Mulimo Mupati Wakukambauka Uzibidwe Nyika Yoonse!
Kwamyaka iinda ku 100, Bakamboni ba Jehova bali kukambauka makani mabotu. (1 Kor. 9:23) Mumulimo ooyu mupati wakukambauka uzibidwe nyika yoonse, tulabelesya myaambo minji mukumwaya mulumbe ooyu. Tulaumwaya mumasena aainda ku 230. (Mt. 24:14) Ino nkaambo nzi mulimo ooyu ncouyandika? Alimwi mbuti mboucitwa munyika yoonse?
Ividiyo ya Jehovah’s Witnesses—Organized to Share the Good News ilaingula mibuzyo eeyi kwiinda mukutondezya milimo iimwi iicitwa muzisi zyoonse. Nomweebelela kamubikkila maano kumibuzyo eeyi: (1) Ino mulimo wesu weendelezyegwa buti? (2) Ino mbuti ba Cibeela Cakulemba, Cakusandulula, Cakuzekaula, a Cibeela Cibamba Mateepu aakuswiilila Amavidiyo mbobagwasya kukambauka makani mabotu? (3) Ino mulimo wakusimba akutuma mabbuku manji ugwasya buti? (Joh. 17:3) (4) Ino manji buti mabbuku aasimbwa amwaka? (5) Ino ncinzi cacitika akaambo kakuba amabbuku aamba zya Bbaibbele? (Heb. 4:12) (6) Ino mbubambe nzi bwacitwa kutegwa bagwasigwe aabo bajisi penzi lya kutabona naa kwaambaula? (7) Ino mali azwa kuli ngotubelesya mumulimo wesu? (8) Ino mbuti mbotugwasigwa amulimo ngobacita bali mucibeela ca Hospital Information Services, Cibeela Camulimo, a Cibeela Cilanganya Miswaangano Mipati? (9) Mbomuli umwi wa Bakamboni ba Jehova, ino mbuti mboyamugwasya vidiyo eeyi kuyungizya luzibo lwanu (a) kukusoleka nkoicita mbunga ya Jehova mumulimo wakukambauka makani mabotu? (b) kujatikizya mikwasyi ya Beteli iinda ku 100 munyika oonse? (c) kujatikizya lwiiyo lupegwa kubeendelezyi bamumbungano alimwi abamisyinali? (d) mbociyandika kutalika buzuba kwiinda mukubala lugwalo lwamu Bbaibbele akulibambila miswaangano ansondo? (e) bubotu bwakujanika kumiswaangano ya Banakristo? (f) ncoiya kupandulula Paradaiso munyika? (Is. 11:9) (g) kutola lubazu mumulimo wakutebula uucitwa lino?—Joh. 4:35.
Ino bantu mbomwatondezya vidiyo eeyi mbuli bamukowa, beenzinyoko, mbomwakabandikide limwi ambomwiiya limwi Bbaibbele, bakautambula buti mulumbe ooyu? Mulakonzya kutondezya muntu vidiyo eeyi akumukambaukila makani mabotu.—Mt. 28:19, 20.