Tweelede Kubeleka Canguzu Mumulimo Wesu
1 Mwaapostolo Paulo wakakulwaizya Banakristo kweenda munzila ya Leza alimwi akuzumanana ‘kuya bweendesya munzila eyo njiyonya.’ (1 Tes. 4:1) Ino eeci cipandulula nzi kulindiswe? Iciyandika ncakuti tweelede kuzumanana kuyandaula nzila zyakubeleka canguzu mumulimo wakumuuya, lyoonse kusoleka kuba bantu ‘bazuzikizya mulimo ngotwakapegwa.’—2 Tim. 4:5.
2 Makanze: Citukulwaizya kubeleka canguzu mumulimo wesu nduyando ndotujisi lwakubelekela Mulengi wesu cakumaninina. Tuyanda kuyaambele kumuuya alimwi akuyandaula nzila mbotukonzya kutola ambele mulimo wesu. Bubambe bubotu kubikkilizya amakanze mabotu ziyootugwasya kuzuzikizya mbaakani zyakumuuya.—Int. 1:1, 2; Flp. 4:6; Heb. 10:24, 25.
3 Kuyungizya ciindi ncotutola mumulimo wesu kuyandika kuba amuuya wakupa awakulyaaba. Tulakonzya kuba amuuya uuli boobu kwiinda mukulanga-langa cikozyanyo cibotu ca Jesu. (Mt. 20:28) Jesu wakakondwa kapati akaambo kakubelekela bamwi mumulimo wakwe woonse. (Inc. 20:35) Tulakonzya kumwiiya Jesu kwiinda mukubabikkila maanu bantu alimwi akuba bantu bapakamene kwiinda mukubeleka canguzu mumulimo wesu.—Isa. 6:8.
4 Mulimo Wabazyali: Ikuyanda kugwasya bamwi alimwi akuyungizya ciindi ncotutola mumulimo wesu zilakonzya kuyiisigwa kubana kabacili baniini. Bana bayoobona busungu mbobajisi bamumukwasyi alimwi akutola lubazu nkobacita mukuyungizya ciindi ncobatola mumulimo wabo. Mukwesu umwi wakakulwaizigwa kubeleka canguzu kacili mulombe akaambo kakubelekela antoomwe abasyaanyinakulu mumilimo yeendelezyegwa a Leza. Ikubona busungu bwabasyaanyinakulu aluyandisisyo ndobakajisi cakamukulwaizya kujana zyoolwe zyakubelekela bakwesu. Lino mmukutausi.
5 Ciyandika Kubakwesu: “Na muntu uyanda mulimo . . . , ulayanda mulimo mubotu.” (1 Tim. 3:1) Aaya majwi akulwaizya bakwesu kubeleka canguzu kutegwa beelele kuba azyoolwe ziyungizidwe zyamilimo mumbunga ya Jehova. Ikucita boobo taciyandiki kuti mane mube aluzibo lulibedelede buya. Mukwesu uubeleka canguzu uyoobikka ziyandika zya Bwami mubusena bwakusaanguna alimwi akutola lubazu cabusungu mumulimo. (Mt. 6:33; 2 Tim. 4:5) Uyoosolekesya kuba citondezyo cibotu kuli bamwi.
6 Nyika Yoonse: Jehova ulaucita mulimo wakuyobolola cakufwambaana. (Is. 60:22) Cilayandika kubindaana kuli baabo batobela cikozyano ca Jesu cakubeleka cakumaninina mumulimo wabo wakukambauka. Lipooti yanyika yoonse yamwaka wamulimo wa 2006 itondezya kuti bantu bali 248,327 bakabbapatizigwa. Mweelwe ooyu utondezya kuti bantu bapya bainda ku 680 balabbapatizigwa abuzuba. Aboobo, toonse atuzumanane kulangaula nzila zyakubeleka mulimo wesu cakumaninina.