Bakutausi Bacita Mulimo Uuyandika Kapati

KUMBUNGANO yaku Filipi, imwaapostolo Paulo wakalemba kuti: “Ndime Paulo nendili antoomwe a Timoteyo, tobazike ba Kristo Jesu, nendilembela basalali boonse ibakamantene a Kristo Jesu ibali mu Filipi, kubikkilizya abalangizi alimwi abakutausi.” (Flp. 1:1) Amubone kuti wakabaanzya bakutausi. Cakutadooneka baalumi aaba bakali kucita mulimo uuyandika kapati mukugwasyilizya baalu mumbungano kuciindi eeco. Ncimwi buyo amazuba aano. Bakutausi bacita milimo iigwasya balangizi alimwi iipa kuti zintu kazyeenda kabotu mumbungano.

² Sena mulibazyi bakutausi ibali mumbungano yanu? Sena muliizyi milimo njobacita ikugwasya ndinywe alimwi ambungano yoonse? Masimpe Jehova ulalumba akaambo kamilimo njobacita baalumi aaba. Paulo wakalemba kuti: “Bantu aabo ibabeleka kabotu balijanina mpuwo mbotu alimwi balakonzya kwaamba cakutayoowa abuniini kujatikizya lusyomo lwabo muli Kristo Jesu.”—1Tim. 3:13.

ZYEELELO ZYAMU MAGWALO ZYABAKUTAUSI

³ Ibakutausi beelede kuti kabapona buumi buli kabotu bwa Bunakristo, kabali baalumi basyomeka, alimwi ibailanganya kabotu milimo yabo. Eeci cilalibonya twalanga nzyaakaamba Paulo mulugwalo ndwaakalembela Timoteyo kujatikizya zyeelelo zyabakutausi naakati: “Mbubonya buyo abalo bakutausi beelede kuba bantu basimide mumizeezo, ikutali basimilaka yobilo, ikutali banywa waini munji, ikutali bayanda kujana mpindu cabumpelenge, pele ibakakatila kumaseseke aa Leza aajatikizya lusyomo kabajisi manjezyeezya aasalala. Alimwi, aaba beelede kusaanguna kusolwa naa baleelela; nomuya mubalekele kubeleka mulimo wabukutausi, mbwaanga tabajisi butongo. Bakutausi beelede kuba balumi bakwete mukaintu omwe, ibeendelezya kabotu bana babo alimwi abamumaanda aabo beni.” (1Tim. 3:8-10, 12) Ikukakatila kuzyeelelo zisumpukide nzyobabikkilidwe bakutausi kukwabilila mbungano kutegwa kutabi muntu wiitongooka akaambo kabaalumi ibasalwa kupegwa mikuli iilibedelede.

⁴ Kufwumbwa naa mbana naa mbapati kumyaka yakuzyalwa, bakutausi mbasungu mumulimo wamumuunda mwezi amwezi. Kwiinda mukutobela cikozyanyo ca Jesu, balatondezya busungu mumulimo wakukambauka. Kwiinda mubusungu oobu, batondezya luyandisisyo ndwajisi Jehova lwakufwutula bantu.—Is. 9:7.

⁵ Alimwi bakutausi mbaalumi ibapa cikozyanyo cibotu mukusama, mukulibamba, mukwaambaula, mukuyeeya alimwi amukulilemeka. Balalibatamika naa kuti mbantu bayeeya kabotu, calo icipa kuti bantu kababalemeka. Kuyungizya waawo, balacibikkila maano kapati cilongwe ncobajisi a Jehova alimwi amikuli njobajisi mumbungano.—Tit. 2:2, 6-8.

⁶ Baalumi aaba ‘bakasaanguna kusolwa naa baleelela.’ Noliba leelyo nobatakaningasalwa, bakatondezya kuti mbaalumi ibalyaabide ncobeni. Bakatondezya kuti babikka zintu zya Bwami kumbele mubuumi bwabo alimwi balayanda kusika azyeelelo zyakupegwa mulimo uuli woonse ngobakonzya kupegwa. Masimpe baalumi aaba nzikozyanyo zibotu nzyobakonzya kutobela bamwi mumbungano.—1Tim. 3:10.

