Kukulwaizyanya Notuli Mumulimo
1 Toonse tulakkomana ikuti twakulwaizyigwa ‘amajwi aambwa kuciindi ceelede.’ (Tus. 25:11) Notubeleka abakwesu mumulimo, mbuti mbotukonzya kubandika makani aakonzya kubakulwaizya?
2 Mubandi Uukulwaizya: Cilagwasya kapati ikubandika makani aakumuuya notuli mumulimo wakukambauka. (Int. 37:30) Tulakonzya kwaamba nzila imwi njotwakabelesya mubukambausi naa kwaamba cakacitika notwakali mumulimo wamumuunda. (Inc. 15:3) Sena kuli kaambo kakkomanisya nkotwakajana notwakali kubala Bbaibbele, magazini mapya naa kumiswaangano yambungano? Tulakonzya kubandika twaambo twakabandikwa lino-lino mumakani aabuleya ku Ŋanda ya Bwami.
3 Tulakonzya kutyompwa ikuti naa twabula cakwaamba kukaambo naa mubuzyo ngwaabuzya mukamwiniŋanda. Inga cainda kubota ikuti naa twazwa aŋanda yamuntu ooyo twabandika ayooyo ngotuli limwi kutegwa tubone mbotukonzya kumwiingula ciindi cibola, ndiza kwiinda mukubelesya bbuku lya Kukambitsirana. Ikuti naa kuli nzila mbotu njaabelesya ngotuli limwi, tulakonzya kumulumba.
4 Amubweze Ntaamu: Sena kuli bamwi mbotuswaangana limwi muciiyo cabbuku mbotwakabelekede ambabo kaindi? Ikwaambila muntu umwi kuti tubeleke limwi kulakonzya kupa kuti ‘tuyumizyanye.’ (Balo. 1:12, BT) Bapainiya baciindi coonse abakugwasilizya balakonzya kukkomana ikuti bamwi babeleka ambabo ikapati cifwumo-fwumo naa mangolezya basikumwaya nobali basyoonto mumulimo wakukambauka. Tulakonzya kubagwasya bapainiya kwiinda mukulyaaba kubeleka ambabo. Sena kuli sikumwaya uuciswa-ciswa uutakonzyi kutola ciindi cilamfwu mumulimo? Kubeleka amuntu uuli boobo, ambweni kumutamba kuti atusangane aciiyo ca Bbaibbele, kulakonzya kugwasya.—Tus. 27:17.
5 Ikubalumbaizya bamwi lyoonse kulagwasya nomuba mutuntu tusyoonto. Lyoonse tweelede kuba amuzeezo uuli boobo mbwaanga tuyanda “kuyakana, umwi aumwi kumweenzinyina.”—1 Tes. 5:11.