Amutondezye Kuti Mulabalumba Bamaalumi Basalidwe

1. Ino nzipego nzi zimwi nzyaakatupa Jesu?

KUNYINA muntunsi iwakagwasya bamwi kwiinda Jesu. Ciindi naakali anyika, camaleele wakabelesya nguzu zyakwe kugwasya bamwi. (Lk. 9:​12-17) Wakatupa cipego ciinda zyoonse kwiinda mukwaaba buumi bwakwe. (Joh. 15:13) Kuzwa naakabusyigwa, Jesu wazumanana kutugwasya. Mbubwenya mbwaakasyomezya, wakamulomba Jehova kuti atupe muuya wakwe uusalala kutegwa twiiye alimwi akuumbulizyigwa. (Joh. 14:​16, 17, bupanduluzi buyungizyidwe; 16:13) Alimwi kwiinda mumiswaangano yambungano, Jesu ulatupa zyoonse nzyotuyandika kutegwa tucikonzye kuyiisya bantu Bbaibbele munyika yoonse alimwi akubagwasya kuba basikwiiya.—Mt. 28:​18-20.

2. Ino mbaani ibaambwa kuti ‘nzipego mubantu’ kulugwalo lwa Baefeso 4:​7, 8?

² Kuli cipego acimbi Jesu ncaakatupa. Mwaapostolo Paulo wakalemba kuti ciindi Jesu naakaunka kujulu, “wakapa zipego mubantu.” (Amubale Baefeso 4:​7, 8.) Paulo wakapandulula kuti Jesu wakapa zipego eezyi kutegwa agwasye mbungano mumbazu ziindene-indene. (Ef. 1:​22, 23; 4:​11-13) Mazuba aano, eezyi “zipego mubantu” zibikkilizya bakutausi, baalu bamumbungano alimwi abalangizi bamabazu.a Bwini mbwakuti, bamaalumi aaba tabalondokede, aboobo balalubizya. (Jak. 3:2) Pele Mwami wesu Jesu Kristo ulababelesya bamaalumi aaba ibayandika kapati kutegwa batugwasye.

3. Amupe cikozyanyo icitondezya mbotukonzya kugwasyilizya milimo njobacita bamaalumi basalidwe.

³ Jesu wakapa “zipego mubantu” eezyi kutegwa mbungano kaiyumizyigwa. (Ef. 4:12) Pele toonse tulakonzya kubagwasya kuzuzikizya mukuli ooyu uuyandika kapati. Mucikozyanyo: Tobamwi tulatola lubazu mukuyaka Maanda aa Bwami. Bamwi balaugwasyilizya mulimo ooyu kwiinda mukupa zyakulya, zyakweendela alimwi azimwi buyo. Mbubwenya buyo, toonse tulakonzya kugwasyilizya ikusolekesya nkobacita bakutausi abaalu bambungano alimwi abalangizi bamabazu kwiinda muzintu nzyotwaamba alimwi akucita. Atulange-lange mbotukonzya kugwasyigwa kumilimo njobabeleka canguzu alimwi akubatondezya kuti tulabalumba balo a Jesu iwakatupa “zipego mubantu.”

BAKUTAUSI ‘BACITA MILIMO IIGWASYA’

4. Ino ‘milimo nzi imwi iigwasya’ njobakali kucita bakutausi mumwaanda wamyaka wakusaanguna?

⁴ Mumwaanda wamyaka wakusaanguna, bakwesu bamwi bakali kusalwa kuba bakutausi. (1Tim. 3:8) Kulibonya kuti mbambabo ‘ibakali kucita milimo iigwasya’ njaakalemba Paulo. (1Kor. 12:28) Aboobo kulangilwa kuti bakutausi bakali kucita milimo minji iigwasya kutegwa baalu babikkile maano kukuyiisya alimwi akunyendo zyabweembezi. Mucikozyanyo, kulibonya kuti bakutausi bakali kugwasyilizya kupanga makkopi aa Magwalo naa kuula zintu izyakali kubelesyegwa kupanga makkopi aaya.

