Nobakubusi, Sena Mulasoleka Kusika Azyeelelo?
1. Ino ndiilili mukwesu uucili mukubusi nayelede kutalika kubelesya busolozi bujanika mulugwalo lwa 1 Timoteyo 3:1?
1 “Ikuti naa muntu kayanda mulimo . . . , uyanda mulimo mubotu.” (1 Ti. 3:1) Majwi aaya aakasololelwa amuuya akulwaizya bakwesu kusika azyeelelo kutegwa beelele kupegwa mikuli mumbungano. Sena mweelede kuti kamuli bapati kutegwa mucite oobo? Cilayandika kutalika kusika azyeelelo ciindi nomucili bakubusi. Kwiinda mukucita boobo mulakonzya kuyiisyigwa alimwi akutondezya kuti muleelela kusalwa kuba mukutausi ciindi mwaakukomena. (1 Ti. 3:10) Ikuti naa muli mukubusi uubbapatizyidwe, ncinzi ncomweelede kucita kutegwa musike azyeelelo?
2. Mbuti mbomukonzya kuba amuuya wakulyaaba alimwi ino inga mwautondezya buti?
2 Kulyaaba: Kamuyeeya kuti muyanda kusika azyeelelo kutegwa mubeleke mulimo mubotu, kutali kuba azyina lyabulemu. Aboobo, amube aaluyandisisyo lwakugwasya bakwesu abacizyi. Nzila imwi mbomukonzya kucita oobo nkwiinda mukuzinzibala kuyeeya cikozyanyo cibotu ca Jesu. (Mt. 20:28; Joh. 4:6, 7; 13:4, 5) Amumulombe Jehova kuti amugwasye kubabikkila maano bantu. (1 Ko. 10:24) Sena inga mwabagwasya kumubili aabo bali mumbungano ibacembeede naa baciswa-ciswa? Sena mulagwasyilizya kukwapa bwizu, kukukula, naa kucita milimo imwi yakusalazya Ŋanda ya Bwami? Sena mulagwasyilizya kupa makani aacibukila mbuta mu Cikolo Camulimo Weendelezyegwa a Leza? Muyoojana kuti kulyaaba kwanu kubelekela bamwi kuyoomuletela lukkomano.—Mil. 20:35.
3. Ino kusima kumuuya kuyandika kapati buti, alimwi ino inga mwacita buti kutegwa musime kumuuya?
3 Kusima Kumuuya: Cilayandika kapati kuti mubelesi mumbungano kali muntu uusimide kumuuya muciindi cakuba muntu uucizyi kucita zyintu zimwi zyaalubazu naa kuba aluzyibo lwakuzyalwa andulo. Muntu uusimide kumuuya ulasola kulanga zyintu mbuli mbwazilanga Jehova alimwi a Jesu. (1 Ko. 2:15, 16) Ulatondezya “mucelo wamuuya.” (Gal. 5:22, 23) Mukambausi musungu uubikka zyintu zya Bwami mubusena bwakusaanguna. (Mt. 6:33) Mulakonzya kuba abube bwakumuuya kwiinda mukuba acilengwa cibotu cakucita ciiyo canu nobeni. Eeci cibikkilizya kubala Bbaibbele buzuba abuzuba, kubala mamagazini aa Ngazi Yamulindizi alimwi a Sinsimuka!, kulibambila miswaangano alimwi akujanika kumiswaangano. (Int. 1:1, 2; Heb. 10:24, 25) Ciindi naakali kukulwaizya mukubusi Timoteo kuti ayaambele kumuuya, Paulo wakalemba kuti: “Kolibamba lyoonse omwini akubikkila maano kapati kukuyiisya kwako.” (1 Ti. 4:15, 16) Aboobo kamulibambila kabotu makani aanu aamu Cikolo Camulimo Weendelezyegwa a Leza. Kamulibambila kamutanaunka mumulimo wakukambauka, alimwi kamutola lubazu lyoonse. Amulibikkile mbaakani zyakumuuya alimwi akusoleka kuzizuzikizya, mbaakani mbuli kucita bupainiya, mulimo waku Bbeteli, naa kuyoonjila Cikolo Cakwiiya Bbaibbele ca Bakwesu Batakwete. Kusima kumuuya kuyoomugwasya ‘kuzitija zisusi zyabukubusi.’—2 Ti. 2:22.
4. Ino kusyomeka kuyandika kapati buti?
4 Kusyomeka: Akaambo kakuti bakwesu ibakapedwe mulimo wakwaabila cakulya ku Banakristo bakabulide bamumwaanda wamyaka wakusaanguna bakali “ampuwo mbotu,” bakali kusyomeka, baapostolo tiibakali kulibilika kujatikizya mulimo kuti naa ulacitwa. Eeci cakabapa kuti babikkile maano kumakani aamwi aayandika kapati. (Mil. 6:1-4) Aboobo, ciindi nomwapegwa mulimo mumbungano, amuubeleke kabotu kusikila mpomugolela. Amwiiye Nowa, iwakatobela kabotu-kabotu malailile ngaakapedwe aakuyaka bwato. (Matl. 6:22) Kusyomeka ulakukkomanina kapati Jehova alimwi citondezya kusima kumuuya.—1 Ko. 4:2; amubone kabbokesi kajisi mutwe wakuti “Bubotu Bwakuyiisyigwa.”
5. Nkaambo nzi bakwesu ncobeelede kusika azyeelelo?
5 Mbubwenya mbuli mbokwakasinsimwa, Jehova uli mukucita mulimo wakuyobolola cakufwambaana. (Is. 60:22) Mwaka amwaka kulabbapatizyigwa bantu babalilwa ku 250, 000. Akaambo kabantu banji boobu bapya ibaboola mukasimpe, kuyandika baalumi beelela basimide kutegwa kabalanganya mikuli yambungano. Lino, kwiinda lyoonse, kuli milimo minji iiyandika kucitwa mumulimo wa Jehova. (1 Ko. 15:58) Nobakubusi, sena mulasoleka kusika azyeelelo? Kuti kacili boobo, muyanda mulimo mubotu kapati!
[Majwi aakwelelezya sikubala aali apeeji 2]
Akaambo kabantu banji boobu bapya ibaboola mukasimpe, kuyandika baalumi beelela basimide kutegwa kabalanganya mikuli yambungano
[Kabbokesi kali apeeji 3]
Bubotu Bwakuyiisyigwa
Bakwesu bakubusi beelela balagwasyigwa ciindi baalu nobabapa milimo alimwi akubayiisya. Mulangizi wabbazu wakalikkede kucibumbili kakulwaizya sikumwaya ciindi nowakamana muswaangano. Wakabona mukwesu muniini kaimvwi munsi lyakwe, mpoonya wakamubuzya kuti naa wakali kuyanda kubandika anguwe. Mukwesu wakaingula kuti wakapedwe mulimo wakukukula acibumbili wamana muswaangano umwi aumwi. Bazyali bakwe bakali kuyanda kuunka, pele walo taakali kuyanda kuunka katanacita mulimo wakwe. Calukkomano, mulangizi wabbazu wakaswena kumbali. Mulangizi wabbazu wakaamba kuti: “Baalu bamumbungano eeyi bakali kubikkila maano kuyiisya bakwesu bacili baniini kwiinda mukubapa milimo mumbungano. Akaambo kaceeci, tiicakali ceenzu kuli mbabo kulumbaizya mukwesu uucili muniini kuti abe mukutausi ciindi nindakali kuswaya mbungano.”