Ibakutausi Babeleka Mulimo Mupati
1 “Balitondezya kale kuti mbaalumi balyaabide ncobeni ibalaa lusyomo lwatondezyegwa mumulimo wa Bwami wabusungu alimwi amukugwasya bambi kuyumizigwa mulusyomo.” Mbolyaamba obo bbuku lya Tuliyanzene Kukumanizya Mulimo Wesu, apeeji 57, ikujatikizya bakutausi. Masimpe icikozyanyo cakusima icitondezyegwaa bakutausi ncibotu kwiiya. Ikubelekela antoomwe ambabo alimwi abaalu “kulagwasya mubili kuti ukule akuliyaka muluyando.”—Ef. 4:16.
2 Ibakutausi babeleka mulimo mupati kapati mumbungano. Amuyeeye buyo milimo njobakutauka! Balanganya maakkaunti, mabbuku, mamagazini, ikulembya kwamamagazini alimwi amasena aakubelekela; balabeleka kabali bagwasilizi, ikulanganya mincini yamajwi alimwi akugwasilizya kubamba Ŋanda ya Bwami kuti kaili yabulondo lyoonse. Balatola lubazu mu Cikolo Camulimo Wateokrasi alimwi amu Muswaangano Wamulimo. Bamwi mane balaamba makani aakubuleya naa kweendelezya miswaangano imwi yambungano. Mbubwenya mbuli zizo zyamubili, ibakutausi balabeleka milimo njotuyandika.—1 Kor. 12:12-26.
3 Akaambo kakubona bakutausi kababelekela antoomwe calukamantano abaalu kabali cibeela cakabunga kababelesi, kabalemekana alimwi akuteelezyanya, bamwi balakulwaizigwa kucita mbubonya obo. (Kol. 2:19) Ikwiinda mukuzuzikizya mikuli yabo nsondo ansondo alimwi akutondezya luyandisisyo kuli bamwi, balagwasilizya kuti mbungano iye ambele munzila yakumuuya.
4 Ncinzi ncotukonzya kucita kutegwa tutondezye kuti tulabalumba bakutausi balo babeleka canguzu? Tweelede kwiiziba milimo yabo akuba bantu balibambilide kubelekela antoomwe ambabo nokuyandika lugwasyo. Ikwiinda mumajwi naa mumicito tulakonzya kubazibya kuti tulaulumba mulimo wabo. (Tus. 15:23) Abo babeleka canguzu akati kesu baleelede kulemekwa.—1 Tes. 5:12, 13.
5 Ijwi lya Leza lilawaamba mulimo wabakutausi alimwi azyeelelo zyabo. (1 Tim. 3:8-10, 12, 13) Imulimo wabo uusalala kwiina mbounga wasowelwa ambali pe kujatikizya bweende bwambungano. Aba baalumi bayandika kukulwaizigwa ciindi coonse nkaambo boonse ‘bapangikide myoyo yabo kumilimo ya Mwami.’—1 Kor. 15:58.