5. Ino milimo nzi imwi iigwasya njobacita bakutausi mazuba aano?

⁵ Amuyeeye kujatikizya milimo imwi iiyandika kapati bakutausi njobacita mumbungano yanu. (1Pet. 4:10) Balakonzya kupegwa mukuli wakulanganya maakkaunti aambungano, zilawo, kooda mabbuku kutegwa kababelesya basikumwaya, kubelekela kuzyaambawido, kubeleka kabali basikugwasyilizya naa kugwasya kusalazya Ŋanda ya Bwami. Milimo yoonse eeyi ilayandika kutegwa zintu kazyeenda kabotu mumbungano. (1Kor. 14:40) Kuyungizya waawo, bakutausi bamwi balabelesyegwa muzibeela zya Muswaangano Wabuumi Amulimo alimwi akupa makani aabuleya. Mukutausi alimwi ulakonzya kusalwa kugwasyilizya mulangizi wakabunga. Zimwi ziindi, bakutausi beelela balakonzya kusangana baalu munyendo zyabweembezi.

6. Ntwaambo nzi tumwi itweelede kutupa kubalumba bakutausi?

⁶ Mbuti milimo njobabeleka bakutausi mboigwasya mbungano? Mucizyi Beberly,b waku Bolivia wakaamba kuti:“Ndilabalumba kapati bakutausi akaambo kamilimo njobacita calo cipa kuti kandiikkomanina miswaangano. Akaambo kamilimo yabo, ndilacikonzya kwiimba, kupa bwiinguzi, kuswiilila makani, kweebelela mavidiyo alimwi azifwanikiso. Balabikkila maano kubona kuti boonse aabo ibajanika kumuswaangano balikwabilidwe alimwi balabagwasya aabo ibatacikonzyi kujanika kumuswaangano wacigaminina kweebelela pulogilamu kabali mumaanda aabo. Wamana muswaangano, balasololela mukusalazya Ŋanda ya Bwami, kugwasyilizya kumaakkaunti alimwi akuba masimpe kuti mabbuku aayandika nkwaali. Eelo kaka ndilabalumba kapati!” Mucizyi Leslie uukkala ku Colombia wakaamba kuti: “Balumi bangu bayandika lugwasyo lwabakutausi kutegwa baizuzikizye mikuli yiindene-indene. Nokwanyina lugwasyo lwabo, balumi bangu nobajisi bubi kapati, aboobo ndilalumba kapati akaambo kabusungu bwabo alimwi akulyaaba kugwasya.” Toonse tulalumba kapati akaambo kamilimo njobacita bakutausi.—1Tim. 3:13.

7. Mbuti mbotukonzya kubalumba bakutausi? (Amubone acifwanikiso.)

⁷ Nokuba kuti tulalumba kapati akaambo kamilimo njobacita bakutausi, Bbaibbele alimwi litukulwaizya kuti tweelede kutondezya buya kuti tulalumba. (Kol. 3:15) Ba Kristofer, baalu ku Finland, bakatondezya kulumba kwiinda mukwaamba kuti, “Ndilamutumina kakkaadi naa kumulembela kagwalo kaafooni ikajisi lugwalo lwamu Bbaibbele alimwi ndilamwaambila cacigaminina mukutausi kujatikizya mbazu mwandikulwaizya naa kaambo ncondilumba kujatikizya milimo njacita.” Ba Pascal alimwi aba Jael, ibakkala ku New Caledonia, balabapailila cacigaminina bakutausi. Ba Pascal bapandulula kuti, “Caino-ino, twali kubapailila kapati bakutausi, kumulumba Jehova akaambo kambabo akumulomba kuti abe ambabo akubagwasya.” Jehova ulaimvwa mipailo iili boobu, alimwi akaambo kaceeci mbungano yoonse ilagwasyigwa.—2Kor. 1:11.

