Amubayumye-yumye Aabo Ibatacisungweede
1. Nkaambo nzi ncotweelede kusoleka kukulwaizya baabo ibatacisungweede?
1 Sena kuli umwi ngomuzi uutacisungweede? Ambweni wakaleka kuyanzana ambungano aboobo wakaleya. Mulakonzya kuti mwakamuyaanya muntu wamusyobo ooyu nomwakali mubukambausi bwakuŋanda aŋanda. Tweelede kwiibaluka kuti muntu uutacisungweede ucili mukwesu wakumuuya. Tuyanda kumutondezya luyando alimwi akumugwasya kupilukila kumbungano alimwi ‘akumweembezi wesu, sikulingula myuuya yesu.’—1 Pet. 2:25.
2. Mbuti mbotukonzya kumukulwaizya muntu uutacisungweede?
2 Amubikkile Maanu: Kubandika aluwaile mubufwaafwi naa kumuswaya muntu uutacisungweede kulakonzya kumupa kusinizya kuti tucimuyanda. Ino ncinzi ncotukonzya kwaamba? Tulakonzya kuba bantu bakulwaizya kwiinda mukumuzibya kuti tulamuyeeya lyoonse. Mubandi wanu kaukulwaizya lyoonse alimwi akuyumya-yumya. (Flp. 4:8) Tulakonzya kwaamba kaambo nkotwakakkomanina lyamuswaangano wakainda. Alimwi tulakonzya kumutamba kumuswaangano wambungano uuboola nouba waalubazu naa wabbazu alimwi akumubambila aakukkala naa kumugwasya kujatikizya cakweendela.
3. Ino mbuti mucizi umwi mbwaakayumizyigwa?
3 Mucizi umwi watakacisungweede kwamyaka yiinda ku 20 wakaswaigwa amucizi umwi mucilawo. Nokuba kuti tanaakalibambilide kuzumina ciiyo ca Bbaibbele, mucizi wakamujana wakazumanana kumuswaya akumusiila mamagazini mapya. Nowakamana muswaangano wacooko, sikumwaya ooyu wakabandika twaambo tupati-pati twakumuswaangano amucizi watakacisungweede, eelyo mukuya kwaciindi wakayumizyigwa.
4. Mbuti mbotweelede kumulanganya muntu watalika alimwi kuyanzana kwiinda mukujanika kumiswaangano?
4 Ciindi Umwi Napilukila: Mukwesu naa mucizi uutacisungweede natalika alimwi kuboola kumiswaangano, ino tweelede kumulanganya buti? Ino mbuti Jesu mbwaakabalanganya basikwiiya bakwe nobakaleya kuzwa kulinguwe kwaciindi cisyoonto? Cabulongwe, wakabaita kuti “bakwesu” alimwi wakali kubasyoma. Alimwi mane wakabapa mulimo uuyandika kapati. (Mt. 28:10, 18, 19) Kwiinde buyo mazuba masyoonto kuzwa leelyo, bakajata bubi kwaambilizya makani mabotu ‘cakutaleka.’—Inc. 5:42.
5. Amwaambe bukkale motweelede kubandika abaalu kujatikizya muntu uutacisungweede.
5 Katutana kutalisya ciiyo ca Bbaibbele kumuntu uutacisungweede naa kutamba mukwesu naa mucizi wakacileka kukambauka kwaciindi cilamfwu kuti atusangane mumulimo, tweelede kulomba busolozi kubaalu. Ikuti naa twayaanya sikumwaya uutacisungweede mucilawo, tweelede kubaambila baalu kutegwa bakonzye kumupa lugwasyo ndwayandika.
6. Ndukkomano luli buti ndotukonzya kujana mukugwasya baabo batacisungweede?
6 Kweelana a Bbaibbele mbolitondezya caantangala, balikke aabo baliyumya kusikila kumamanino mbabayoofwutuka. (Mt. 24:13) Aboobo, amubabikkile maanu aabo banga ambweni bakalebwa naa bakaleya. Ikuti cakukkazika moyo twatondezya luyando mbuli ndwajisi Jehova kwiinda mukubabikkila kapati maanu bantu aaba, tuyookkomana kubabona kabaitalika alimwi milimo yabo iisetekene cakubelekela antoomwe andiswe.—Lk. 15:4-10.