Ngazi Yamulindizi Mpya Alimwi Nguba-uba
TULIKKOMENE kwaambilizya kuti kwamwaka omwe, kutalikila aa Ngazi Yamulindizi eeyi, amwezi kunoomwaigwa mamagazini obilo aa Cingisi, inguba-uba ayeeyo iimwaigwa lyoonse. Inoojisi zibalo zyakwiiya azibalo zimwi buyo kuti naa kwacaala busena. Tusyoma kuti eeci ciyakubagwasya Bakamboni ba Jehova banji kumuuya. Nkaambo nzi ncocili boobo?
Cingisi ngomwaambo uubelesyegwa abakwesu muzisi mbuli Fiji, Ghana, Kenya, Liberia, Nigeria, Papua New Guinea alimwi a Solomon Islands. Nokuba kuti bakwesu muzisi eezyi babelesya myaambo yamucisi mweena, ziindi zinji babelesya Cingisi nibali amiswaangano yambungano alimwi amumulimo wamumuunda. Nokuba boobo, mwaambo wa Cingisi ngobabelesya muuba-uba kwiinda ngotubelesya mumabbuku eesu. Kuyungizya waawo, kuli bantu ba Jehova bamwi bakalongela kuzisi nkobeelede kubelesya mwaambo wa Cingisi nokuba kuti mwaambo ooyu tabauzyi kabotu. Alimwi tabakonzyi kujanika kumiswaangano yambungano iicitwa mumwaambo wabo.
Zibalo nzyotwiiya nsondo ansondo mu Ciiyo ca Ngazi Yamulindizi nenzila iibelesyegwa kapati mukwaabila zilyo zyakumuuya aciindi ceelede. Aboobo kutegwa boonse ibajanika bagwasyigwe kapati acibeela eeci, magazini yamu Cingisi citakatazyi iibelesya mabala mauba-uba. Magazini mpya eeyi inoojisi civwumbyo cilibedelede. Tutwe tusyoonto twamakani, mincali, mibuzyo yakwiinduluka alimwi azifwanikisyo muzibalo zyakwiiya zinookozyene azyeezyo zili mumagazini yalyoonse. Aboobo, boonse balakonzya kutobelezya akutola lubazu mu Ciiyo ca Ngazi Yamulindizi kufwumbwa magazini njobajisi. Kutegwa mubone lwiindano luliko aakati kamamagazini obilo aa Cingisi, amubone cikozyanyo citondezyedwe aansi aawa cizwa mumuncali wabili mucibalo cakwiiya cakusaanguna mumagazini eeyi.
Tusyoma kuti bubambe bupya oobu buyoogwasya banji ibalomba Jehova kuti: “Undipe busongo bwakwiiya malailile aako.” (Int. 119:73) Tusyoma kuti aabo batauzyi kabotu mwaambo wa Cingisi, antoomwe abana baambaula Cingisi, banoocikonzya kulibambila kabotu Ciiyo ca Ngazi Yamulindizi nsondo ansondo. Tulamulumba Jehova akaambo kakuti ‘ulabayanda babunyina’ ubelesya “muzike musyomesi uucenjede” kwaabila zilyo zyakumuuya zinji.—1 Pe. 2:17; Mt. 24:45.
Kabunga Keendelezya ka Bakamboni ba Jehova