Ikubona Luzibo Kuba Cintu ‘Citete’
1. Ntwaambo nzi tupa bantu bamwi kubona kwiiya kuba cintu cikatazya?
1 Solomoni wakati: “Luzibo ndutete.” Nokuba boobo, kubantu bamwi kwiiya ncintu cikatazya kapati. Masimpe kuti tulabotelwa kuziba zintu zipya, pele kubantu bamwi cilakatazya kujana ciindi cakwiiya acakuvwuntauzya. Aboobo, cilayandika kapati kulanga-langa “makani malamfu aabulondo bwa-Leza” mumabbuku eesu.—Tus. 14:6; 1 Kor. 2:10.
2. Kutegwa tujane “luzibo alumvwisyo,” ncinzi ciyandika?
2 Inga mwaamba kuti, ‘cakali cuuba-uba kuli Solomoni, Leza wakali kumugwasya.’ Masimpe, Leza wakapa Solomoni “moyo wabusongo uucenjede.” (1 Bam. 3:12) Pele Solomoni wakatondezya luyandisisyo lwakuziba kabotu nzila zya Jehova. Wakati: “Ndakabika moyo wangu kukuyandaula busongo.” (Muk. 1:13) Jehova wakamulongezya akaambo kaluyandisisyo ndwaakajisi. Mmasimpe kuti cakacitikila Solomoni cakalilibedelede, pele kwiinda mukuba amuyeeyo mubotu, ciyanza cakwiiya alugwasyo lwa Leza, aswebo inga twajana “luzibo alumvwisyo” ndotuyandika.—Tus. 1:4; 2:6.
3. Ncinzi camugwasya kuba aciyanza cibotu cakwiiya?
3 Amube Acilengwa Cakwiiya: Mwaapositolo Paulo wakakulwaizya Banakristonyina kuti, ‘kweenda kwabo kuleelede kuba mbubonya mbuli makani ngibabwene kale.’ (Flp. 3:16) Ciyanza cakucita zintu cilagwasya munzila zinji zyabukkale, mbuli kuziba ciindi cakwiiya ambokuyiigwa. Bamwi bacibona kuti kubikka Bbaibbele amabbuku aayiigwa abusena aalibonya cilagwasya kwiibaluka. Kukakatila kuciindi cibikkidwe cakwiiya, ambweni mafwumina kapati naa kumangolezya cilabagwasya bamwi ‘kujatisya loko ciindi’ cakwiiya.−Ef. 5:16.
4. Ino nziyeekezyo nzi zigwasya notulibambila ciiyo cabbuku Cambungano?
4 Amubale, Amwiinduluke Alimwi Akuyeeya: Atulange-lange mbutukonzya kutalika kwiiya bbuku liyiigwa aciiyo cabbuku Cambungano. Cakusaanguna, amujalule mpocibede ciiyo ncomuyanda kwiiya. Eeci lyoonse cilatondezyegwa mumulongo uuli mu Mulimo Wesu wa Bwami. Cabili, amucilange-lange ciiyo coonse. Nomulanga-langa mabbuku aabandika kapango akapango kamu Bbaibbele, inga cabota kubala tupango mu Bbaibbele tutiilangwe-langwe. Kucita boobo ciyootugwasya kuzibilana amagwalo aayoobandikwa muciiyo cesu. Ikuti naa tuyaakwiiya mumabbuku aaya, mbuli bbuku lya Inzila Yakujana Lukkomano Mumukwasyi alimwi a Amubaa Cilongwe a Jehova, inga cainda kubota kubala lugwalo luli mukabbokesi kakwiinduluka kali koonse kumamanino aacibalo acimwi.
5. Ino ncinzi bazyali alimwi abalangizi baciiyo cabbuku Cambungano ncobeelede kubikkila maano alimwi nkaambo nzi?
5 Nomulanga-langa mincali njomuyooiya, amulange tutwe, kabbokesi kamibuzyo, azimwi buyo, kutegwa muzibe zili mukati. Bazyali alimwi abalangizi ba Ciiyo Cabbuku Cambungano abalo bayoobelesya zikozyanyo zili zyoonse alimwi azimwi zigwasilizya kuyiisya. Kwiinda mukubelesya zyeezi kuyoogwasya kuti bana kababikkila maano abaabo batacizi kubala kabotu.
6. Ino ninzila nzi zigwasya nzyotukonzya kubweza kutegwa tucikonzye kwiingula lyaciiyo?
6 Sena inga mwaamba twaambo tumbi tugwasya? Bantu bamwi bacibona kuti cilagwasya kubala cibalo coonse mpoonya kwiinda mukubelesya mibuzyo iibikkidwe bakonzya kujana bwiinguzi akujana twaambo tupati-pati mumuncali aumwi. Ikulibambilila limwi kuyoomugwasya kuba basicamba alimwi kuyoomupa kuti kamucikonzya kwaambaula akutola lubazu aciiyo cabbuku Cambungano
7. (a) Ino muyeeya kuti cigwasya buti kwiinduluka nzyotwaiya twamana kwiiya ciiyo acimwi? (b) Nkaambo nzi ikwaambila bantu bamwi nzyomwiiya ncokukonzya kumupa kukkomana akupa kuti ciiyo kacikkomanisya?
7 Mwamana kwiiya, amutulange-lange alimwi tutwe, zifwanikiso alimwi azintu zimwi zigwasya kwiiya akubona naa muciyeeya nzyomwaiya acibalo acimwi. Amusole kwaamba nzyomwakaiya azyeezyo nzyomuzi kale azyakamucitikila. Twaambo amakani aamu Magwalo ngomwakaiya lino ayootalika kulimvwisya. Cakulicesya amwaambile bamumukwasyi wanu, beenzinyoko abantu bamwi nzyomwiiya. Aniini-niini luzibo lwanu luyookomena akutalika kumvwisya zintu. Mpoonya kwiinda mulugwasyo lwa Jehova, muyooba mbuli Solomoni wakazi kubona kuti “luzibo ndutete.”−Tus. 14:6.