Kulilemeka Kubotu—Ncitondezyo Cabantu Balyaabide Kuli Leza
1 Kulilemeka kubotu kwaceya mazubaano. Nkaambo nzi ncocili boobu? Bantu balibindide cakuti ikanjikanji kunyina nobayeeya kubelesya mabala aatondezya bulemu mbuli kwaamba kuti “Akaka,” “Ndalumba” naa kuti “Amundijatile.” Ijwi lya Leza lyakasinsima kujatikizya kuyaansi kwakulilemeka mumazubaa kumamanino nolyakaamba kuti, ibantu bayooba ‘basikuliyanda, basimantumbwaambwa, basikakomokomo, batalumbi, basikancimwa, batalyeendelezyi, batayandi bubotu alimwi basikainya.’ (2 Tim. 3:1-4) Zintu zyoonse eezi nzezileta kutalilemeka. Mbobali bantu balyaabide kuli Leza, Banakristo beelede kupakamana kutegwa bataiyi bantu bamunyika batalemeki bamwi.
2 Ino Kulilemeka Kabotu Caamba Nzi? Ikulilemeka kubotu kulakonzya kupandululwa kuti nkubikkila maanu kapati kujatikizya mbobalimvwa bamwi, ikucikonzya kukkalaa bantu muluumuno. Imbazu zijatikizidwe mukulilemeka kabotu nkulanganya bamwi, kubapa bulemu, kubabikkila maanu kapati alimwi akubacitila calubomba. Zintu eezi zizwa kuluyando ndwajisi muntu umwi kuli Leza alimwi akuli simukobonyina. (Lk. 10:27) Zilakonzya kubelesyegwa kakunyina kusowa mali, pele zilayandika kapati mukuyanzanaa bantu bamwi.
3 Jesu Kristo wakapa citondezyo cilondokede. Lyoonse wakali kutobela Mulawo Wabukkale wakuti: “Mbubonya mbomuyanda kuti bantu bamucitile, anywebo amubacitile mbubonya.” (Lk. 6:31) Sena taitugambyi nzila Jesu njaakatondezya mbwaakali kweendelezya basikwiiya bakwe cakubalanganya alimwi acaluyando? (Mt. 11:28-30) Kulilemeka kwakwe kubotu tiikwakazwa kumilawo ilembedwe abasololi mumabbuku aazilengwa alimwi amilawo pe. Kwakazwa mumoyo mubombe alimwi uululeme. Tweelede kusoleka kwiiya citondezyo cakwe cibotu.
4 Ino ndiilili Banakristo nobayandika kulilemeka kabotu? Sena muuziindi buyo zyaalubazu, nobabikkilide maanu kutondezya kuti mbantu bali kabotu? Sena ziyandika buyo ciindi nobayanda kukwelelezya bamwi? Peepe! Tweelede kutondezya kulilemeka kubotu ciindi coonse. Muunzila nzi motweelede kutondezya kubikkila maanu ikapati kujatikizya makani aaya notuyanzana umwi aumwi mumbungano?
5 Ku Ŋanda ya Bwami: Ŋanda ya Bwami mbusena bwesu bwakukombela. Tulaunka kuya akaambo kakutambwaa Jehova Leza. Nkokuti tuli beenzu buya. (Int. 15:1) Sena tuli beenzu balilemeka kabotu ciindi notuli ku Ŋanda ya Bwami? Sena tulabikkila maanu kapati kujatikizya nsamino yesu alimwi akulibamba? Masimpe tweelede kukweeleba kutasama cabulemu naa kuciindizya buya kulibotezya. Kufwumbwa naa baunka kumiswaangano mipati noiba yambungano iicitwa nsondo ansondo, ibantu ba Jehova balizibidwe kapati akaambo kakulibonya kabotu ikweelela baabo balemeka Leza. (1 Tim. 2:9, 10) Aboobo tulatondezya kubikkila maanu alimwi abulemu kuli Simeenzeesu wakujulu alimwi abeenzu bamwi batambidwe.