BAALU BAMBUNGANO “IBABELEKA CANGUZU AKATI KANU”

8. Nkaambo nzi Paulo ncaakalembela kuti baalu bamumwaanda wamyaka wakusaanguna bakali ‘kubeleka canguzu’? (1 Batesalonika 5:​12, 13)

⁸ Baalu bamumwaanda wamyaka wakusaanguna bakali kubeleka canguzu kujatikizya mbungano. (Amubale 1 Batesalonika 5:​12, 13; 1Tim. 5:17) Bakali ‘kweendelezya’ mbungano kwiinda mukusololela miswaangano alimwi akupanga zyakusala. Kunze lyaboobo, bakali ‘kubapa lulayo’ munzila yaluyando bakwesu abacizyi kutegwa bazumanane kuba alusyomo luyumu. (1Tes. 2:​11, 12; 2Tim. 4:2) Bamaalumi aaba, bakali kubeleka canguzu kutegwa bajane nzyobakali kuyandika banamukwasyi alimwi akulisanina kumuuya kutegwa kabajisi cilongwe ciyumu a Jehova.—1Tim. 3:​2, 4; Tit. 1:​6-9.

9. Ino milimo nzi imwi njobacita baalu mazuba aano?

⁹ Baalu bajisi bubi kapati mazuba aano, mbakambausi. (2Tim. 4:5) Bapa cikozyanyo cibotu kwiinda mukuba basungu mubukambausi, kubikka bubambe bwakukambauka mucilawo mobakkala, kutuyiisya mbotukonzya kukambauka alimwi akuba bamayi bacibwene. Alimwi balabeleka kabali babetesi basiluse ibatasalululi. Ciindi Munakristo naacita cibi cipati, baalu balamugwasya kutegwa abambulule cilongwe cakwe a Jehova. Aciindi nciconya, baba masimpe kuti mbungano yazumanana kusalala. (1Kor. 5:​12, 13; Gal. 6:1) Baalu bazyibidwe kuti mbeembezi. (1Pet. 5:​1-3) Balapa makani aayeeme aa Bbaibbele aakalibambilwa kabotu, balasolekesya kubazyiba boonse mumbungano alimwi akucita nyendo zyabweembezi. Kunze aamilimo iimbi njobabeleka baalu, bamwi balagwasyilizya mumulimo wakuyaka Maanda aa Bwami alimwi akubambulula, kupa kuti miswaangano yacooko kayeenda kabotu, kubeleka muma Kkomiti aa Hospital Liaison alimwi a Mutubunga Tuswaya Balwazi. Baalu balabeleka canguzu kutugwasya.

10. Ntwaambo nzi tumwi itutupa kubalumba kapati baalu babeleka canguzu?

¹⁰ Jehova wakasinsima kuti beembezi bayootulanganya kabotu alimwi akuti ‘kunyina notuyakuyoowa limbi pe, nokuba kuba abukandu.’ (Jer. 23:4) Oobu mbombubo mbwaakalimvwa mucizyi Johanna waku Finland, ciindi banyina nobakaciswa kapati. Wakaamba kuti: “Nokuba kuti tiicakali cuubauba kwaambila bamwi mbondakali kulimvwa, mwaalu ngondatakazyi kabotu wakandikkazikila moyo, kupaila andime alimwi akundaambila kuti Jehova ulandiyanda. Tandikonzyi kuziyeeya zyoonse zyaakaamba, pele ncondiyeeyede buyo ncakuti ndakalimvwa kabotu. Ndisyoma kuti Jehova ngonguwe iwakamutuma kulindime aciindi ceelede.” Ino baalu bamumbungano yanu bakamugwasya buti?

