Toonse Kuli Ncotukonzya Kumupa Jehova
1 Sena mulizyi kuti swebo tobantu kuli ncotukonzya kumupa Leza? Abelo wakapa zivwubwa zyakwe zyaakali kuyandisya kuli Jehova, alimwi Nowa a Jobu bakacita mbubwenya oobo. (Matl. 4:4; 8:20; Job. 1:5) Masimpe, banyama aaba tiibakapa kuti Mulengi avwube, mbwaanga zyintu zyoonse zyizyakwe. Pele zituuzyo zyakatondezya luyando lwini-lwini ndobakajisi bantu aaba basyomeka. Mazuba aano, tulakonzya kumupa Jehova ciindi, nguzu alubono lwesu kacili “cipaizyo cakulumba.”—Heb. 13:15.
2 Ciindi: Elo ncibotu kaka kujana “ciindi” cakucita zyintu zyinji mumulimo! (Ef. 5:15, 16) Ambweni tulakonzya kucinca zyintu nzyotwali kucita kutegwa tucite bupainiya bwakugwasyilizya kwamwezi omwe naa iinda aawo mumwaka. Ambweni tulakonzya kubeleka ciindi cilamfwu mumulimo kwiinda mbuli mbotwakali kucita. Ikuyungizya maminiti aali 30 ansondo kuciindi ncotubeleka mubukambausi kulakonzya kupa kuti mawoola ngotubeleka amwezi ayungizyigwe amawoola obilo.
3 Nguzu: Kutegwa katuba anguzu zyakukambauka, tweelede kutantamuka zyintu zyakulikondelezya amulimo uutupa kukatala kapati cakuti tulaalilwa akumupa Jehova zyintu zyiinda kubota. Alimwi tatweelede kulibilika azyintu zikonzya ‘kutulemya’ naa kutupa kubula nguzu zyotukonzya kubelesya kubelekela Leza. (Tus. 12:25) Nokuba kuti inga katujisi kaambo keni-keni kakulibilika, cilainda kubota ikuti ‘twabikka makani eesu oonse mumaanza aa Jehova.’—Int. 55:22; Flp. 4:6, 7.
4 Lubono: Alimwi tulakonzya kupa lubono lwesu lukonzya kupa kuti mulimo wakukambauka uzumanane. Paulo wakali kukulwaizya Banakristonyina ‘kuliyobweda cintu cimwi’ lyoonse kutegwa bakonzye kupa bantu bapengede. (1 Kor. 16:1, 2) Mbubwenya buyo, tulakonzya kuyobola mali aakusanga aakonzya kubelesyegwa kumbungano akumulimo wanyika yoonse. Jehova ulalumba ikuti twamupa kuzwa ansi amoyo nokuba kuti nkaniini nkotwamupa.—Lk. 21:1-4.
5 Jehova watupa zyintu zyinji. (Jak. 1:17) Tulakonzya kutondezya kuti tulalumba kwiinda mukubelesya ciindi cesu, nguzu zyesu alubono lwesu notumubelekela. Ikucita boobu, kulamukkomanisya Jehova, “nkaambo oyu uupa calumwemwe nguuyandwa kwa-Leza.”—2 Kor. 9:7.