Twakapegwa Cintu Ciyandisi
1 Mulimo wakukambauka mwaapostolo Paulo ngwaakapegwa a Leza wakaubona kuti ulayandika kapati alimwi wakawaamba kuti ncintu “ciyandisi.” (2 Kor. 4:7) Wakaliyumya kubuyumu-yumu alimwi amukupenzyegwa kutegwa azuzikizye mulimo ooyo. Wakakambauka cabusungu kumuntu uuli oonse ngwaakali kukonzya kuyaanya. Wakeenda misinzo minji amaulu alimwi amaato mulwizi yalo yakajisi buyumu-yumu alimwi yakali kuletela ntenda. Ino mbuti mbotukonzya kumwiiya Paulo alimwi akutondezya kuti tulaubikkila maanu mulimo wesu wakukambauka? (Rom. 11:13) Ino ncinzi cipa mulimo wesu wakukambauka kuba cintu ciyandisi citakonzyi kweezyanisigwa?
2 Cintu Ciyandisi Kapati: Zintu ziyandisi zyaansi kanji-kanji ziletela mapenzi manji alimwi zipa mpindu zisyoonto naa zyaciindi cisyoonto buyo. Kulubazu lumwi, mulimo wesu utuletela zilongezyo zitamani swebo alimwi abantu bamwi. (1 Tim. 4:16) Ulabagwasya bantu babombe myoyo kumuziba Jehova, kucinca bukkale bwabo, alimwi akujana bulangizi bwini-bwini bwabuumi butamani. (Rom. 10:13-15) Kwiinda mukubona mulimo wesu wakukambauka kuba cintu ciyandika kapati, tulaba abuumi bukkomanisya, kulimvwa kuti kuli ncotuzuzikizya lyoonse, alimwi akuba abulangizi bwakumbele buyumya-yumya.—1 Kor. 15:58.
3 Amutondezye Kuti Mulacibikkila Maanu Cintu Canu Ciyandisi: Kubikkila maanu nkotucita kucintu cimwi kanji-kanji kulatondezyegwa kwiinda mucintu ncotulisungwide kwaaba akaambo kancico. Eelo kaka taciliboteli coolwe cakubelesya ciindi alimwi anguzu nzyotujisi kukutembaula Jehova! (Ef. 5:16, 17) Mbotucibelesya ciindi kweelede kutondezya kuti tubikkila kapati maanu kuzintu zyakumuuya kwiinda zintu zyakumubili. Mbokunga tujisi cintu ciyandika kapati ncotweelede kwaabila, tuyooyanda kukambauka cabusungu alimwi akupakamana kwaambilizya makani mabotu ciindi cili coonse.
4 Zintu ziyandisi zyamuulo mupati tazisisidwe lyoonse, pele zibikkidwe aatuba kuti bantu kabazibona. Ikuti mulimo wesu wakukambauka tuubona kuba cintu ciyandisi, uyooyandika kapati mubuumi bwesu. (Mt. 5:14-16) Kumwi katulumba kapati, atuzumanane kwiiya mwaapostolo Paulo alimwi akubelesya ciindi cili coonse kutondezya kuti tulaubikkila maanu ncobeni mulimo wesu wakukambauka, kuubona kuti ncintu ciyandisi.