MILIMO NJOBACITA

⁷ Bakutausi bacita milimo iisiyene-siyene mukugwasya bakwesu abacizyi, aboobo munzila eeyi, bagwasya balangizi kuba aciindi cinji cakulanganya mikuli yakuyiisya alimwi akweembela. Ciindi nokapa bakutausi milimo, kabunga kabaalu kalabona nzyakonzya kucita mukutausi umwi aumwi alimwi azintu ziyandika mumbungano.

⁸ Njeeyi milimo imwi njobacita: Mukutausi umwi ulakonzya kupegwa mulimo wakulanganya mabbuku, ikutugwasya kujana mabbuku aakubelesya tobeni alimwi aakubelesya mumulimo wamumuunda. Bamwi balakonzya kupegwa mulimo wakubamba malekkoodi aankomwe yamali yambungano naa aacilawo. Bambi balakonzya kupegwa mulimo wakulanganya mamaikkulofooni, kulanganya mincini yazyaambaudo, ikuba basikugwasyilizya, alimwi akugwasya baalu munzila zimbi buyo. Kuli milimo minji yeelede kucitwa mukubamba Ŋanda ya Bwami alimwi akwiisalazya, aboobo bakutausi kanji-kanji balalombwa kuti bagwasyilizye kulanganya mikuli eeyi.

⁹ Mumbungano zimwi, cilakonzyeka kupa milimo eeyi kumukutausi omwe-omwe. Mumbungano zimbi, mukutausi omwe ulakonzya kulanganya milimo iili mbwiibede. Zimwi ziindi, bakutausi bobilo naa kwiinda waawo balakonzya kulanganya mulimo omwe. Ikuti kakutakwe bakutausi banji ibakonzya kulanganya mikuli imwi aali yeeyi, kabunga kabaalu kalakonzya kusala bakwesu abambi babbapatizyidwe ibalaampuwo mbotu kuti bagwasyilizye mukulanganya milimo eeyi iiyandika. Munzila eeyi bakwesu aaba balakonzya kuba aluzyibo iluyoobagwasya kumbele baakweelela kusalwa kuba bakutausi. Ikuti kakutakwe bakwesu, bacizyi ibalaampuwo mbotu balakonzya kulombwa kuti bagwasyilizye muzintu zimwi, nokuba kuti tabasalwi kuba bakutausi. Muntu uulaampuwo mbotu ngooyo uulilemeka kabotu alimwi uukomba Leza munzila yakuti bamwi inga bayanda kutobela cikozyanyo cakwe cibotu. Upa cikozyanyo cibotu caboola kumakani aakujanika kumiswaangano, kutola lubazu mumulimo wakukambauka, buumi bwamukwasyi wakwe, zyakulikondelezya nzyasala, nsamino yakwe, mbwalibamba alimwi amuzintu zimwi buyo.

¹⁰ Mumbungano imuli baalu basyoonto kapati, bakutausi ibeelela balakonzya kutumwa kwiinduluka mibuzyo abaabo bayanda kubbapatizyigwa yalo iijatikizya njiisyo zyabukombi. Mibuzyo eeyi ili mu Makani Aayungizyidwe, “Cibeela 1: Njiisyo zya Bunakristo.” Mbokunga “Cibeela 2: Kupona Buumi bwa Bunakristo” cijatikizya makani aamaseseke aajatikizya muntu umwi aumwi, mwaalu nguweelede kulanganya cibeela eeci.

¹¹ Ciindi aciindi, ikuti kwayandika kucita boobo, kabunga kabaalu kalakonzya kubona kuti inga cainda kugwasya ikubacinca milimo njobacita bakutausi. Nokuba boobo, cilagwasya kapati ikubaleka bakwesu kuzumanana kulanganya mulimo ngweenya kwaciindi cili mbocibede kutegwa bauzyibe kabotu.

