Mutawayiwayi!
1. Mmuunzila nzi ‘motutakasyi lugwasyo’ kubantu?
1 Kwiinda mukutola lubazu cabunkutwe mukwaambilizya makani mabotu aa Bwami bwa Leza, ‘tatukasyi lugwasyo’ lweelede bantu bali muzilawo nzyotwaabilidwe. (Tus. 3:27) Kunyina mulumbe mubotu uumbi weelede kwaambilwa banamaleya kwiinda wooyo uujatikizya ziindi zitaliboteli zilangilwa mubweendelezi bwa Leza. Nokuba kuti mulakonzya kwaambila bantu zyabulangizi bwa Bwami kwiinda mukucita bumboni bwamukwiizya naa kwiinda mukwaabila mabbuku, inga cainda kubota ikuti mwaba ambaakani yakweendelezya ciiyo ca Bbaibbele, ikuti kamutaciti oobo lino.
2. Ncinzi cinga catukasya kutalisya ciiyo ca Bbaibbele?
2 Zimwi ziindi, ipenzi limwi akati kamapenzi mapati aatukasya kweendelezya ciiyo ca Bbaibbele lijatikizya mbotulimvwa kujatikizya makani aaya. Bamwi balawayawaya kweendelezya ciiyo ca Bbaibbele akaambo kakuti tabalisyomi naa akaambo kakujata bubi azintu zimbi. Inzila zitobela zilakonzya kumugwasya kumanizya penzi lyakuwayawaya kutola lubazu mumulimo wakuyiisya Bbaibbele.—Mt. 28:19; Inc. 20:20.
3. Nkaambo nzi ncotweelela kuyiisya Bbaibbele?
3 Kutalisyoma: Ambweni tiimwakasika kule mulwiiyo naa akaambo kacimwi tamulisyomi kuti inga mwacikonzya kweendelezya ciiyo ca Bbaibbele. Abalo Banakristo ibakazwidilila mumwaanda wamyaka wakusaanguna bakali kutegwa “mbantu buyo abatakaiya.” Ino ncinzi cakabagwasya kuyiisya bamwi kasimpe? ‘Bakali kweenda a Jesu.’ (Inc. 4:13) Bakaiya ku Mwiiyi Mupati, Jesu, injiisyo zyakwe anzila nzyotuciyobwedwe mu Magwalo. Nokuba kuti tiimwakasika kule mulwiiyo lwanu, mutambula lwiiyo lujatikizya Leza amakanze aakwe lutakonzyi kweelanisigwa alwiiyo lumbi.—Is. 50:4; 2 Kor. 3:5.
4. Ncinzi ncotwiiya kucikozyanyo ca Amosi?
4 Zimwi ziindi Jehova wakabelesya basinsimi ikusinsa beendelezi bakalubizya naa bamwi bakajisi zyuuno zyaatala. Bamwi, mbuli Amosi, bakakomenena mumukwasyi wakanyina mpuwo. Amosi wakazuminizya kati: “Ime teendakali musinsimi nanka mwana wamusinsimi, pe, ndakali mweembeli asikucela inkuyu.” (Am. 7:14) Nokuba boobo, Amosi kunyina naakawayawaya ikwaambilizya mulumbe wa Jehova walubeta kuli Amaziya, imusinsimi wakali kukomba moombe. (Am. 7:16, 17) Lyoonse tweelede kuyeeya kuti tubeleka mulimo wa Leza alimwi uyootupa kuti tweelele kuucita mulimo ooyu ngwatupede.—2 Tim. 3:17.
5. Nkaambo nzi ncotweelede kusoleka kutalisya ciiyo ca Bbaibbele nokuba kuti tujisi bubi?
5 Kujata Bubi: Nokuba kuti mujisi bubi mumilimo imbi, kweelede kuti mwakabikka kale ambali ciindi cakutola lubazu mumulimo lyoonse. Ikweendelezya ciiyo ca Bbaibbele ncibeela camulimo cimwi icikkomanisya kapati. Ncoolwe cilibedelede ikulibonena Jwi lya Jehova kalicinca buumi bwamuntu. (Heb. 4:12) Jehova ulakkomana notuliimya zintu zimwi ikutegwa tugwasye umwi “kuboola kuluzibo lwakuziba lusinizyo.” (1 Tim. 2:4) Nobaba bangelo balakkomana muntu umwi neempwa kujatikizya bukkale bwakwe bwamusyule akuya kumbele kumuuya.—Lk. 15:10.
6. Mmulimo nzi uulibedelede ngotujisi mukucita kuyanda kwa Leza?
6 Leza mmuntu “uuyandisya kuti bantu boonse bafutulwe akuboola kuluzibo lwakuziba lusinizyo.” (1 Tim. 2:4) Elo tujisi mulimo uulibedelede kaka wakubelekela antoomwe aluyando lwa Leza, kwiinda mukutawayawaya kweendelezya ziiyo zya Bbaibbele!