6 Inzila iimbi mbotutondezya kulilemeka kabotu kujatikizya miswaangano nkwiinda mukusika muciindi cili kabotu. Masimpe, talili lyoonse eeci nocili cuuba-uba pe. Bamwi balakonzya kabakkala kubusena buli kule naa kabajisi mikwasyi mipati njobeelede kugwasya kulibambila. Nokuba boobo, kulibonya kuti mumbungano zimwi basikumwaya bainda ku 25 pasenti bajisi cilengwa cakusika kalumanide kale lwiimbo lwakujula alimwi amupailo. Aaka nkaambo kapati. Tweelede kuyeeya kuti kulilemeka kabotu kubikkilizya kupakamana kwesu kujatikizya mbobalimvwa bamwi. Jehova, Simeenzeesu sibuuya, watubambila mapobwe aaya aakumuuya kutegwa tugwasyigwe. Tulatondezya kulumba kwesu alimwi akubikkila maanu kujatikizya mbwalimvwa kwiinda mukufwambaana kusika. Kunze lyaboobo, kumuka kusika kumiswaangano kulanyonganya alimwi takutondezyi bulemu kulibaabo basika kale.
7 Ciindi notubungana, sena tulababikkila maanu ibapya bajanika? Ikubatambula ncibeela citondezya kulilemeka kabotu. (Mt. 5:47; Rom. 15:7) Kubaanzya munzila yaluyando, kunyukana mumaanza cakusangaalizya, kumwetamweta cabulongwe—zyoonse eezi nzintu zisyoonto, pele zigwasya mukuzibya kuti tuli Banakristo bakasimpe. (Joh. 13:35) Naakasika ku Ŋanda ya Bwami kwaciindi cakusaanguna, imwaalumi umwi wakati: “Ndakaswaanganya bantu banji basiluyando ncobeni, mbonditazi pe, mubuzuba bomwe kwiinda mbuli mbondakaswaanganya kale mucikombelo mondakakomenena. Cakalibonya antangalala kuti ndakajana kasimpe.” Icakatobela ncakuti, wakacinca bukkale bwakwe alimwi nokwakainda myezi iili ciloba wakabbapatizigwa. Inzya, kulilemeka kubotu kulakonzya kuleta mpindu zitalikomeneni!
8 Ikuti katulilemeka kabotu kubantu mbotutazi mbotuswaanganya, sena taciindi kweelela “kwaambisya kulibaabo baciinga calusyomo”? (Gal. 6:10) Injiisyo ilabeleka yakuti: ‘Amulemeke bapati.’ (Lev. 19:32) Tatweelede kubalekelezya bantu bali boobu kumiswaangano yesu.
9 Kuswiililisya: Ciindi camiswaangano yambungano, basimilimo Banakristo ba Leza balakanana kutegwa bape zipego zimwi zyakumuuya kutegwa batuyumye. (Rom. 1:11) Masimpe cilakonzya kutondezya kuti tatulilemeki kabotu ikuti twatalika kugunka naa kufwukula, kutafwuna ccungamu, kuvwiya-vwiya ciindi aciindi kumuntu ngotubambene limwi, kucita nyendo ziteelede kuya kucimbuzi, kubala zintu zitajatikizyi makani aali mukukananwa naa kucita zimwi zintu ciindi camiswaangano. Baalu beelede kupa citondezyo cibotu mumakani aaya. Kulilemeka kabotu munzila ya Bunakristo kuyootukulwaizya kutondezya bulemu bweelede kumwaambi alimwi amulumbe wakwe uuyeeme aa Bbaibbele kwiinda mukuswiililisya.
10 Kunze lyaboobo, kutegwa tumupe bulemu mwaambi alimwi abaswiilizi, tweelede kubamba zintu zibelekaa magesi alimwi atumafooni twakweenda atwalo kutegwa miswaangano yesu itanyonganizigwi.
