Kabbokesi Kamubuzyo

◼ Sena ciceelela kucitya ciiyo ca Bbaibbele caaŋanda kumukwesu naa mucizi uunga akaambo kakuyaansi munzila yakumuuya tacisungweede mumilimo ya Bunakristo notwalaililwa aumwi wabasi Kkomitii Yamulimo Yambungano?

Ibaalu balaamukuli wakweembela mbungano, ikubikkilizyaa basimbungano bali boonse ibatacisungweede mumilimo ya Bunakristo. Bali boobu balabaswaya akubona lugwasyo lugaminide ilunga lwayandika. Nokwayelela, eci inga cabikkilizya abubambe bwakucitya ciiyo ca Bbaibbele cigaminide kumuntu oyo uutacisungweede mumilimo ya Bunakristo. Ibbuku lya Tuliyanzene Kukumanizya Mulimo Wesu, apeeji 103 lipandulula kuti iba Kkomitii Yamulimo Yambungano balakonzya kusala baabo ibanga bagwasigwa abubambe obo.

Mulangizi wamulimo nguusala baabo ibanga balupa kabotu lugwasyo, izibalo zyeelede kuyiigwa alimwi abbuku ilinga lyagwasya kapati. Ambweni imuntu ngwaakaiyaawe kumatalikilo naa uumbi ngwazyi alimwi ngwalemeka inga nguukonzya kugwasya kabotu. Mucizi weelela alimwi uusimide ulakonzya kulombwa kugwasya mucizi uutacisungweede mumilimo ya Bunakristo. Kanjikanji inga tacinooyandiki kuti sikumwaya uumbi asindikile yooyo wakapegwa mukuli. Napedwe mukuli oyu, sikumwaya uucitya ciiyo ulakonzya kubala ciindi, inyendo zyakupilukila alimwi aciiyo.—Amubone Mulimo Wesu Wabwami wamu November 1987, mapeeji 1-2.

Mbwaanga sikwiiya mmuntu uubbapatizidwe, iciiyo taceelede kuzumananwa kwaciindi cilamfwu pe. Imbaakani njakugwasya muntu uutacisungweede ikuti atalike alimwi kujanika aamiswaangano yambungano yoonse alimwi akuba sikumwaya wamakani mabotu waciindi coonse. Mulangizi wamulimo unookulanga-langa kuyaambele kwaziiyo zili boobu. Imbaakani yalugwasyo olu lwaluyando njakuti bakwesu abacizi aaba bakakonzye kulibwezela mikuli yabo beni mumeso aa Jehova alimwi akuba bantu ‘bazyatide akubombomana’ mukasimpe.—Ef. 3:17; Gal. 6:5.