Bakamboni ba Jehova Balikamantene Mukukambauka Makani Mabotu

Kwamyaka iinda ku 100, Bakamboni ba Jehova balikamantene mukukambauka makani mabotu. Mumulimo ooyu mupati wakukambauka uuzyibidwe nyika yoonse, tulabelesya myaambo minji mukumwaya mulumbe ooyu alimwi tulacita oobo mumasena aainda ku 230. (Mt. 24:14) Nkaambo nzi ncouyandika mulimo ooyu? Mbuti mboucitwa munyika yoonse? Ividiyo yakuti Jehovah’s Witnesses—Organized to Share the Good News ilaingula mibuzyo eeyi kwiinda mukutondezya milimo iicitwa muzisi zyoonse. Mwamana kweebelela vidiyo eeyi, amubikkile maano kumibuzyo iitobela.

Ino vidiyo eeyi yamugwasya buti kuyungizya luzyibo lwanu kujatikizya (1) kubeleka nkoibeleka mbunga ya Jehova mumulimo wakukambauka makani mabotu? (2 Ti. 4:2) (2) mikwasyi ya Bbeteli munyika yoonse? (3) lwiiyo lupegwa kuli bamisyinali abalangizi bamumbungano? (2 Ti. 2:2) (4) mbociyandika kutalika buzuba bumwi abumwi kwiinda mukubala lugwalo lwamu Bbaibbele, akulibambila miswaangano nsondo ansondo? (Mil. 17:11) (5) bubotu bwakujanika kumiswaangano yesu ya Bunakristo? (Heb. 10:24, 25) (6) zilongezyo nzyomuyootambula inyika yaakuba Paradaiso? (Is. 11:9) (7) coolwe ncomujisi cakutola lubazu mumulimo wakutebula uucitwa lino?—Joh. 4:35.

Vidiyo eeyi yabagwasya kapati bantu balaaluyandisisyo kuti bazyibe mboucitwa mulimo wanyika yoonse wa Bakamboni ba Jehova. (8) Ndilili notukonzya kubatondezya vidiyo eeyi bantu mbotwiiya limwi Bbaibbele, banamukwasyi, naa bantu bamwi? (9) Ino bakalimvwa buti bantu mbomwakatondezya vidiyo eeyi?

Notuyeeya zyintu nzyacita Jehova, tulaazumina majwi ngaakaamba sintembauzyo aakuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo.” (Int. 40:5) Atwiibelesye kabotu vidiyo eeyi mukugwasya bantu kumuzyiba kabotu Jehova ambunga yakwe!