Kabbokesi Kamubuzyo
◼ Ino mbuti muntu watasungweede mumulimo kwaciindi cilamfwu mbwakonzya kugwasigwa kuti atalike alimwi kumwaya wamakani mabotu?
Ciindi muntu watasungweede natondezya kuti wabaaluyandisisyo lwakubelekela Jehova, eeci ceelede kutupa kukondwa. (Lk. 15:4-6) Ambweni nkukazigwa naa buyumuyumu mubukkale mbobwakapa kuti muntu ooyo atabi aciindi cakubaa ciiyo cakwe mwini, ikujanika kumiswaangano alimwi akutola lubazu mumulimo wamumuunda. Ino muunzila nzi iigwasya mwakonzya kugwasigwa muntu ooyu kutegwa ayaambele munzila yakumuuya?
Toonse tweelede kumutondezya luyando lwesu lwa Bunakristo muntu ooyu. Cakutasowa ciindi, ibaalu bayoolanga-langa ilugwasyo lwini ndwayandika munzila yakumuuya. (Jak. 5:14, 15) Ikuti naa wali mutolo buyo kwakaindi kasyoonto, ambweni uyandika buyo lugwasyo lwasikumwaya munkutwe kutegwa amukulwaizye muntu ooyu ikutalika alimwi kubeleka mumulimo wamumuunda. Nokuba boobo, ikuti muntu ooyu watasungweede tanaakali kusanganaa mbungano kwaciindi cilamfwu, lugwasyo lumwi lulakonzya kuyandika. Kutegwa muyungizye lusyomo alimwi aluyando, mulakonzya kutalisya ciiyo ca Bbaibbele amuntu ooyu mubbuku lyeelede. Ikuti kacili boobo, mulangizi wamulimo uyoobikka bubambe bwakuti sikumwaya weelela kayendelezya ciiyo eco. (Heb. 5:12-14; amubone Mulimo Wesu Wabwami wamu November 1998 Kabbokesi Kamubuzyo.) Ikuti kakuli umwi ngomuzi uuyandika lugwasyo lwamusyobo ooyu, amumwaambile mulangizi wamulimo mumbungano yanu.
Kamutanalomba muntu umwi iwatasungweede kwaciindi cilamfwu mumulimo kuti atalike alimwi, cili kabotu kuti baalu bobile bamuswaye saansi kutegwa basinizye kuti uceelela ikuba sikumwaya wa Bwami. Bayootobela nzila yeelene ayeeyo iitobelwa ciindi nobakananaa bantu bapya ibayanda kuba basikumwaya bamakani mabotu. (Amubone Ngazi Yamulindizi yamu Chichewa yamu November 15, 1988 apeeji 17.) Muntu ooyu watasungweede weelede kutondezya luyando lwini-lwini lwakubasangana bamwi mukukambauka makani mabotu. Alimwi weelede kuti kajisi zyeelelo zimwi ziyandika eezyo zilembedwe mubbuku lya Mulimo Wesu amapeeji 98-9 alimwi akujanika lyoonse kumiswaangano yambungano.
Ikubaa ciyanza cibotu cakucita zintu zyakumuuya kuyoomugwasya kapati muntu ooyu ikuliyumya alimwi akuzumananaa cilongwe cakwe a Jehova alimwi akweenda munzila iisololela kubuumi butamani. (Mt. 7:14; Heb. 10:23-25) Ikusoleka kwakwe ‘kuyungizya bubotu’ alimwi akukomezya bube bwa Bunakristo bwakuliyumya kuyoomugwasya kweeleba kuba ‘mutolo nanka kubula micelo’ kali sikwiiya Munakristo.—2 Pet. 1:5-8.