Lugwalo Luzwa Ku Kabunga Keendelezya

Nomuyandwa Nobasikumwayama ba Makani Mabotu:

Eelo kaka tulijisi coolwe cipati cakukamantana mukukomba Leza mwini-mwini uuli alikke, Jehova! Tuli “basimilimonyina” anguwe, aabo ibakapegwa mulimo uusetekene alimwi wakufwutula bantu, imulimo wakukambauka akuyiisya bantu makani mabotu aa Bwami bwakwe ibulela. (1Kor. 3:9; Mt. 28:19, 20) Ikutegwa mulimo ooyu wanyika yoonse ubelekwe kabotu muluumuno alimwi alukamantano, tweelede kubelekelaamwi.—1Kor. 14:40.

Ibbuku eeli lilamugwasya kumvwisya mboibeleka mbungano ya Banakristo mazuba aano. Lyaamba milimo alimwi amikuli njomujisi mbomuli umwi wa Bakamboni ba Jehova. Ikuti naa mwaibikkila maano milimo njomujisi akuzuzikizya mikuli yanu, mulazumanana “kuyumizyigwa mulusyomo.”—Mil. 16:4, 5; Gal. 6:5.

Aboobo, tumukulwaizya kuti mulibale cakulomya bbuku eeli. Amubone mbomukonzya kwaatobela mubuumi bwanu malailile aali mubbuku eeli. Mucikozyanyo, ikuti mwakazwa akuba sikumwaya uutabbapatizyidwe, ino nintaamu nzi nzyomweelede kubweza kutegwa mubbapatizyigwe kamuli umwi wa Bakamboni ba Jehova? Kulubazu lumwi, ikuti naa mulibbapatizyidwe kale, ino ncinzi ncomukonzya kucita kutegwa mukomene kumuuya alimwi akuyungizya mulimo wanu ngomucitila Jehova? (1Tim. 4:15) Mbuti mbomukonzya kupa kuti luumuno luzumanane kuba mumbungano? (2Kor. 13:11) Amujane bwiinguzi bwamibuzyo eeyi mubbuku eeli.

Ikuti naa muli mukwesu uubbapatizyidwe, ncinzi ncomukonzya kucita kutegwa mweelele kuba mukutausi mpoonya kumbele mukeelele kuba mwaalu? Mbwaanga bantu banji baluujisi kuboola mumbunga ya Leza, kuyandika bakwesu banji ibeelela kutegwa basololele. Bbuku eeli lilamugwasya kuzyiba cijatikizyidwe ‘mukuyanda’ kusika aambaakani eezyi zyakumuuya.—1Tim. 3:1.

Camoyo woonse tupailila kuti bbuku eeli limugwasye kubona mulimo ngomujisi mububambe bwa Jehova alimwi akuubikkila maano. Tulamuyanda kapati nyoonse alimwi lyoonse tupailila kuti mukabe akati kabaabo ibakkomana kukomba Taateesu wakujulu, Jehova, lyoonse mane kukabe kutamani.—Int. 37:10, 11; Is. 65:21-25.