Amutondezye Kulumba Kucoolwe Ncomujisi Cakubelekela Leza
1. Ino bantu banji munyika baubona buti mulimo wesu wakukambauka?
1 Bantu banji munyika ya Saatani, mulimo wesu wakukambauka baubona kuti “mbufwubafwuba.” (1 Ko. 1:18-21) Ikuti tiitwacenjela, kuyeeya ooku kutali kabotu kulakonzya kututyompya alimwi akutulesya kusungwaala. (Tus. 24:10; Is. 5:20) Ntwaambo nzi tweelede kutupa kukkomanina coolwe ncotujisi cakuba Bakamboni ba Jehova?—Is. 43:10.
2. Nkaambo nzi mulimo wakukambauka ncoukonzya kwaambwa kuti “mulimo uusalala”?
2 “Mulimo Uusalala”: Mwaapostolo Paulo wakaamba mulimo wakukambauka kuti “mulimo uusalala.” (Lom. 15:15, 16) Mbuti mulimo wakukambauka mbouli “mulimo uusalala”? Kutola lubazu mumulimo wakukambauka kutupa kuba “basimilimonyina” a “Yooyo Uusalala,” Jehova, alimwi cipa kuti zyina lyakwe lisalazyigwe. (1 Ko. 3:9; 1 Pe. 1:15) Jehova ubona mulimo wesu wakukambauka kuti ‘ncipaizyo cantembauzyo,’ aboobo mulimo wakukambauka ncibeela ciyandika kapati mubukombi bwesu.—Heb. 13:15.
3. Ncinzi cipa kuti mulimo wakukambauka kauli coolwe cipati?
3 Kukambauka makani mabotu ncoolwe cipati cipedwe buyo kubantu basyoonto. Bangelo balakonzya kuukkomanina mulimo uuli boobu alimwi akuulanganya kabotu citaambiki. (1 Pe. 1:12) Pele Jehova wasala ndiswe tobantu notutalondokede, ‘toziyobwedo zyabulongo,’ kuti tube acoolwe eeci.—2 Ko. 4:7.
4. Mbuti mbotukonzya kutondezya kuti tulaukkomanina mulimo wakukambauka?
4 Ncintu Cakusaanguna: Akaambo kakuti tulaukkomanina mulimo wesu, kukambauka tukubona kuti ncimwi ‘cazyintu ziyandika kapati’ mubuumi bwesu. (Flp. 1:10) Aboobo, nsondo ansondo tulajana ciindi cakutola lubazu mumulimo ooyu. Mwiimbi uukkomanina coolwe ncajisi cakwiimba abaimbinyina ibazyibidwe nyika yoonse, ulalibambila lyoonse katanaunka kukusobana alimwi ulabeleka canguzu kutegwa acizyibe kabotu. Mbubwenya buyo, tweelede kulibambila katutanaunka mukukambauka kutegwa ‘tuyiisye akupandulula jwi lyakasimpe cakulomya,’ akuti tubeleke canguzu kutegwa tuyaambele mukuba ‘aluzyibo lwakuyiisya.’—2 Ti. 2:15; 4:2.
5. Ino nguni uukkomanina mulimo wesu wakukambauka?
5 Mutalekeli bantu bajisi mizeezo mibi kumutyompya. Kamuyeeya kuti kucili bantu banji mucilawo cesu bakkomana ciindi notubaswaya. Pele tatuyandauli kukkomaninwa abantu. Mbwalimvwa Jehova ncecintu ciyandika kapati, alimwi ulakukkomanina kusolekesya kwesu.—Is. 52:7.