Imulimo Wesu—Mmulimo Uutondezya Luzyalo
1 Jesu wakabona kuti makamu-makamu aabantu ibakaswiilila mulumbe wakwe “bakalikatede akumwaika mbuli imbelele zitakwe mweembezi.” (Mt. 9:36) Calubomba aluyando, wakabaiisya nzila zya Jehova, wakabaumbulizya alimwi caluzyalo wakazilanganya nzyobakali kuyandika kumuuya. Notuzinzibala kuyeeya nzila zyakwe, twiiya kuyeeya akulimvwa mbwaakalimvwa Jesu alimwi bube oobu bwaluzyalo bulalibonya mumulimo wesu.
2 Amutelaike kaindi kasyoonto kujatikizya ncaakacita Jesu ciindi bantu bakali kuyandisya lugwasyo nobakamusikila. (Lk. 5:12, 13; 8:43-48) Wakababikkila maanu aabo bakali kuyandika lugwasyo lwaalubazu. (Mk. 7:31-35) Wakalizi mbobakali kulimvwa bamwi alimwi wakabalanganya. Tanaakali kulanga mbobaboneka bantu pe. (Lk. 7:36-40) Masimpe, Jesu wakatondezya luzyalo lwa Leza wesu.
3 “Wakabafwida Luzyalo”: Jesu tanaakali kubeleka mulimo wakwe cakwiinzya buyo mulawo. “Wakabafwida luzyalo” bantu. (Mk. 6:34) Mbubwenya buyo mazubaano, tatukambauki buyo mulumbe pele tulasoleka kubavwuna bantu babombe. Amumvwisye kaambo bantu ncobalimvwa boobo. Ino nkaambo nzi ncobalibilika? Sena basulaikwa alimwi akweenwa kubeembezi babukombi bwakubeja? Kubikkila maanu kwini-kwini nkotucita kuli bamwi kulakonzya kubapa kuswiilila makani mabotu.—2 Kor. 6:4, 6.
4 Luzyalo lulakulwaizya. Mucikozyanyo: Mukaintu umwi wakaba apenzi lyakufwidwa mwana wakwe musimbi wamyaka yakuzyalwa yotatwe. Ciindi bacizyi Bakamboni bobile nobakamuswaya, wakabaitila muŋanda kajisi makanze aakukazya mubandi wabo uujatikizya kaambo Leza ncalekelede mapenzi. Nokuba boobo, nokwakainda ciindi mukaintu ooyu wakaamba kuti: “Bakandiswiilila camoyo omwe alimwi ciindi nobakalaya, ndakaubulukwa kapati cakuti ndakazumina kuti bakandiswaye alimwi.” Sena mulasoleka kuba aluzyalo kumuntu uuli woonse ngomuswaanganya mumulimo?
5 Kuba aluzyalo kuyootugwasya kubaumbulizya bamwi. Kwiinda mukucita boobu, tulemeka “Taateesu siluzyalo,” Jehova.—2 Kor. 1:3.