Branch Letter

Nomuyandwa Basikumwaya ba Bwami:

Ncamasimpe kuti bantu ba Jehova balalumba kapati. Mumwezi wa April twakasika amweelwe uuyungizidwe mupya wabasikumwaya bali 140,203. Kusoleka nkobakacita basikwaambilizya ba Bwami boonse kwakapa kuti kube mweelwe uuyungizidwe mupya wamawoola, mamagazini aakaabilwa, akupilukila. Twakakkomana kapati kubona mweelwe wakayungizigwa kapati waziiyo zya Bbaibbele zyakeendelezyegwa zili 231,420.

Cilatukkomanisya kubona bunji bwabakwesu bamu Lusaka nobabelesya Ŋanda Yakucitila Miswaangano Mipati kucitila miswaangano yabo yaalubazu, yabbazu ayacooko. Ŋanda Yakucitila Miswaangano Mipati ili mukuyakwa ku Kitwe alimwi kuli bubambe bwakuti iimbi ikayakwe ku Ndola.

Muziindi zino zyamapenzi aakubula mali, kuyaka alimwi akubelesya Ŋanda Yakucitila Miswaangano Mipati kuyaabudula kapati. Aboobo, ba Kabunga Keendelezya ‘bakabala mali’ alimwi akulailila kuti muciindi cakuyaka Maanda Aakucitila Miswaangano Mipati, masena aamwi aakucitila miswaangano yaalubazu, yabbazu ayacooko abambululwe buyo. (Lk. 14:28) Makanze ngakuti kube masena mabotu mwalo mukonzya kubelesyegwa ziyasyo zitakatazyi alimwi zitaduli.

Eelyo kaka mulimo wabusungu ooyu mukutola ambele ziyandika zya Bwami ulalumbaizigwa! Atupailile kuti Jehova uyootupa kuti toonse tube bantu baabi mukusanga mali kumulimo uucitwa mucisi cino. (Tus. 3:9, 10) Jehova azumanane kutulongezya mukubelekela antoomwe kutegwa “tube lutembauzyo lwabulemu bwakwe.”—Ef. 1:12.

Tobanyoko,

Ofesi ya Mutabi yamu Zambia