11. Mbuti mbotukonzya kutondezya kuti tulabalumba baalu? (Amubone acifwanikiso.)

¹¹ Jehova uyanda kuti katubalumba kapati baalu “akaambo kamulimo ngobacita.” (1Tes. 5:​12, 13) Mucizyi Henrietta, awalo uukkala ku Finland wakaamba kuti: “Baalu balabagwasya bamwi cakuliyandila, pele eeci tacaambi kuti balo bajisi ciindi cinji anguzu kwiinda bamwi alimwi akuti tabajisi mapenzi mubuumi bwabo. Zimwi ziindi inga ndibaambila buyo kuti: ‘Amuleke ndimwaambile kaambo aaka, muli mwaalu uuli kabotu. Ndiyanda kuti muzyibe oobo.’” Mucizyi Sera waku Türkiyec wakaamba kuti: “Baalu bayandika kukulwaizya kutegwa bazumanane kubeleka milimo yabo. Aboobo tulakonzya kubalembela kakkaadi, kubatamba kucakulya naa kubeleka ambabo mumulimo wamumuunda.” Sena kuli mwaalu ngomulumba kapati akaambo kakubeleka canguzu nkwacita mumbungano? Amumutondezye kuti mulamulumba akaambo kamilimo njacita.—1Kor. 16:18.

BALANGIZI BAMABAZU BALATUYUMYA

12. Mbubambe nzi bwakayumya mbungano mumwaanda wamyaka wakusaanguna? (1 Batesalonika 2:​7, 8)

¹² Jesu alimwi wakapa bamaalumi bambi mukuli aumbi mumbungano. Kwiinda mubusolozi bwakwe, baalu bamu Jerusalemu bakatuma Paulo, Barnaba alimwi abamwi kabali balangizi beendeenda. (Mil. 11:22) Nkaambo nzi? Kutegwa kabacita cintu nciconya ncobakasalilwa bakutausi alimwi abaalu, nkokuti ikuyumya mbungano. (Mil. 15:​40, 41) Aaba bamaalumi bakali kulyaaba kutegwa kabacita mulimo ooyu. Zimwi ziindi bakali kubikka buumi bwabo muntenda kutegwa bayiisye alimwi akukulwaizya bamwi.—Amubale 1 Batesalonika 2:​7, 8.

13. Milimo nzi imwi njobacita balangizi bamabazu?

¹³ Balangizi bamabazu baleendeenda kapati. Bamwi baleenda misinzo milamfwu kapati kutegwa baswaye mbungano. Nsondo ansondo, mulangizi wabbazu ulapa makani manji, kucita nyendo zyabweembezi, kusololela muswaangano wabapainiya, muswaangano wabaalu alimwi amiswaangano yakuunka mumulimo wamumuunda. Ulapa makani, kusololela bubambe bwamiswaangano yabbazu alimwi ayacooko. Ulayiisya muzikolo zyabapainiya alimwi ulapanga bubambe bwamuswaangano waalubazu wabapainiya bamubbazu. Kuyungizya waawo, ulacita milimo aimbi iiyandika kapati, zimwi ziindi yacibukilambuta njobamupa kucita baofesi yamutabi.

14. Ntwaambo nzi tumwi itutupa kubalumba balangizi bamabazu babeleka canguzu?

¹⁴ Ino mbungano igwasyigwa buti amilimo mibotu njobacita balangizi bamabazu? Kaamba kujatikizya kuswaya kwabalangizi bamabazu, mukwesu umwi waku Türkiye wakaamba kuti: “Kuswaya kuli koonse nkobacita kulandikulwaizya kujana ciindi cinji cakugwasya bakwesu alimwi abacizyi. Ndakaswaangana abalangizi bamabazu banji, pele kunyina nondakalimvwa kuti bakajisi bubi kapati akuti tiibakali kuyanda kubandika andime.” Mucizyi Johanna, iwaambidwe kale, wakabeleka amulangizi wabbazu mumulimo wamumuunda, pele kunyina muntu ngobakajana aŋanda. Wakaamba kuti: “Nokuba boobo, kunyina nondiyakubuluba buzuba obuya. Banabokwesu basimbi bakazwide akulonga kuunka kubusena bumbi, aboobo ndakali kubayeeya kapati. Pele mulangizi wabbazu wakandikulwaizya akundigwasya kubona kuti calino, ambweni inga tiicakonzyeka kukkala antoomwe abanamukwasyi alimwi abalongwe ccita munyika mpya. Tuyooba acoolwe cakuba ambabo lyoonse mane kukabe kutamani.” Bunji bwesu tulijisi zyakuluula zibotu nzyotukonzya kwaamba kujatikizya balangizi bamabazu.—Mil. 20:37–21:1.

