Ino Bakutausi Bajisi Mukuli Nzi?

Bbaibbele lipandulula tubunga tobilo twabaalumi Banakristo ibapedwe mikuli mumbungano—“balangizi alimwi abakutausi.” (Bafilipi 1:1) Kanji-kanji, kuli baalu alimwi abakutausi bali mbobabede mumbungano imwi aimwi. Mulimo nzi uutugwasya ngobacita bakutausi?

Bagwasyilizya kabunga kabaalu. Bakutausi, mbaalumi bapakamene kumuuya, basyomeka, alimwi babikkila maano kumulimo, bamwi mbana-bana mpoonya bamwi mbapati. Balabeleka milimo iiyandika iicitwa lyoonse mumbungano ayeeyo yeelede kucitwa canguzu. Eeci cipa kuti baalu babikkile maano kumulimo wakuyiisya akweembela.

Balacita milimo iigwasya. Bakutausi bamwi balapegwa mulimo wakugwasyilizya kutegwa kabatambula bantu baboola kumiswaangano. Bamwi balagwasyilizya amilimo yazyakwaambawida, kwaaba mabbuku, kulanganya maakkaunti aambungano, alimwi akwaabila basimbungano zilawo. Alimwi balagwasyilizya akubambulula Ŋanda ya Bwami. Baalu balakonzya kubalomba kuti bagwasyilizye bacembeede. Kufwumbwa milimo njobapegwa bakutausi, luyandisisyo lwabo lwakubeleka milimo eeyi lupa kuti kabalemekwa abasimbungano.—1 Timoteyo 3:13.

Baalumi aaba Banakristo balapa cikozyanyo cibotu. Bakutausi balasalwa akaambo kabube bwabo bubotu bwakumuuya. Ikuti bapegwa cibeela mumiswaangano, balaluyumya-yumya lusyomo lwesu. Kwiinda mukupa cikozyanyo cibotu mumulimo wakukambauka, balatugwasya kuba basungu. Akaambo kamuuya wabo walukamantano, bapa kuti kakuli lukkomano alimwi alukamantano. (Baefeso 4:16) Mukuya kwaciindi, abalo balakonzya kweelela kuba baalu.

• Ino bakutausi mbaalumi bali buti?

• Ino bakutausi bagwasya buti kutegwa zintu kazyeenda kabotu mumbungano?