Amubabikkile Maanu Ibamwi—Kwiinda Mukuba Basibuuya
1 “Jehova ngusibuuya.” (Int. 145:8) Nokuba kuti Mmwami Wakoonse-koonse, ngusiluzyalo alimwi ulabikkila maanu mukweendelezya bantu batalondokede. (Matl. 13:14; 19:18-21, 29) Tulakonzya kuyaambele munzila yesu njotubelesya mukubandika makani mabotu kwiinda mukwiiya Leza wesu sibuuya. (Kol. 4:6) Eeci cijatikizya zintu zinji ikutali buyo kwiile kuba abulemu muŋambawido yesu.
2 Kuŋanda Aŋanda: Ino ncinzi ncotweelede kucita ikuti uuli aŋanda twamuswaya aciindi citeelede naa natajisi ciindi cakukkala ansi kuti aambaule andiswe? Tweelede kuziziba ziindi eezi zitali kabotu alimwi akusoleka kufwiinsya mubandi wesu naa kwaamba buyo kuti tuyoomuswaya ciindi ciboola. Tatweelede kubasinikizya bantu kutambula mabbuku ikuti kabataayandi. Ikubabikkila maanu ibamwi kuyootupa kulemeka zintu nzyobajisi, mbuli kwiinda mukujala mulyango wakumanjililo aalubuwa, zitendele naa kutajatauka zintu zili mulubuwa alimwi kwiinda mukuyiisya bana besu ikucita mbubwenya oobu. Tweelede kuba masimpe kuti ibbuku lili lyoonse ndotwasiya aŋanda aatajanika muntu talilibonyi anze naa kubantu bainda buyo. Masimpe, buuya buyootupa kuti katucitila bantu zintu nzyotuyanda kuti andiswe batucitile.—Lk. 6:31.
3 Mubukambausi Bwamumugwagwa: Notuli mubukambausi bwamumugwagwa, tulakonzya kutondezya bulemu kwiinda mukutasinkila bantu beenda munzila alimwi akutabunganina kumbele lyabasambazi naa mantoolo. Tuyooyandika kubona bukkale bwabamwi kwiinda mukubandika buyo abaabo bajisi ciindi muciindi cabaabo ibabindide. Akaambo kakuyoba kwabantu mumigwagwa, inga twayandika kwaambaulisya kutegwa tumvwigwe. Pele eeci tweelede kucicita cabulemu ikutali kuti bantu boonse batalika kuswiilila ndiswe.—Mt. 12:19.
4 Notukambauka Kumulimo: Ikubabikkila maanu basikutulemba mulimo kuyootupa kuti katutabelesyi ciindi cakubeleka kucita mulimo wesu wakukambauka. Nokuba boobo, twajana ciindi notulyookezya masyikati naa ziindi zimwi zyakulyookezya, ibukambausi bwamukwiizya inga bwagwasya kapati. Babelesima banji inga bayooyanda kubikkilizyigwa akati kabaabo mbotutolela mamagazini lyoonse. Kubandika makani mabotu cabulemu asikumulemba mulimo kulakonzya kupa kuti mukapegwe ciindi cakuyoojanika mazuba oonse otatwe kumuswaangano wacooko waamwaka. Kwiinda mukuba basiluzyalo, babikkila maanu alimwi bajisi bulemu mumbazu zyoonse, twiiya Leza wesu sibuuya, Jehova.