15. (a) Kweelana alugwalo lwa 3 Johane 5-8, ino inga twatondezya buti kuti tulabalumba balangizi bamabazu? (Amubone acifwanikiso.) (b) Nkaambo nzi ncotweelede kubalumba bamakaintu babakwesu aaba ibabeleka canguzu mumbungano? Mbuti mbotukonzya kucita oobo? (Amubone kabbokesi kakuti “Kamubayeeya Bamakaintu Babo.”)

¹⁵ Mwaapostolo Johane wakakulwaizya Gayo kusamausya bakwesu ibakaswaide alimwi wakamulomba kuti ‘abasindikile mulweendo lwabo munzila njakkomanina Leza.’ (Amubale 3 Johane 5-8.) Nzila imwi andiswe mbotukonzya kucita oobo nkwiinda mukutamba mulangizi wabbazu kucakulya. Kunze lyaboobo, tulakonzya kubugwasyilizya bubambe bwamulimo wamumuunda ciindi naswaide. Mucizyi Leslie, iwaambidwe kale, awalo wakatondezya kulumba munzila zimbi. Wakaamba kuti: “Ndipailila kuti Jehova kabapa nzyobayandika. Mebo abalumi bangu twakabalembela magwalo, kubaambila kuswaya kwabo mbokwakatugwasya.” Mutalubi kuti balangizi bamabazu balajana mapenzi alimwi balakatala mbubwenya mbulindiswe. Zimwi ziindi balaciswa, kulibilika azintu zimwi alimwi akutyompwa buya. Ambweni majwi aaluzyalo naa kapego zilakonzya kuba bwiinguzi bwamupailo wamulangizi wabbazu wakulomba lugwasyo!—Tus. 12:25.

TUYANDIKA BAMAALUMI BASALIDWE

16. Kweelana alugwalo lwa Tusimpi 3:​27, ino mibuzyo nzi bakwesu njobakonzya kulibuzya?

¹⁶ Munyika yoonse, tuyandika bakwesu banji bakonzya kubeleka kabali “zipego mubantu.” Kuti kamuli mukwesu uubbapatizyidwe, sena ‘inga mwacikonzya kugwasya’? (Amubale Tusimpi 3:27.) Sena mulilyaabide kubeleka kamujisi makanze aakuba mukutausi? Kuti naa kamuli mukutausi, sena mulilyaabide kubeleka kamujisi makanze aakuba mwaalu?d Sena mulakonzya kubambulula bukkale bwanu kutegwa mulembele ku Cikolo Cabakambausi ba Bwami? Cikolo eeci, ciyoomugwasya kutegwa mubelesyegwe cakumaninina a Jesu. Kuti kamulitenga akulimvwa kuti tamweeleli, amupaile kuli Jehova. Amumulombe kuti amupe muuya wakwe uusalala kutegwa umugwasye kuzuzikizya mulimo uuli woonse ngomwapegwa.—Lk. 11:13; Mil. 20:28.

17. Ncinzi bakwesu bali ‘nzipego mubantu’ ncobatondezya kujatikizya Mwami wesu Kristo Jesu?

¹⁷ Bakwesu Jesu mbaakasala kabali “zipego mubantu” ncitondezyo cakuti ulimukutusololela mumazuba aano aamamanino. (Mt. 28:20) Tulamulumba Mwami wesu siluyando alimwi mwaabi uubikkila maano kuzintu nzyotuyandika alimwi iwakatupa bakwesu kutegwa kabatugwasya. Aboobo amujane nzila zyakutondezya kuti mulabalumba bakwesu aaba ibabeleka canguzu. Alimwi mutaleki kumulumba Jehova nkaambo ngonguwe uupa “cipego cibotu cili coonse alimwi acipego cilondokede cili coonse.”—Jak. 1:17.