Kucinca Kukkomanisya Kujatikizya Ngazi Yamulindizi!
1 Kumatalikilo aamwaka uuno, mbungano zyakatambula cakwaambilizya cikkomanisya kapati: Kutalikila mu January 2008, Ngazi Yamulindizi iyooba amamagazini aaindene obile, yomwe inooli yabanamaleya alimwi imwi inooli yabunyina bwesu bwa Bunakristo. Ambweni camugambya kuti: ‘Ino mamagazini aaya obile anooindene buti? Ino mbubotu nzi bwakuba amamagazini aaindene? Sena kuli zibeela zipya mumagazini mapya?’
2 Mboinooindene: Magazini yamumuunda inoozwa kwainda myezi yotatwe. Mucikozyanyo, January-March, nkokuti ziindi zyone mumwaka. Zibalo zyoonse mumagazini eeyi ziyoobambilwa kugwasya banamaleya. Magazini yakwiiya ilazumanana kuzwa alimwi inooambwa kuti Mmagazini Yazibalo Ziyiigwa, eelyo tainooabilwi mumulimo wamumuunda pe. Inoojisi zibalo ziyiigwa zyoonse ziyandika mumwezi omwe alimwi azibalo zyamukati zyalo zyeelela kapati ku Banakristo balyaabide. Magazini ya Ngazi Yamulindizi Yakwaabila Kubanamaleya tiinookkomanisyi buyo Bakamboni balikke pe, pele alimwi inookkomanisya kapati kubantu batali Bakamboni balo balisyoma Bbaibbele. Kulubazu lumwi, Awake! iyoozumanana kuba atwaambo tujatikizya bantu banji, kubikkilizya abaabo batasyomi zisyoma bamwi alimwi abaabo balyaamba kuba bacikombelo citali ca Bunakristo.
3 Bubotu: Mumagazini Yazibalo Ziyiigwa takukayandiki kupandulula mabala mbuli aakuti “painiya” munzila njobakonzya kumvwisya bantu batali Bakamboni. Alimwi magazini eeyi ilakonzya kuba atwaambo tugama buyo Bakamboni ba Jehova alimwi abasikwiiya Bbaibbele bayaambele kumuuya. Ino mbuti kujatikizya magazini Yakwaabila Kubanamaleya? Mbokunga twaambo tunooli mumagazini eeyi tunoolembelwa banamaleya, muntu uutali Kamboni weelede kuti kacikonzya kubala magazini yoonse. Nokuba boobo, Kamboni wa Jehova aumwi uyoogwasyigwa kapati kukubala magazini aimwi eeyi. Akaambo kakuti mwezi amwezi tunooabila buyo Ngazi Yamulindizi yomwe alimwi a Awake! yomwe mumulimo wamumuunda, mumwezi oonse tuyooba anzila zigwasya zyakwaabila magazini.
4 Zibeela Zipya: Kuli zibeela zipya ziyeeyelwa kunoobikkwa mumagazini ya Ngazi Yamulindizi Yakwaabila Kubanamaleya. Cibeela cimwi cinoobandika njiisyo zyamu Magwalo zyantalisyo munzila iitakatazi kumvwa. Cibeela cimbi ciyootondezya Bbaibbele mbolikonzya kugwasya mikwasyi. Kuyoobikkwa zibalo zyaciiyo camu Bbaibbele zinoobambilwa bana. Magazini aimwi iyooba acibalo cinoopandulula zibalo zyamu Bbaibbele zigaminina zyalo zituyiisya kujatikizya bube bwa Jehova.
5 Tupailila kuti Jehova uyoobulongezya kapati bubambe oobu bupya bwa Ngazi Yamulindizi. Magazini eeyo, antoomwe a Awake!, azitugwasye kukambauka makani mabotu kubantu banji beelela.—Mt. 10:11.