Sena Muyanda Kuyungizya?
1 Jesu wakakozyanisya Bwami kuzintu ziyandisi kapati zitakonzyi kuulwaa mali. (Mt. 13:44-46) Imulimo wakwaambilizya makani aa Bwami awalo uli akati kazintu ziyandisi kapati. Mulimo ooyu uyandika kuubikka mubusena butaanzi mubuumi bwesu nokuba kuti kutola lubazu mulinguwo cakumaninina kulabikkilizyaa kulitakata. (Mt. 6:19-21) Sena muyanda kuyungizya mumulimo wa Bwami?
2 Amulange-Lange Zintu Eezi Ziyandika: Nzyinji zintu ziyandika kutegwa tuyungizye ciindi cesu cakutola lubazu mumulimo: (1) atube amakanze aakubikka zintu zya Bwami mubusena butaanzi mubuumi (Mt. 6:33); (2) ikubaa lusyomo lyoonse alimwi akusyoma Jehova (2 Kor. 4:1, 7); (3) ikuyandaula lugwasyo lwa Leza kwiinda mukupaila camoyo woonse alimwi cakuzumanana (Lk. 11:8-10); (4) ikuzuzikizya alimwi akucita kweelanaa mipailo yesu.—Jak. 2:14, 17.
3 Inzila Zyakuyungizya Mulimo Wesu: Toonse tulakonzya kulibikkila mbaakani njotukonzya kutobela notutola lubazu lyoonse mumulimo mwezi amwezi. Pele sena mwakayeeya kale zyakubelesya kufwumbwa ciindi icoolwe cakucita bukambausi bwamukwiizya, kusoleka kubamba ntalisyo zyanu zyamakani munzila mbotu, kuyaambele mukucita nyendo zyakupilukila munzila iigwasya alimwi akukanza kusololela ziiyo zya Bbaibbele zyaaŋanda iziya kumbele? Sena inga mwacikonzya kucita bupainiya bwakugwasilizya naa bwaciindi coonse naa kuyoobelekela kubusena kuyandika lugwasyo? Ikuti kamuli mukwesu uubbapatizidwe, sena inga mwayaambele akweelela kubeleka kamuli mukutausi naa mwaalu? (1 Tim. 3:1, 10) Sena inga mwauyungizya mulimo wanu kwiinda mukulembela mulimo waku Beteli naa Cikolo Cakwiiya Mulimo?—Lk. 10:2.
4 Imukwesu wakajisi mulimo wakumubili wabuzuba boonse alimwi iwakali kusowa ciindi cinji muzisobano wakakulwaizigwa kuba mupainiya waciindi coonse. Wakatalika bupainiya bwakugwasyilizya alimwi wakacinca bukkale bwakwe kutegwa atalike mulimo waciindi coonse. Mpoonya wakazooya ku Cikolo Cakwiiya Mulimo, calo cakamugwasya kulibambila mukuli ngwajisi lino kali mulangizi wabbazu. Ulikkomene kapati kuti wakakutobela kukulwaizya nkwaakapegwa alimwi ulijisi lusyomo kuti ulabotelwa kapati akaambo kakuti wakasala kuyaambele mumulimo wa Bwami.
5 Jehova ulabalongezya aabo balyaaba kucita mulimo. (Is. 6:8) Kutabi cimulesya kuyungizya mulimo wanu alimwi akujana lukkomano lunji akukatalukwa kuboola akaambo kakucita boobo.