Tulaikkomanina Milimo Njotujisi!
1 Kuzwa ciindi bantu nobakatalika kupona, Jehova wabapa zyoolwe zinji ziindene-indene babelesi bakwe. Wabapa zyoolwe kufumbwa naa mbaalumi naa mbanakazi, myaka njobajisi, naa bali mubukkale buli buti naa musyobo. (Lk. 1:41, 42; Inc. 7:46; Flp. 1:29) Ino nzyoolwe nzi nzyatupa mazuba aano?
2 Zyoolwe Zimwi Nzyotujisi: Tulijisi coolwe cakuyiisyigwa a Jehova. (Mt. 13:11, 15) Kutembaula Jehova kwiinda mukwiingula lyamiswaangano ncoolwe acimbi ncotukkomanina. (Int. 35:18) Twapegwa nzyoolwe zyakwiingula, tulacita oobo cakusungwaala. Mbubwenya buyo, ikuti katubona mulimo aumwi mumbungano kuba coolwe, tuyoouzuzikizya kusikila mpozigolela nguzu zyesu. Sena tulatola lubazu lyoonse mumulimo wakusalazya Ŋanda ya Bwami akwiibamba kabotu?
3 Nokuba kuti tuulunzuma twabantu tabazi naa mipailo yabo ilamvwugwa a Leza, tujisi coolwe cakuti mipailo yesu ilamvwugwa amuntu uuyandika kapati alimwi uulemekwa mububumbo boonse. (Tus. 15:29) Jehova kumugama ulaswiilila mipailo yababelesi bakwe. (1 Pet. 3:12) Tatwaambili mpotweelede kugolela, naa ziindi zyongaye nzyotweelede kupaila kulinguwe. Elo tulacikkomanina coolwe ncotujisi cakukonzya kupaila “lyoonse”!—Ef. 6:18.
4 “Basimilimonyina Leza”: Coolwe cipati ncotujisi ncakukambauka makani mabotu aa Bwami bwa Leza katuli “basimilimonyina Leza.” (1 Kor. 3:9) Ooyu mmulimo uutupa kukkomana akukatalusyigwa. (Joh. 4:34) Jehova tayandiki kubelesya bantu kutegwa azuzikizye mulimo ooyu, pele watupa mulimo ooyu kutondezya kuti ulatuyanda. (Lk. 19:39, 40) Kwiinda mukucita boobo, Jehova tanaapa coolwe eeci kubantu buyo bali boonse. Aabo batola lubazu mumulimo wabuleya beelede kuzuzikizya zyeelelo zimwi zyakumuuya. (Is. 52:11) Sena tulatondezya kuti tulacikkomanina coolwe eeci kwiinda mukubona mulimo kuti ulayandika muzintu nzyotucita nsondo ansondo?
5 Zyoolwe zizwa kuli Jehova zipa kuti buumi bwesu kabukkomanisya. (Tus. 10:22) Tatweelede kuzyuubya-ubya. Kwiinda mukutondezya kuti masimpe tulaukkomanina mulimo, tukkomanisya Taata wesu wakujulu, Sikupa “zipego zibotu zyoonse azyoolwe zyoonse zilondokede.”—Jak. 1:17.