Ngazi Yamulindizi Yakwiiya Impya
IMAGAZINI njomubala njakusaanguna mukumwaigwa kwa Ngazi Yamulindizi yakwiiya. Tuyanda kumupandulwida zibeela zimwi zipya zyamagazini eeyi.
Imagazini yakwiiya imwailwa Bakamboni ba Jehova abasikwiiya Bbaibbele bayaambele. Inoomwaigwa ciindi comwe amwezi alimwi inoojisi zibalo zyakwiiya zyone naa zyosanwe. Imulongo noziya kuyiigwa zibalo eezi ulilembedwe acivwumbyo camagazini. Mukwiimpana amagazini ya Ngazi Yamulindizi yakubuleya, imagazini yakwiiya tiinoojisi zivwumbyo ziindene-indene mwezi amwezi akaambo kakuti tiinooabilwi mumulimo wamumuunda.
Aapeeji 2 mumagazini, kuli makani mafwaafwi aagwasya kupandulula mulimo wacibalo cakwiiya acimwi naa mulongo wazibalo eezyo zyoonse azibalo zimbi. Ibeendelezya Ciiyo ca Ngazi Yamulindizi bayoogwasigwa amakani aaya nobalibambila mubandi uugwasya wazibalo eezyo lyamiswaangano yambungano.
Mulabona kuti izibalo zyakwiiya zyafwiinsigwa asyoonto kwiinda mbozyakabede musyule. Akaambo kaceeci, kunooli ciindi cinji cakubandika magwalo aajisi twaambo tupati lya Ciiyo ca Ngazi Yamulindizi. Twamukulwaizya kapati kuti kamubala magwalo aabikkidwe oonse nsondo ansondo. Imagwalo amwi alembedwe kuti “amubale,” aboobo aaya ayelede kubalwa akubandikwa lya Ciiyo ca Ngazi Yamulindizi. Imagwalo aambi alakonzya kubalwa aalo ikuti ciindi kaciliko. Muzibalo zimwi, muyoojana magwalo aalembedwe kuti “amweezyanisye.” Mbwaanga magwalo aayo taabandiki twaambo tupati-pati tuli mumuncali, bunji bwaziindi taanoobalwi pe lyamiswaangano yambungano. Pele magwalo aayo aalembedwe kuti “amweezyanisye” ajisi makani aambi aagwasya, naa munzila imwi alakonzya kusinizya twaambo tubandikwa. Tumukulwaizya kuti kamwaabala nomulibambila Ciiyo ca Ngazi Yamulindizi. Ambweni mulakonzya kwaamba zili mumo nomwiingula.
Ilipooti yamwaka tiicinoomwaigwi mu Ngazi Yamulindizi. Kutalikila mu 2008, inoomwaigwa mu Mulimo Wesu wa Bwami kalili pepa lyamukati alimwi amu Yearbook. Nokuba boobo, mbubwenya mbotwaamba atala aawa, imagazini yakwiiya ilijisi azibalo zimbi. Nokuba kuti izinji akati kazeezi tazikabandikwi kumiswaangano yambungano, mukulwaizigwa kuzibala cakusitikila. Azyalo zijisi cakulya cakumuuya cizwa ‘kumuzike musyomesi uucenjede.’—Mt. 24:45-47.
Camamanino, imagazini ya Ngazi Yamulindizi yakwiiya alimwi ayakumwaya kubuleya taali mamagazini obile aayindene pe. Oonse ajisi zina lyomwe lyakuti Ngazi Yamulindizi Yaambilizya Bwami bwa Jehova. Aapeeji 2 ajisi twaambo tukozyenye mumincali iipandulula mulimo wa Ngazi Yamulindizi. Oonse obile anooliko mubbuku lyamamagazini limwaigwa amwaka. Alimwi makani aali mumamagazini oonse obile ayoobikkilizigwa mucibalo cinoomwaigwa mumagazini yakwiiya cakuti “Sena Muciyeeyede?”
Kuzwa mu 1879, mube mumyaka yankondo, myaka yabucete ayakupenzegwa, cakusyomeka imagazini ya Ngazi Yamulindizi yali kwaambilizya makani aakasimpe ka Bwami bwa Leza. Tupailila kuti kwiinda muzilongezyo zya Jehova, ilazumanana kucita oobo mububambe oobu bupya. Alimwi tupailila kuti Jehova amulongezye nywebo nobasikubala, mbomubelesya magazini ya Ngazi Yamulindizi yakwiiya eeyi mpya ikuligwasya nobeni.