Ividiyo Yeelede Kuyeeyesya
“Vidiyo eeyi ipa muntu kuyeeya!”
“Yakandinjila mumoyo mpoonya-mpoonya!”
“Ndakalimvwa kujatikizigwa kapati!”
1 Sena oobu mbomwakalimvwa ciindi cakusaanguna nomwakeebelela vidiyo ya Young People Ask—How Can I Make Real Friends? Myaka iili mbwiibede yainda, umwi mukwesu uucili mwana-mwana wakali mumapenzi mubuumi bwakwe akaambo kabalongwe mbaakasalide. Bakamupa kuti aleke kubikkila maanu kukasimpe alimwi cilongwe cakwe a Jehova cakamana. Mpoonya vidiyo ya Real Friends yakamwaigwa. Wakalemba kuti: “Nondakaiyebela vidiyo cakwiinduluka-induluka, misozi yakeenda. Ndakamulumba Jehova akaambo kalugwasyo lwaaciindi ceelede.” Vidiyo yakamukulwaizya kucinca bukkale bwakwe alimwi akujana balongwe bali kabotu. Wakayungizya kuti: “Ncamasimpe kuti nobasikumwaya vidiyo eeyi mujisi twaambo twamazuba aano tucitikila bakubusi.” Nobazyali alimwi abakubusi, amukaiyebele alimwi vidiyo eeyi aciiyo camukwasyi citobela. Amwiiyimike vidiyo camana cibeela acimwi alimwi akubandika antoomwe mibuzyo iili mumincali iitobela cakwaanguluka acakutainda mumbali.
2 Majwi Aantalisyo: Ino mulongwe wini-wini uli buti?—Tus. 18:24.
3 Zisinkilizyo Kukubamba Balongwe: Ino mbuti mbomukonzya kukuzunda kulimvwa kuti tamujisi balongwe? (Flp. 2:4) Ino nkaambo nzi ncomweelede kuba bantu balisungwide kubambulula bukkale bwanu, alimwi ino nguni uukonzya kumugwasya kucita boobu? Ino ncinzi ciyoomugwasya kuba aciindi cakujana balongwe banji, alimwi ino nkuli nkobakonzya kujanwa?—2 Kor. 6:13.
4 Cilongwe a Leza: Ino mbuti mbomukonzya kuba acilongwe ciyumu a Jehova, alimwi ino nkaambo nzi kucita boobu ncokutali kusowa buyo ciindi? (Int. 34:8) Ino nguni uukonzya kuciyumya kabotu cilongwe canu a Leza?
5 Balongwe Batali Kabotu: Ino mbaani balongwe babi? (1 Kor. 15:33) Ino mbuti balongwe batali kabotu mbobakonzya kumunyonganya muntu kumuuya? Ino cibalo camu Bbaibbele cijatikizya Dina cimuyiisya nzi?—Matl. 34:1, 2, 7, 19.
6 Cisobano Camazuba Aano: Ino buumba bwakamupa kucita nzi Tara? Ino ntwaambo nzi ntwaakaamba kutondezya kuti tiicakali cibi kuyanzana abakubusi bakunyika? Ino bakamunjizya mubukkale bubyaabi buli buti? Nkaambo nzi bazyali bakwe ncobakakakilwa kuziba bukkale mwaakabede, pele ino bazyali bakabucinca buti bukkale bwabo kutegwa bamugwasye kuyuma kumuuya? Ino mbuti umwi mucizi painiya mbwaakatondezya kuti wakali mulongwe wini-wini kuli Tara? Ino nkaambo nzi Banakristo ncobeelede kulutobela lugwalo lwa Tusimpi 13:20 a Jeremiya 17:9? Ino nciiyo nzi ciyandika Tara ncaakaiya?
7 Mamanino: Ino nziiyo nzi nzyomwaiya muvidiyo eeyi? Ino mbuti mbomukonzya kwiibelesya kugwasya bamwi?—Int. 71:17.