Amuzumanane ‘Kuzyala Micelo Minjiminji’
1 Kwiinda mukubelesya mabala aacikozyanyo, Jesu wakalikozyanisya kuba mbuli cisiko cini camusaansa, Bawisyi mbuli Mukamwini muunda, abasikumutobela bakwe bananikidwe amuuya wakabakozyanisya kumitabi yamusaansa. Kapandulula mulimo ngwacita Mukamwini muunda, Jesu wakakankaizya mbociyandika kunamatila kapati kumusaansa. (Joh. 15:1-4) Ncotwiiya ncakuti muntu oonse uujisi cilongwe ciyumu a Jehova weelede kuba mbuli mutabi uuzyala micelo ‘iwacisiko cini camusaansa,’ Jesu Kristo. Tweelede kuzumanana kuzyala “micelo ya-Muuya” alimwi amicelo ya Bwami.—Gal. 5:22, 23; Mt. 24:14; 28:19, 20.
2 Micelo Yamuuya: Kuyaambele nkotucita kumuuya kulakonzya kubonwa kweelana ambotutondezya micelo yamuuya. Sena mulasoleka kuba amicelo yamuuya wa Leza kwiinda mukubala alimwi akuzinzibala kuyeeya a Jwi lya Leza lyoonse? (Flp. 1:9-11) Mutawayiwayi kulomba muuya uusalala kwiinda mumupailo, walo uukonzya kumupa bube bulemeka Jehova alimwi uukonzya kumugwasya kuzumanana kuyaambele kumuuya.—Lk. 11:13; Joh. 13:35.
3 Kuba amicelo yamuuya alimwi kuyootugwasya kuba babelesi basungu. Mucikozyanyo, luyando alusyomo zitupa kuzandula ciindi cakutola lubazu mumulimo lyoonse. Bube mbuli luumuno, busicamba, buuya, lubombo, alimwi akulyeendelezya bulatugwasya kutakazyanya abasikutukazya. Lukkomano lutupa kukkutila mumulimo nociba ciindi bantu nobatabikkili maanu.
4 Micelo ya Bwami: Alimwi tulayanda kuzyala micelo ya Bwami. Eeco cibikkilizya kupa “cipaizyo cakulumba, nkokuti micelo yamilomo iilumba izina [lya Jehova.]” (Heb. 13:15) Tulacita oobu kwiinda mukwaambilizya makani mabotu cabusungu alimwi cakutazungaana. Sena mulasoleka kuzyala micelo ya Bwami kwiinda mukuyaambele mumulimo wanu?
5 Jesu wakatondezya kuti basikumutobela bakwe basyomeka bakali kuyoozyala micelo iiteelene kuvwula. (Mt. 13:23) Aboobo, tatweelede kulyeezyanisya aabamwi pele tweelede kubelekela Jehova kweelena ambotukonzya. (Gal. 6:4) Kulilingula camoyo oonse kujatikizya bukkale bwesu kwiinda mukubelesya Jwi lya Leza kuyootugwasya kuzumanana kumulemeka Jehova kwiinda ‘mukuzyala micelo minjiminji.’—Joh. 15:8.