Amubabikkile Maanu Ibamwi—Kwiinda Mukulangisisya
1 Jehova Leza a Kristo Jesu mbebainda mukuzyiba zini-zini nzyobayandika bantu amukubapa lugwasyo. (2 Mak. 16:9; Mk. 6:34) Twazyiba nzyobayandisisya anzyobalibilika aabo mbotuyaanya mumulimo wamumuunda, inga twakonzya kuucinca mulumbe wesu wamakani mabotu kweelana abukkale.
2 Amubikkile Maanu Kutuntu Tuniini: Jesu wakali muntu uulangisisya. (Mk. 12:41-43; Lk. 19:1-6) Mbubwena buyo, notusika amunzi wamuntu akubona zimpangaliko zyacikombelo, mabala aalembedwe kumyoota, naa zintu zisobanya bana mulubuwa, tulakonzya kujana coolwe cakupa bukamboni bwamakani mabotu bugwasya.
3 Mbwaboneka muntu kubusyu ambwalilemeka zilakonzya kutondezya cintu cimwi kujatikizya mbwalimvwa. (Tus. 15:13) Ambweni kusweekelwa muyandwa naa bukkale bumwi butyompya zyamupa kuti ayandike luumbulizyo. Ulakonzya kukondwa ciindi notwamubalila magwalo aayelede. (Tus. 16:24) Sena mukamwiniŋanda ulibindide naa ujisilizi mwana uulila? Ikuti kacili boobu, inga cagwasya kubamba bubambe bwakuyooswaya ciindi cimbi. Kwiinda mukubikkila maanu ‘akweetelelana,’ tulakonzya kupa kuti muntu aswiilile twaakupilukila.—1 Pet. 3:8.
4 Amucince Zyakwaamba Kweelana Abukkale: Mwaapostolo Paulo wakabona kuti munzi wa Atene wakajisi cipaililo cakaabidwe kuli ‘LEZA UUTAZIZILWE.’ Eeci cakaijatikizya nzila mbwaakapa makani mabotu, nkaambo wakati: “Oyo ngomukomba cakutamuziba, ngonguwe ngwemwaambila.” Ntalisyo yabupampu njaakabelesya Paulo yakapa bamwi babaabo bakajanika kuti babikkile maanu kumulumbe wa Bwami akuba basyomi.—Inc. 17:23, 34.
5 Munzila iikonzyenye, kulangisisya kwesu kulatugwasya kuzyiba nzyayandisisya muntu akutupa kuti tucince ntalisyo yesu. Amubelesye mibuzyo iikonzya kukulwaizya mukamwiniŋanda kwaambaula cakulikwaya. Amuyeeyele magwalo aakonzya kubelesyegwa kutegwa abe aluyandisisyo kapati. (Tus. 20:5) Kulangisisya kwesu akubabikkila maanu ibamwi kulatugwasya kumwaya makani mabotu cabusongo.