¹² Kweelana abukkale bwambungano imwi aimwi, kulakonzya kuba milimo imwi iinga yapegwa bakutausi aabo ibanga kuyaambele kwabo ‘kulalibonya kubantu boonse.’ (1Tim. 4:15) Kuti kakutakwe baalu banji mumbungano, mukutausi ulakonzya kupegwa mukuli wakuti abe sikugwasyilizya mulangizi wakabunga, naa mubukkale bumwi, ulakonzya kuba mubelesi wakabunga, akubeleka kwiinda mukulangwa abaalu. Bakutausi balakonzya kupegwa makani mu Muswaangano Wabuumi Amulimo, ikuti kakuyandika balakonzya kupegwa amukuli wakweendelezya Ciiyo ca Bbaibbele Cambungano, alimwi akwaamba makani aabuleya. Mikuli imbi ilakonzya kupegwa kubakutausi nokuyandika kucita boobo alimwi ikuti kabasika azyeelelo zyamilimo eeyo. (1Pet. 4:10) Nobagwasya baalu, bakutausi beelede kulipa camoyo woonse.

¹³ Nokuba kuti mulimo wabo uliindene amulimo wabaalu, ncimwi buyo mulimo wabo awalo ulisetekene kuli Leza alimwi ulayandika kapati mukupa kuti zintu kazyeenda kabotu mumbungano. Mukuya kwaciindi, ikuti bakutausi bailanganya kabotu mikuli yabo alimwi ikuti basika azyeelelo zyakuba beembezi alimwi abamayi, balakonzya kulumbaizyigwa kuti basalwe kuba baalu.

¹⁴ Ikuti muli mukwesu imukubusi naa iwakabbapatizyigwa caino-ino, sena mulasoleka kuti musike azyeelelo zyakuba mukutausi? (1Tim. 3:1) Mbokunga mbanji kapati bantu baboola mukasimpe mwaka amwaka, kuyandika baalumi beelela ibasimide kumuuya ibakonzya kulanganya mikuli mumbungano. Mulakonzya kusika azyeelelo zyakuba mukutausi kwiinda mukusoleka kuba bantu ibayanda kugwasya bamwi. Nzila imwi mbomukonzya kucita boobo nkwiinda mukuzinzibala kuyeeya cikozyanyo cibotu ca Jesu. (Mt. 20:28; Joh. 4:6, 7; 13:4, 5) Ciindi nomujana lukkomano akaambo kakupa bamwi, ciyakumupa kuyandisisya kugwasya bamwi. (Mil. 20:35) Aboobo, amulyaabe kugwasya bamwi ibayandika lugwasyo, amulisungule kugwasyilizya mukubamba Ŋanda ya Bwami, naa kupa makani mu Muswaangano Wabuumi Amulimo ciindi mukamwini makani natako. Alimwi ikuyanda kusika azyeelelo zyakuba mukutausi cibikkilizya kuba abube mbwayanda Leza kwiinda mukuba abubambe bubotu bwakwiiya Bbaibbele nobeni. (Int. 1:1, 2; Gal. 5:22, 23) Kuyungizya waawo, mukwesu uuyanda kusika azyeelelo zyakuba mukutausi weelede kutondezya kuti ulasyomeka alimwi ulalangilwa kwiizuzikizya milimo njapedwe mumbungano.—1Kor. 4:2.

¹⁵ Bakutausi balasalwa amuuya uusalala kutegwa bagwasye mbungano. Boonse mumbungano balakonzya kutondezya kuti balalumba akaambo kamulimo ngobabeleka canguzu bakutausi kwiinda mukubelekelaamwi ambabo ciindi nobalanganya milimo njobapedwe. Kwiinda mukucita boobo, imbungano iyootondezya kuti ilalumba akaambo kabubambe mbwabikkide Jehova kutegwa zintu kazyeenda kabotu mumukwasyi wakwe.—Gal. 6:10.