Amubabikkile Maanu Ibamwi—Kwiinda Mukubalanga Mbomubandika Limwi
1 Notukambaukila kubuleya alimwi akuŋanda aŋanda, kanji-kanji tulabalanga bantu katutana talika kubandika. Muciindi cisyoonto eeco, inga twakonzya kuziba mbobalimvwa kujatikizya kusika kwesu kweelana ambobalibonya kubusyu. Mbubwenya buyo, abalo balakonzya kuziba zinji kujatikizya ndiswe. Umwi mukaintu wakaamba boobu kujatikizya Kamboni wakamuswaya kati: “Icintu ncondiyeeya kumwanakazi ooyu Kamboni cijatikizya kumweta-mweta kwakwe, tanaakali kulibonya kuba sinkondo. Aboobo ndakaba aluyandisyo kapati.” Eeci cakapa kuti mukaintu ooyu aswiilile makani mabotu.
2 Ikubalanga bamwi ninzila mbotu iisololela kukupa bumboni notuli mubukambausi bwamumugwagwa naa kukambaukila mumasena aabuleya amwi. Mukwesu umwi ulabalanga kumeso bantu aabo mbayaanya. Ciindi nabalanga, ulamweta-mweta mpoonya akubaabila mamagazini. Mukubelesya nzila eeyi, ulabandika kabotu-kabotu abantu banji alimwi ulaabila mabbuku manji.
3 Amuzibe Mbobalimvwa Bamwi: Ikubalanga bamwi kuyootugwasya kuziba mbobalimvwa. Mucikozyanyo, ikuti umwi kajisi buyumu-yumu mukumvwa ncotwaamba naa tazumini ncotwaamba, kanji-kanji eeci cilakonzya kulibonya kubusyu bwakwe. Ikuti kajisi bubi naa kanyemede, tulakonzya kuziba kwiinda mukulanga mbokulibonya kubusyu bwakwe. Tulakonzya kuucinca naa kuufwiinsya mubandi wesu kweelana abukkale. Kuziba mbobalimvwa bamwi ninzila mbotu yakutondezya kuti tulababikkila maanu ibamwi.
4 Kutegwa Mutondezye Kuti Mulisinizyide: Muziinga zinji, kumulanga kubusyu muntu kubonwa kuti muntu ooyo ulisinizyide. Amubone Jesu mbwaakaingula ciindi basikwiiya bakwe nobakamubuzya kuti: “Mwati kuyooba uyoofutuka buya?” Ibbaibbele lyaamba kuti: “Jesu wakabalanga wati, ‘Kubantu eeci tacikonzeki pe, pele kuli Leza zintu zyoonse zilakonzeka.’” (Mate. 19:25, 26, Ci) Cakutadooneka, ikusinizya nkwaakatondezya Jesu kwiinda mukubalanga kwakapa kuti majwi aakwe abazule. Mbubwenya buyo, ikubalanga mbotubandika limwi kuyootugwasya kubaambila mulumbe wa Bwami cakusinizya.—2 Kor. 2:17; 1 Tes. 1:5.