Amwiiye Kristo Mumulimo Wanu Wakukambauka
1 Jesu wakatusiila cikozyanyo ncotweelede kutobela mumulimo wesu wakukambauka. Luyando ndwaakajisi kuli Leza akubantu wakalutondezya muziindi zinji alimwi amunzila zinji. Wakayiisya babombe myoyo kasimpe alimwi wakacita milimo yaluzyalo kuli baabo bakali kuciswa alimwi abakapengede.—Mt. 9:35.
2 Cikozyanyo ca Jesu Alimwi Anjiisyo: Jesu kunyina naakanyonganizigwa kwiinda mukulinjizya mutwaambo twacisi naa mulugwasyo buyo lwabuntunsi kutegwa agwasye banamaleya. Alimwi kunyina naakazumizya kuyandisya nzila iili yoonse yakugwasya bantu kuti imunyonganye naa kumusinkila kumulimo wakwe mupati. (Lk. 8:1) Wakabikkila maanu kukukambauka makani mabotu aa Bwami bwa Leza kuba cintu cilikke ciyoomana mapenzi aacitikila bantu. Jesu wakajisi mulimo mupati ngwaakeelede kucita pele wakajisi ciindi cisyoonto cakuubeleka. Bantu baku Kapernauma nobakali kuyanda kuti Jesu acaale, wakabaambila boobu basikwiiya bakwe: “Katuya kumbi . . . kuti nkakambauke oko akwalo, nkaambo nciceeco ncendazida.”—Mk. 1:38.
3 Jesu naakamana kuyiisya basikwiiya bakwe, wakabatuma akubapa malailile aaya aagaminide: “Kamunooyookambauka kuti, Bwami bwakujulu [bwaswena aafwaafwi].” (Mt. 10:7) Wakayiisya basikwiiya bakwe kuti ziyandika zya Bwami zyeelede kuba mubusena bwakusaanguna mubuumi bwabo. (Mt. 6:33) Majwi aamamanino Jesu ngaakaambila basikwiiya bakwe katanaunka kujulu akatondezya caantangalala nzyobakeelede kucita. Wakaamba kuti: “Nkaambo kaako kamuya mukabaiisye bantu bamisyobo yoonse.”—Mt. 28:19.
4 Bwami Ncobuyandika: Kaambo kapati kamubandi wa Jesu kakali Bwami bwa Leza, alimwi wakakulwaizya basikwiiya bakwe kutobela cikozyanyo cakwe. Kusoleka kwabantunsi kuti bamanizye mapenzi aacitikila bantu takukonzyi kuzwidilila. (Jer. 10:23) Bulikke Bwami bwa Leza mbobuyoosalazya zina lya Leza alimwi akumanizya mapenzi aacitikila bantu. (Mt. 6:9, 10) Kuyiisya kasimpe ka Bwami kubantu aabo “balila akutongela nkaambo kazisesemyo zyoonse zicitwa,” kulabagwasya kupona buumi bukkomanisya lino alimwi akukakatila kubulangizi busyomeka bwakumbele.—Ezk. 9:4.
5 Jesu wazumanana kuba amulimo mupati mukukambauka makani mabotu aa Bwami bwa Leza, alimwi utusyomezya kuti unootugwasya. (Mt. 28:20) Ino mulimo wesu wakukambauka weendelene buti acikozyanyo ncaakatusiila Jesu? (1 Pet. 2:21) Mumazuba aano aakumamanino aakatazya, atubeleke kusikila mpotugolela mukutobela kabotu-kabotu cikozyanyo ncaakatusiila Jesu mumulimo wakukambauka.