Amuyiisye Babombemyoyo Kweenda Munzila ya Leza
1. Ino ncinzi cijatikizyidwe mukugwasya bantu kuba basikwiiya?
1 Basikwiiya ba Kristo bamumwaanda wamyaka wakusaanguna bakali kwaambwa kuti bakali “benzila eyi.” (Inc. 9:2) Bunakristo bwini-bwini bubikkilizya bukkale bwamuntu boonse. (Tus. 3:5, 6) Notweendelezya ziiyo zya Bbaibbele, tacigwasyi pe kwiile buyo kuyiisya luzyibo lwini-lwini lwanjiisyo zyamu Bbaibbele. Tweelede kugwasya basikwiiya Bbaibbele kweenda munzila ya Jehova.—Int. 25:8, 9.
2. Ncinzi cikonzya kukulwaizya sikwiiya Bbaibbele kutobela malailile aa Leza?
2 Amugwasye Basikwiiya Kuyanda Jehova a Jesu: Masimpe cilakatazya kubantu batalondokede kubapa kuti mizeezo yabo, bukkale, ŋambawido akulilemeka zyeendelane akuyanda kwa Leza. (Rom. 7:21-23; Ef. 4:22-24) Nokuba boobo, luyando kuli Leza a Mwana wakwe ndolukulwaizya babombemyoyo kuubweza mukuli ooyu. (Joh. 14:15; 1 Joh. 5:3) Mbuti mbotukonzya kugwasya mbotwiiya limwi Bbaibbele kuba aluyando oolu?
3. Mbuti mbotukonzya kugwasya basikwiiya kuyanda Jehova a Jesu?
3 Amugwasye ngomwiiya limwi Bbaibbele kumuzyiba mbwabede Jehova. Umwi mukwesu wakapandulula kuti, “Bantu tabakonzyi kuyanda muntu ngobatazyi, aboobo kuzwa kumatalikilo aaciiyo, ndilabayiisya mbondiiya limwi Bbaibbele izina lya Leza kuzwa mu Bbaibbele alimwi ndilajana ciindi cakukankaizya bube bwa Jehova.” Kukankaizya cikozyanyo ca Jesu ninzila mbotu yakucita boobu. (Joh. 1:14; 14:9) Kuyungizya waawo, amukabelesye kabbokesi kakwiinduluka kali kumamanino aacibalo acimwi cabbuku lya Bbaibbele Ncoliyiisya kutegwa mugwasye sikwiiya kutelaika abube bubotu bwa Leza a Mwana wakwe.
4. (a) Nkaambo nzi basikwiiya banji kukambauka ncobakubona kuti kulakatazya? (b) Mbuti mbotukonzya kubagwasya aabo mbotwiiya limwi Bbaibbele kutalika kutola lubazu mumulimo wa Bunakristo?
4 Amubayiisye Kwiinda Mukuba Cikozyanyo Cibotu: Mbotuli bamayi abasololi, tulabatondezya bamwi kwiinda mumicito ncocipandulula kweenda munzila ya Leza. (1 Kor. 11:1) Mucikozyanyo, basikwiiya Bbaibbele banji tabazyibide kwaambila bantu mbobatazyi kujatikizya nzyobasyoma. Aboobo, inga cayandika kukkazyika moyo abupampu kutegwa tubagwasye kuba aluyando, lusyomo abusicamba buyandika mukutola lubazu mumulimo wakukambauka akugwasya bantu kuba basikwiiya. (2 Kor. 4:13; 1 Tes. 2:2) Luyando lwesu lwakusololela mbotwiiya limwi Bbaibbele luyootukulwaizya kubasangana akubagwasya nobatalika kutola lubazu mumulimo wa Bunakristo.
5. Mbuti kuba acikozyanyo cibotu mbokugwasya basikwiiya kubona ciyandika mukutobela malailile aa Leza?
5 Cikozyanyo cenu cilakonzya kuyiisya basikwiiya mumbazu zimwi ziyandika zyabuumi bwa Bunakristo. Nomuswaya baciswa naa kwaanzya bamwi kumiswaangano yambungano, balalubona luyando ndotujisi. (Joh. 15:12) Nomutola lubazu mukusalazya Ŋanda ya Bwami naa kucita zintu zimwi kutegwa mugwasye bamwi, muli mukubayiisya mbobakonzya kugwasya bamwi. (Joh. 13:12-15) Nobabona kuti mupona buumi buuba-uba, balamvwisya ncocipandulula ‘kusaanguna kuyandaula Bwami bwa Leza lyoonse.’—Mt. 6:33.
6. Ncinzi cijanwa mukugwasya babombemyoyo kuti babelekele Jehova?
6 Mulimo wakuyiisya bamwi kuzwa mu Jwi lya Leza awakugwasya bantu kuba basikwiiya uyandika kusolekesya. Pele cilakkomanisya kaka kubona babombemyoyo ‘kabeenda mulusinizyo’!—3 Joh. 4.