Inzila Zyakuyaambele Mumulimo Wenu
1 Kwamyaka 40 yainda, Ngazi Yamulindizi ya Cingisi ya January 15, 1955 yakajisi cibalo camutwe wakuti, “Sena Mulacita Mbuli Mbomukonzya?” Yakaamba mbuli mbocikonzyeka kubantu ba Jehova kusola canguzu umwi aumwi mumulimo wa Bwami kutegwa bayaambele. Bulangizi bubotu obu bucibeleka asunu netuyaambele kucita mbuli mbotukonzya.
2 Imulimo wesu woonse weelede kweendelezegwa amulawo mupati wakuti: “Uleelede kuyandisya Jehova Leza wako amoyo wako woonse, a[buumi bwako boonse, NW], akukuyeeya kwako koonse, akunguzu zyako zyoonse.” (Mk. 12:30) Tutondezya luyando lwesu kuli Jehova netubelesya nzila zyoonse zijanika mukusumpula mulimo wa Bwami bwakwe. Amulange-lange nzila ezi nzyomunga mwabelesya kuyaambele mumulimo wenu.
3 Amuzuzikizye Mikuli Yenu: Ibakwesu balyaabide balakonzya kubeleka canguzu kutegwa beelele kuba bakutausi akuyaambele kuti babe baalu. Izibalo zyamu Ngazi Yamulindizi ya September 1, 1990, zyakuti “Sena Mubelekela Kuyaambele?” alimwi “Sena Muleelela Kubeleka?,” zyakakulwaizya bakwesu banji kulisungula kukuyumuna mikuli yamumbungano zinyezi. Amubabuzye baalu bamumbungano yankomuzwa bamwaambile ncomunga mwacita kutegwa musike azyeelelo ziyandika.
4 Ibaalu abakutausi batakwete bakulwaizigwa kuti bayeeyesye makani aakulilembya mu Cikolo Cakwiiya Mulimo. Mulakonzya kuziba makani aajatikizya cikolo eci kwiinda mukubala twaambo tuli mumutwe wakuti “Ministerial Training School” muma Watch Tower Publications Index aa 1986-1995, 1996 a 1997. Sena mulaubona ‘mulyango mupati wamilimo’ uujalwidwe ndinywe? (1 Kor. 16:9a) Ibakwesu banji teebakazizyi zyoolwe zyakali kubalindila mumulimo bamanizya cikolo eci. Icalino balikkomene kubelekaa Beteli naa mumulimo wamumuunda kabali bapainiya baalubazu, bamisyinali antela balangizi babbazu.
5 Amuyaambele Mumulimo Waciindi Coonse: Ibakubusi bamanizya cikolo, bamakaintu batabeleki mulimo wakunyika abaabo bakacileka milimo akaambo kakukomena beelede kwaalangisya makani aakucita bupainiya. Amulange-lange twaambo tuli mupepa lyamukati lya Mulimo Wesu Wabwami wa February 1999, mukanane abapainiya bakali muciimo cili mbuli cenu. Ambweni inga mwakulwaizigwa andinywe kuyanda kuyaambele mumulimo kwiinda mukucita bupainiya mbuli mbobacita balo. (1 Kor. 11:1) Ncinzi ciyandika kuti muyaambele mumulimo wanu, musisye maoola ali 70 amwezi akuba bapainiya baciindi coonse?
6 Icalino ibakwesu abacizyi bainda ku 17,000 babelekela mumaopesi amutabi alimwi amumaandaa Beteli nyika yoonse mboizulwa. Ibbuku litegwa Mulimo Wesu lilaupandulula mulimo waa Beteli. Ino inga tamubali cibeela eci mubone naa inga mweelela kubaa coolwe cilibedelede cakubeleka mulimo waa Beteli?
7 Amubelekele Kulubazu Kuyandika Lugwasyo: Sena mukkala mubbazu mubelekwa kanjikanji naa imuli bakwesu banji bakonzya kugwasyanya mulimo? Sena mwayeeya zyakuyaambele mumulimo wenu kwiinda mukulongela kubusena kuyandika lugwasyo? Ndiza inga mwalongela kumunzi ulaafwaafwi ankomukkala kwalo kuyandika babelesi bambi. (Mt. 9:37, 38) Eci taciyandiki kubindila pe. Ciyandika kukkala ansi kuyeeya. (Lk. 14:28-30) Amukanane abaalu antoomwe amulangizi wabbazu ciimo canu. Inga bamwaambila kuti naa cili kabotu kulonga aciindi eco naa mweelede kulindila saansi. Ikuti naa muyanda kulembela ba Sosaiti kubaambila nkomuyanda kulongela, mulugwalo lwanu mubikkilizye alugwalo luzwa ku Kkomitii Yeendelezya Mulimo Yambungano.
8 Mulimo Wanu Ausumpuke: Toonse tulakonzya kuyaambele mumulimo wesu kwiinda mukusumpula mulimo wesu wamumuunda. Sena mulatola lubazu muzibeela zyoonse zyamulimo ziliko, kubikkilizya abukambausi bwaŋandaaŋanda, bwamukwiizya antoomwe, anyendo zyakupilukila alimwi akucitya ziiyo zya Bbaibbele? Ikuti naa mucitya ciiyo, sena inga mwasumpula nzila zyomubelesya mukuyiisya kwanu? Ncibotu kuti mwiinduluke kubala pepa lyamukati lya Mulimo Wesu Wabwami wa June 1996, mubone nzila nzyomunga mwabelesya kugwasya bantu mbomuyiisya kulyaaba akubbapatizigwa.
9 Makani aambi aayungizidwe aambotunga twayaambele mukusumpula mulimo wesu ajanwa mucibalo 9 cabbuku lya Tuliyanzene Kukumanizya Mulimo Wesu. Toonse tweelede kubaa luyando lwakucita mbuli mbotukonzya mumulimo wa Leza. Sena inga tamukonzyi kuyeeyesya mbakaani zyanu zyakumuuya? Amucite mbuli bwaamba 1 Timoteo 4: 15: “Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako.”