Amubabikkile Maanu Ibamwi—Kwiinda Mukubalumbaizya
1 Kulumbaizya camoyo woonse kulakulwaizya, kupa kubweza ntaamu alimwi kuletela lukkomano. Basikumwaya banji bacibona kuti majwi aakulumbaizya aambwa camoyo woonse kanji-kanji apa kuti bantu kabaswiilila mumulimo. Mbuti mbotukonzya kubalumbaizya bantu ciindi notubaambila makani mabotu?
2 Amubikkile Maanu: Jesu Kristo kuzwa ciindi naakajokela kujulu, wakabikkila maanu kumilimo mibotu yambungano zili ciloba zyaku Asia Minor. (Ciy. 2:2, 3, 13, 19; 3:8) Mbubwenya buyo, kubabikkila maanu kapati bantu mbotuswaanganya mumulimo kuyootupa kujana ciindi cakubalumbaizya. Mucikozyanyo, lubuwa lubambidwe kabotu, muzyali uujisi luyando lwini-lwini kubana, naa kumwetamweta kwabulongwe alimwi akwaanzya kwauuli aŋanda zyoonse zitupa ciindi cakuti tubalumbaizye. Sena mulilibambilide kubikkila maanu alimwi akuzibelesya ziindi zyamusyobo ooyu?
3 Amube Bantu Baswiililisya: Ciindi nomukambauka kuli bamwi, amubalombe kuti baambe mbobayeeya kwiinda mukubabuzya mibuzyo yeelede. Amubalemeke kwiinda mukubikkila maanu nzyobaamba. (Rom. 12:10) Cakutadooneka, muyooba akaambo kamwi nkobaamba kalo nkomukonzya kubalumbaizya alimwi akukabandika kaambo aako nkomukonzya kuzuminana nkomwatalisya.
4 Amubelesye Bupampu: Ino ncinzi ncotweelede kucita ikuti uuli aŋanda waamba kaambo kamwi kateendelani akasimpe kamu Bbaibbele? Muciindi cakukazya kaambo kataluzi, amumulumbaizye uuli aŋanda kumajwi ngaamba alimwi amuzumanane kwiinda mukwaamba kuti “Ndabona kuti kaambo aaka mulakabikkila maanu kapati.” (Kol. 4:6) Nokuba kuti muntu ooyo ulakazya, kanji-kanji tulakonzya kumulumbaizya akaambo kakuba aluyandisisyo kukaambo aako. Kuteta moyo kwamusyobo ooyu kulakonzya kumutontozya muntu wakali kwaakazya kapati makani mabotu.—Tus. 25:15.
5 Kutegwa katukulwaizya, kulumbaizya nkotucita kweelede kuzwa kunsi aamoyo. Kubelesya ŋambawido iikulwaizya yamusyobo ooyu, kulamupa bulemu Jehova alimwi kulakonzya kupa bamwi kuba aluyandisisyo kumulumbe wa Bwami.