Amube Citondezyo Cibotu Kukwaambaula Akukulilemeka
1 Mwaapostolo Paulo wakakulwaizya Timoteo kuti abe citondezyo mukwaamba alimwi amukweenda. (1 Tim. 4:12) Aswebo tuleelede kuba citondezyo cibotu mukwaambaula alimwi amukulilemeka, ikapati ciindi notuli mumulimo, nkaambo kucita boobu kulakonzya kupa kuti tukulwaizye myoyo yabaabo mbotuswaana, naa pe.
2 Tweelede kutondezya bube boonse bubotu, kubikkilizya akulemeka, kweetelela, luse, alimwi akucizyiba kwaamba. Kwiinda mubube oobu, tulakonzya kutondezya kuti tuliizi micito yesu mbwiibajatikizya bambi. Kulilemeka kabotu mumulimo kulakonzya kweezyanisyigwa asautu, lyalo lilweezya cakulya. Nelitawo, inga cilyo nocibota tacilimvwisyi akabotu pe. Kukakilwa kulilemeka kabotu mukweendelezya bambi kulakonzya kucita mbubonya.—Kol. 4:6.
3 Amube Citondezyo Cibotu Kukwaambaula: Kumwetamweta cabulongwe akwaanzya cakukondwa nzintu zitasyaali pe mukwaambaula makani mabotu. Ciindi majwi esu aamatalikilo notwaabotya acilongwe alusinizyo, tulamuzibya siŋanda kuti tulamulanganya ncobeni. Ciindi naambaula, amuswiililisye akutondezya bulemu bweelede kukuyeeya kwakwe. Nomwaambaula, amube bantu bacizyiba kwaamba ibabotezya.—Amweezyanye a Incito 6:8.
4 Zimwi ziindi tulaswaana muntu uutakwe cilongwe, naba sinkazi biya. Mbuti swebo mbotweelede kucita? Petro utukulwaizya kwaambaula munzila iitondezya “moyo mutete akuyoowa Leza.” (1 Pet. 3:15; Rom. 12:17, 18) Jesu wakaamba kuti naa simunzi waukaka mulumbe wa Bwami cakubbodola, swebo ‘atukunkumune buyo lusuko luli kuzituta zyasu.’ (Mt. 10:14) Kuti twalibonya kulilemeka kabotu muciimo cili boobu limwi inga kwatesya moyo wasikukazya oyo.
5 Amube Citondezyo Cibotu Kukulilemeka: Ikukambauka makani mabotu mumigwagwa iibelesyegwa loko alimwi amumasena aabuleya kuyandika kuti tube bantu balanganya bantuma, tutabi notuyoba nokuba kuzumanana, alimwi akutasinkilila basikwiinda. Notuli mumaanda aabantu bakkomanina kasimpe, tweelede kucita bulondo akulilemeka mbuli beenzu babotu, ikutondezya kulumba kusamausyigwa. Kufwumbwa bana batusindikila beelede kutondezya bulemu kuli simunzi azintu zyakwe alimwi beelede kulilemeka akuswiilila ciindi notwaambaula. Kuti bana kabaide kusunda, eci inga camupa kutuyeeyela bubi.—Tus. 29:15.
6 Ciwa cesu ceelede kucisalazya kubantu bambi kuti tuli bakambausi ba Jwi lya Leza. Kusama kwesu akulibamba, takweelede kuba kwabutaka akufwuluka alimwi takweelede kuba kwakulisumpula naa kwamapuwo. Ciwa cesu cileelede lyoonse kweelela makani mabotu. (Amweezyenye a Ba-Filipi 1:27.) Kwiinda mukulanganya ciwa cesu alimwi azibelesyo, tatukabikkili muntu cifwumpu naa kumupa kutongooka mulimo wesu. (2 Kor. 6:3, 4) Kwaambaula kwesu alimwi akulilemeka kulayungizya bubotu bwamulumbe wa Bwami, akuletela Jehova bulemu.—1 Pet. 2:12.