Kuyungizya Luzyibo Lwesu Mumulimo Wakukambauka—Kubabikkila Maano Bantu
Ikaambo Ncociyandika: Jesu wakali kubona muntu umwi aumwi kumugama, alimwi wakali kubabikkila maano. Mucikozyanyo, aciindi cimwi Jesu wakabona kulibilika kwamwaalumi musinkematwi aboobo naakamuponya, wakacita oobo ambali kutali mpobakali kulangilila bantu. (Mk. 7:31-35) Wakatondezya kuti ulababikkila maano basikwiiya bakwe kwiinda mukubona kulezya kwabo alimwi kunyina naakabaambila zintu zinji. (Joh. 16:12) Nokuba kuti uli acuuno cakwe cakujulu, Jesu ulatondezya kuti ulababikkila maano bantu. (2Tim. 4:17) Mbotuli basikutobela Kristo, tuyanda kumwiiya. (1Pet. 2:21; 1Joh. 3:16, 18) Kuyungizya waawo, tuyoozwidilila kapati mumulimo wesu ikuti twamubikkila maano mukamwini ŋanda alimwi akubikkila maano kubukkale bwakwe bulibedelede, zintu nzyayandisya alimwi anzyalibilika. Ulalangilwa kuswiilila kuti wabona kuti tatuyandi buyo kumukambaukila naa kumusiila mabbuku, pele akuti tulamubikkila maano kumugama.
Amusoleke Kucita Eeci Mumwezi Uuno:
Amucite zitondezyo ciindi nomukomba mumukwasyi naa ciindi nomuli mumuunda mwalo sikumwaya mwayelede kucinca mubandi wakwe kutegwa abandike kaambo kamwi nkaamba mukamwini ŋanda.
Ciindi nomuswaangana kulibambila kuunka mumuunda, mukwesu weendelezya inga wabandika naa kutondezya nzila mbotukonzya kubabikkila maano bantu.