Lugwasyo Lujanika Ciindi Coonse
1. Ino umwi inga watolwaala buti kumuuya?
1 Anna, imucizyi uukwetwe kumwaalumi uutasyomi alimwi uujisi mulimo wakali kumumanina ciindi cakwe cinji, cakali kumukatazya kujanika kumiswaangano ya Bunakristo lyoonse, kutola lubazu mumulimo akwiiya Jwi lya Leza. Nokuba kuti wakacili aluyando kuli Jehova, wakatolwaala. Cikkomanisya ncakuti, wakapegwa lugwasyo lwakumuuya abaalu babikkila maanu.
2. Ino muunzila nzi Banakristo boonse mobakonzya kuba lugwasyo lujanika ciindi coonse?
2 Kutambula lugwasyo lwakumuuya lupegwa kwiinda mumbungano ya Bunakristo kutondezya kusyoma muli Jehova kumugama. Nobaiya kulanganya kwaluyando nkwatondezya Jesu Kristo, ibaalu bamumbungano balajana ziindi zyakukulwaizya akupa lugwasyo luyandika kuli baabo bajisi buyumu-yumu mumilimo yakumuuya. (1 Tes. 5:14) Bunji bwaziindi, majwi aakulwaizya aayeme a Magwalo aayumya-yumya alakonzya kuba ncecintu ciyandika. Kubweza ntaamu yakugwasya baabo bakompeme kumuuya ncintu ceelede kubikkilwa maanu a Banakristo boonse, kutali baalu balikke. Cakutadooneka, toonse twakalibonena kale mbwaajisi nguzu “majwi aambwa kuciindi ceelede.”—Tus. 25:11; Is. 35:3, 4.
3, 4. Ncinzi ciyandika mukugwasya bamwi, alimwi mbuti mbotukonzya kucita boobo?
3 Amubweze Ntaamu: Kubabikkila maanu kapati aabo bayandika lugwasyo kuyandika kubweza ntaamu, kuba akweetelelana alimwi akusinizya. Ciindi Jonatani naakazyiba kuti Davida uli mubukkale bukatazya, “wakanyamuka, wainka kuli-Davida oko kucisaka akumuyumyayumya.” (1 Sam. 23:15, 16) Amubagwasye bamwi calubomba. Majwi aaluyando lwini-lwini alagwasya kapati. Kuyungizya waawo, Jesu wakapandulula cakusalazya kuti kusoleka canguzu kulayandika mukujana mukwesu naa mucizyi wakumuuya. (Lk. 15:4) Ikuti katuyandisisya kugwasya bamwi, ciyootugwasya kuzumanana kupa lugwasyo nokuba kuti kuyaambele tiikwalibonya mpoonya-mpoonya.
4 Eelo kaka cilakulwaizya notubweza ntaamu yakutamba bamwi, mbuli baabo bali mukakamu kesu kaciiyo cabbuku kuti batusangane mumulimo! Ciindi notugwasya mubelesima wa Jehova kutola lubazu mumulimo, inga twabelesya ciindi eeci kumuyumya-yumya. Ziindi eezi zikkomanisya zyakuba aantoomwe mumulimo wa Jehova zilabakulwaizya kapati aabo ibatalika kuliyumya kumuuya.
5. Mubukkale bumwi, ndugwasyo luli buti baalu ndobakonzya kupa?
5 Bubambe Bwaluyando: Aabo ibatatoli lubazu mumulimo wakukambauka naa kuyanzana ambungano kwaciindi cili mbocibede inga bayandika lugwasyo alumbi lwakuyumya-yumya lusyomo lwabo. Ciiyo ca Bbaibbele cibageme mubbuku limwi mbuli lya Amukombe Leza Mwini-Mwini Uuli Alikke, Amubaa cilongwe a Jehova, naa Ino Ncinzi Cini Bbaibbele Ncoliyiisya? cilakonzya kuba ncecintu ciyandika. Akaambo kakuti muntu ooyu wakabbapatizyigwa kale, kanji-kanji ciiyo taciyandiki kuzumanana kwaciindi cilamfwu pe. Kkomiti Yamulimo Yambungano yeelede kupakamana mukubona baabo ibakonzya kugwasyigwa abubambe oobu.—Amubone Tubbokesi twa Mibuzyo tuli mu Mulimo Wesu wa Bwami wa November 1998 alimwi November 2000.
6. Mbuti mucizyi umwi mbwaakabukulusya nguzu zyakwe zyakumuuya?
6 Mucizyi Anna waambidwe kusaanguna, wakalutambula camaanza obile lugwasyo baalu ndobakapa lwakuti mucizyi uusimide kumuuya keendelezya ciiyo ca Bbaibbele kulinguwe. Ciiyo cakeendelezyegwa buyo ziindi zyone kumugwasya kuyumya cilongwe cakwe a Jehova. Wakatalika alimwi kujanika kumiswaangano yambungano alimwi wakabukulusya luyando lwakwe lwakutembaula Jehova Leza caantangalala. Alimwi mucizyi uusimide ooyu wakamugwasya mumulimo kwiinda mukubelekela aantoomwe kuziiyo zya Bbaibbele zimwi kusikila Anna naakayuma kapati mukukambauka kuŋanda aŋanda. Lugwasyo ncecintu ncaakali kuyandika kutegwa atalike alimwi kubeleka milimo yakumuuya.
7. Ino nzilongezyo nzi zijanika mukuyumya-yumya bamwi kumuuya?
7 Kuyumya-yumya baabo bayandika ciletela zilongezyo kuli boonse. Ooyo uugwasyigwa ulaba aalukkomano lwakuba acilongwe a Jehova alimwi akujatikizyigwa mumilimo yambunga Yakwe. Ibaalu balakkomana kubona kuyaambele kwakumuuya ooku. (Lk. 15:5, 6) Mbungano ilakamantana alimwi akuba aluyando lwini-lwini akati kabo. (Kol. 3:12-14) Eelo kaka tulijisi twaambo tubotu twakwiiya Jehova, lugwasyo lujanika ciindi coonse!—Ef. 5:1.