Cikozyanyo Kubana Akubapati

Nowa wakajisi cilongwe ciyumu a Leza. Wakalyaabide kucita kuyanda kwa Jehova. “Wakali kweenda a-Leza” alimwi wakalongezyegwa nkaambo kakucita boobu. Nowa wakali cikozyanyo cibotu ceelede kuyiigwa abana abapati. (Matl. 6:9) Ividiyo yakuti Noah—He Walked With God (Nowa—Wakali Kweenda a-Leza) iyoomugwasya kutelaika buumi bwa Nowa mbobwakabede, ikaambo ncaakeelede kulongezyegwa a Jehova alimwi ambomukonzya kwiiya bube bwakwe bubotu.

DVD yavidiyo ya Noah ibikkilizya mibuzyo iitobela. Amwiiyebelele vidiyo, mpoonya amulibuzye kuti: (1) Ino nkulubizya kuli buti bangelo bamwi nkobakacita, alimwi ino mbaani bakali Babbabbani? (Matl. 6:1, 2, 4) (2) Ino nkaambo nzi bantu ncobakaba basizibi kapati, alimwi ino Leza wakalimvwa buti kujatikizya ceeci? (Matl. 6:4-6) (3) Mbuti Nowa mbwaakaindene abantu bamwi? (Matl. 6:22) (4) Ino basizibi bakanyonyoonwa buti? (Matl. 6:17) (5) Ino bwaato bwakali bupati buti? (Matl. 6:15) (6) Ino ncinzi acimwi Nowa ncaakacita, alimwi ino ncinzi bantu ncobakacita? (Matl. 24:38, 39; 2 Pet. 2:5) (7) Ino banyama bakali mubwaato aumwi musyobo bakali bongaye-bongaye? (Matl. 7:2, 3, 8, 9) (8) Ino mvwula yakatola mazuba ongaye kayiwa, alimwi ino kupaya kwamaanzi nyika yoonse kwakatola mazuba ongaye? (Matl. 7:11, 12; 8:3, 4) (9) Nkaambo nzi Nowa amukwasyi wakwe ncobakafwutukila? (Matl. 6:18, 22; 7:5) (10) Ino mpaali bwaato mpobwakaakwiimina? (Matl. 8:4) (11) Ino Nowa wakaziba buti kuti cakali ciindi cibotu cakuzwa mubwaato? (Matl. 8:6-12) (12) Ino ncinzi Nowa ncaakacita naakazwa mubwaato? (Matl. 8:20-22) (13) Ino fwulicoongo wiiminina nzi? (Matl. 9:8-16) (14) Ino “kweenda a-Leza” cipandulula nzi? (Matl. 6:9, 22; 7:5) (15) Ino ncinzi ncotweelede kucita kutegwa tukamubone Nowa mu Paradaiso? (Mt. 28:19, 20; 1 Pet. 2:21)

Ino cibalo camu Bbaibbele cakusyomeka akuswiilila kwa Nowa camuyiisya nzi kujatikizya mbomweelede “kweenda a-Leza” alimwi akuba alusinizyo munguzu zya Jehova zyakufwutula bantu bakwe bapona mazubaano?—Matl. 7:1; Tus. 10:16; Heb. 11:7; 2 Pet. 2:9.