11 Kulilemeka Alimwi Abana: Bazyali beelede kuti lyoonse kabapakamene kujatikizya kulilemeka kwabana babo. Ikuti mwana watalika kulila naa kuputaputa ciindi camiswaangano alimwi kucita boobu kwatalika kunyonganya bamwi, cili kabotu kumutola anze mwana ooyo cakufwambaana kutegwa mukamuumbulizye. Eeci cilakonzya kuba ciyumu zimwi ziindi, pele amuyeeye kuti kucita boobo kulakonzya kutondezya kuti mulipakamene kujatikizya mbobalimvwa bamwi. Ibazyali bajisi bana basyoonto balo balangilwa kuputaputa kwaziindi zinji basala kukkalila afwaafwi amulyango kutegwa batanyonganyi bantu banji kuti kwayandika kunyamuka ciindi camiswaangano. Mubwini, boonse bajanika balakonzya kutondezya kubikkila maanu kumikwasyi kwiinda mukutakkala muzyuuno zili musyule kutegwa babelesye ikuti naa kwayandika.
12 Alimwi bazyali beelede kabakuzyi kulilemeka kwabana babo kaitanatalika miswaangano alimwi anoyamana. Ibana tabeelede kuti kabazuzaana mu Ŋanda ya Bwami nkaambo eeci cilakonzya kuleta ntenda. Kuzuzaana mulubuwa lwa Ŋanda ya Bwami akwalo kulakonzya kuleta ntenda, ikapati ciindi nolyabbila zuba nkaambo takulibonyi kabotu. Kwaambaulisya ciindi nomuli anze kulakonzya kunyonganya basimukoboma alimwi takupi citondezyo cibotu kubukombi bwesu. Bazyali basoleka munzila iiluleme kweendelezya bana babo mukati alimwi aanze aa Ŋanda ya Bwami beelede kulumbwa nkaambo eeci ciyungizya bubotu bwakupona antoomwe muluumuno.—Int. 133:1.
13 Ku Ciiyo Cabbuku: Tulalumba kapati kubwaabi bwabakwesu aabo baaba maandaabo kuti abelesyegwe kucitila miswaangano yambungano. Ciindi notwaswaangana tweelede kutondezya bulemu alimwi akubikkila maanu kumpasya zyabo. Katutananjila tweelede kulukunkumuna kabotu lusuko alimwi amankanda kumabbusu eesu kutegwa tutabikki tombe aazibuye naa aamakkaapeti aayalwaa zibuye. Bazyali beelede kweendelezya bana babo, ikubona kwaamba kuti balilemeka kabotu akukkala mubusena bwaŋanda bucitilwa ciiyo cabbuku. Nokuba kuti kakamu kabantu inga nkasyoonto alimwi abusena inga tabuli mbuli ciindi notuli ku Ŋanda ya Bwami, tatweelede kuliiba kujata-jata zintu mumaanda abamwi akuyeeya kuti tababikkilide maanu. Bazyali beelede kumusindikila mwanaabo ciindi nayanda kubelesya cimbuzi. Kunze lyaboobo, mbokunga ciiyo cabbuku mmuswaangano wambungano, tweelede kusama mbuli mbotusama notuya ku Ŋanda ya Bwami.
14 Kulilemeka Kubotu Kulayandika: Kulilemeka kabotu kwa Bunakristo takutondezyi buyo bubotu mumulimo wesu, pele alimwi kuyungizya kuyanzana kubotu abantu bamwi. (2 Kor. 6:3, 4, 6) Mbotuli babelesi ba Leza uukondwa, ceelede kuba cilengwa buya kulindiswe kumwetamweta, kuba batakatazyi alimwi nokuba kucita tuntu tusyoonto munzila yaluyando zikonzya kuleta lukkomano kubantu bamwi. Zilengwa eezi zyakulilemeka ziyoobotezya maumi eesu katuli bantu balyaabide kuli Leza.