Kuli Basikubala

TUYANDA kumuzibya kuti kutalikila amagazini eeyi, kuli kucinca kujatikizya mboinakulembwa Ngazi Yamulindizi. Katutana pandulula ciyoocinca, atwaambe zintu zitakacinci.

Izina ya magazini eeyi, Ngazi Yamulindizi Yaambilizya Bwami bwa Jehova tiiyacincwa. Aboobo, Ngazi Yamulindizi iyoozumanana kulemeka Jehova nkaambo ngu Leza mwini-mwini akuumbulizya basikubala amakani mabotu aa Bwami bwakwe. Zibalo zili apeeji 5 kusika ku 9 ziyoobandika ncobwaamba oobo Bwami anobuya kuboola. Kuyungizya waawo, Ngazi Yamulindizi iyoozumanana kupa kuti basikubala babe alusyomo luyumu muli Jesu Kristo akutola ambele kasimpe kamu Bbaibbele akupandulula zicitika munyika kwiinda mukubelesya businsimi bwamu Bbaibbele mbuli mboyali kucita kwamyaka minji yainda.

Aboobo, ino ncinzi lino ciyoocinca? Atupandulule zibalo zimwi zipya zikkomanisya ziyooba mumagazini ya 1 mwezi aumwi.a

Twaambo tunji tupa kuyeeya tunakulembwa ziindi zimwi. Cibalo caamba kuti “Sena Mwalizi” ciyooamba makani aakkomanisya aamba zibalo zisalidwe zyamu Bbaibbele. Cibalo caamba kuti “Amube Acilongwe a Leza” ciyootondezya ncotukonzya kwiiya kujatikizya Jehova kuzwa mucibalo cigaminide ca Bbaibbele. Cibeela caamba kuti “Basikubala Balabuzya” ciyoobandika bwiinguzu bwamibuzyo iijanika mu Bbaibbele. Mucikozyanyo, bantu banji balabuzya kuti, “Sena Bwami bwa Leza buli mumoyo wanu?” Muyoojana bwiinguzi apeeji 13.

Zibeela zinji zinakulembwa lyoonse zyabambilwa kugwasya mikwasyi. Cibeela cakuti “Nzila Zikonzya Kupa Mukwasyi Kukkomana,” cinakulembwa ziindi zyone amwaka ciyootondezya bukkale bwini-bwini bwamumukwasyi amapenzi aajanwa akutondezya njiisyo zyamu Bbaibbele mbozikonzya kugwasya kumana mapenzi. Cibalo cakuti, “Amubayiisye Bana Banu,” ncibeela bazyali ncobeelede kubala abana babo cinakumwaigwa mu Ngazi Yamulindizi aimwi. Cibalo cimwi cinakucincana aceeci ncakuti, “Cibeela Cabana,” ciyoopandulula cibalo cakwiiya Bbaibbele bana ncobeelede kubikkila maano

Zibalo azimwi ziyungizyidwe zinakumwaigwa ziindi zimwi. Cibalo caamba kuti “Amwiiye Lusyomo Lwabo,” ciyootukulwaizya kutobela cikozyanyo camuntu waambwa mu Bbaibbele. Mucikozyanyo, amapeeji 18 kusika ku 21 mumagazini eeyi, muyoobala cibalo camusinsimi Eliya akwiiya mbotukonzya kwiiya lusyomo lwakwe. Cibeela cakuti “Lugwalo Kuzwa . . . ” luyooamba zyakuluula zyabamisyinali abantu bamwi muzibeela ziindene-indene zyamunyika. “Nzyotwiiya Kuli Jesu” ziyootondezya njiisyo zyamu Bbaibbele munzila iitakatazyi.

Tusyoma kuti Ngazi Yamulindizi iyoozumanana kukkomanisya basikubala ibalemeka Bbaibbele alimwi ibayanda kuziba cini ncoliyiisya. Tusyoma kuti magazini eeyi iyoomugwasya kumana nyota yakasimpe kamu Bbaibbele.

BASIKUMWAYA

Bupanduluzi buyungizidwe