpe, akuyaabuyakwa akuliyumya mumakani aalusyomo,’ kuzumanana kuyaambele munzila yakumuuya kulayandika. (Kol. 2:6, 7) Nokuba kuti ibanji bagwasigwa kapati munzila yakumuuya, ibamwi basweeka akaambo kakwaalilwa ‘kukakatila mulusyomo.’ (1 Kor. 16:13) Tulakonzya kulikwabilila kuti citatucitikili eci. Munzila nzi?
2 Ikujata Bubi Lyoonse Mumilimo Yakumuuya: Amube anzila mbotu lyoonse yakucita zintu zyoonse zicitwa mumbunga ya Jehova. Mumbunga eyi, zintu zyakumuuya nzyotuyandika zilapegwa mubunji. Miswaangano yambungano, mipati aminiini itukulwaizya kuzumanana kuyaambele munzila yakumuuya akuyuma alimwi tulakonzya kugwasigwa kufwumbwa kuti katujanika kumiswaangano eyi lyoonse. (Heb. 10:24, 25) Lyoonse kubala Bbaibbele amamagazini aa Ngazi Yamulindizi alimwi a Awake! kubikkilizya amabbuku aabandika zilyo ziyumu zya Jwi lya Leza, kuyootugwasya kusimpa akuzyata munzila yakumuuya. (Heb. 5:14) Tuyoogwasigwa kapati eelyo notulibikkila mbaakani zyakumuuya anotusoleka canguzu kuzizuzikizya.—Flp. 3:16.
3 Ikugwasigwaa Basimide: Amujule myoyo yanu mukusangana abaabo basimide munzila yakumuuya mumbungano. Amubazyibe baalu, mbwaanga mbobalaa mukuli wakutuyumya. (1 Tes. 2:11, 12) Amulutambule lulayo naa twaambo ntobamwaambila. (Ef. 4:11-16) Abalo bakutausi balilyaabide kugwasya bamwi kuti bakakatile mulusyomo, aboobo amubasikile bakwesu aaba kutegwa bamugwasye.
4 Sena muyanda muntu wakumugwasya mumulimo? Amubaambile baalu akubalomba kuti bamugwasye. Ambweni inga bamubikkilizya mububambe ibwa Bapainiya Bagwasilizya Bamwi. Sena mwakabbapatizigwa caino-ino? Ikubala bbuku lya Tuliyanzene akuzitobela zilembedwe mumo kuyoomugwasya kuyaambele akusima munzila yakumuuya. Sena muli bazyali? Mutaleki kubayumya bana banu munzila yakumuuya lyoonse.—Ef. 6:4.
5 Tuyoobaa cilongwe cibotu a Jehova akuyanzana caluyando abakwesu ikuti naa twasimpa akuyuma mulusyomo. Eeci citugwasya kuyuma munkondo njatulwana Saatani alimwi ciyumya bulangizi mbotujisi bwabukkale bwakumbele butamani.—1 Pet. 5:9, 10.