Amubaumbulizye Batyompedwe
1 Luumbulizyo lulayandika kapati mazuba aano kwiinda myaaka yoonse yainda. Kwiinda mukutobela cikozyanyo ca Mwami Kristo Jesu, andiswe tweelede kugwasya “batyokede mumyoyo” naa batyompedwe.—Is. 61:1.
2 Nzila Iikonzya Kubelesyegwa: Kutegwa tuumbulizye bantu, nzyotubandika mumulimo wesu wakukambauka zyeelede kukulwaizya. Ikuti twacesya kubandika zintu zibi zicitwa munyika alimwi anjiisyo zyakubeja, kasimpe kamu Magwalo abulangizi bwini-bwini bwazintu zyuumbulizya nzyasyomezya Leza ntotunooli twaambo tupati mumibandi. Eeci tacaambi kuti tatweelede kubandika zya Armagedoni. Mulimo wesu ngwakwaambilizya “mwaka uutambulika wa-Jehova abuzuba bwakuliya nkoto bwa-Leza wesu,” alimwi ‘akucenjezya sizibi kuti aleke inzila yakwe yabubi.’ Nokuba boobo, mulumbe wakucenjezya bantu kujatikizya Armagedoni alimwi amboiya kunyonyoona taweelede kusinkila mutwe wamakani mabotu aa Bwami bwa Leza.—Is. 61:2; Ezk. 3:18; Mt. 24:14.
3 Kuŋanda a Ŋanda: Bunji bwaziindi tujana bantu batyompedwe akaambo kakuciswa, kufwidwa muyandwa wabo, kutalulama naa mapenzi aakubula mali. Mbotuli basikutobela Kristo, ‘tulabafwida luzyalo’ bantu bali boobo mbotuyaanya mumulimo wesu wakukambauka. (Lk. 7:13; Rom. 12:15) Nokuba kuti tulababalila lugwalo lomwe naa obilo aendelena apenzi, tweelede “kufwambaana kuswiilila” kutegwa tubape ciindi cakwaamba mbobalimvwa. (Jemu. 1:19, Ci) Twaswiilila, notukonzya kubaumbulizya.
4 Aciindi ceelede mukati kamubandi, tulakonzya kwaamba kuti “Andimutondezye majwi aakulwaizya aazwa mu Bbaibbele.” Tweelede kuba aabupampu kutegwa tutakazyi kufwumbwa kaambo kataluzi nkakonzya kwaamba muntu ooyo. Muciindi caboobo, tweelede kubayumya-yumya akubaumbulizya kwiinda mukubelesya Magwalo kutegwa tubatontozye moyo. Kujatikizya kaambo aaka, mulakonzya kulanga-langa mubbuku lya Kukambitsirana za m’Malemba amapeeji 79-82 ansi aamutwe wamakani wakuti “Chilimbikitso.” Naa mulakonzya kupa mukamwini ŋanda katulakiti kakuti, Kutontonzya Baabo Batyompedwe akubala anguwe majwi aakulwaizya aali mukatulakiti.
5 Amuyandaule Nzila Zyakuumbulizya Bamwi: Sena kuli simukobonyoko, ngomubeleka limwi, sicikolonyoko naa umwi wamumukwasyi uuyandika kuumbulizigwa? Ino mulekela nzi kuyoobaswaya bantu bali boobo kamujisi mbaakani yakubaumbulizya a Magwalo? Ikuziba kaambo kapa kuti bayandike luumbulizyo, kupa kuti mulibambile kweelana amakani aayandika. Kutegwa babatontozye, bamwi babalembela magwalo naa kubatumina luwaile. Luyando lwini-lwini kuli basimukoboma luyootukulwaizya kuba alweetelelo kubantu alimwi akubaumbulizya kwiinda mukubelesya Magwalo.—Lk. 10:25-37.
6 Masimpe ngakuti, twakapegwa mulimo wakuumbulizya baabo balila, kugwisya buumba mumyoyo yabo alimwi akubapa bulangizi bubotu bwakumbele. Oolu ndoluumbulizyo bantu bali munyika yoonse ndobayanda. Kwaamba zintu zibotu nzyatusyomezya Leza calukkomano kulakonzya kupa kuti babombe myoyo baumbulizyigwe akuba aabulangizi. Lyoonse atube amizeezo yakuumbulizya baabo batyompedwe.