Amuyaambele Mumulimo Wanu Wakukambauka
1 Taateesu wakujulu ulakkomana ciindi babelesi bakwe nobayaambele kumuuya. Eeci cibikkilizya kuyaambele mukuba mukambausi wamakani mabotu uusimide alimwi uucibwene. Paulo wakakulwaizya mulangizi Timoteo kuti azumanane kusungwaala kukubala alimwi akukuyiisya kutegwa kukomena kwakwe kulibonye. (1 Tim. 4:13-15) Toonse tweelede kusolekesya kuyaambele munzila mbotubeleka mulimo wesu wakukambauka, notuba ndiswe tobasikumwaya notujisi kale luzibo.
2 Amulibikkile Mbaakani: Kutegwa tuyaambele, kuyandika kulibikkila mbaakani. Ino nimbaakani nzi nzyotunga twalibikkila? Inga twasoleka kutegwa tube basyaazibwene mukubelesya panga lyesu lyakumuuya, Ibbaibbele. (Ef. 6:17) Ambweni kuli nzila imwi yabukambausi njotuyandika kucita kabotu, mbuli bukambausi bwamumugwagwa, bwaaluwaile, naa kubelekela mucilawo camakwebo. Ambweni tulakonzya kusoleka kucita nyendo zyakupilukila munzila iibeleka kabotu. Mbaakani aimwi imbotu kapati njakuyaambele mukutalisya alimwi akweendelezya ziiyo zya Bbaibbele.
3 Zibelesyo: Miswaangano yambungano, kwaambisya Cikolo Camulimo Weendelezyegwa a Leza alimwi a Muswaangano wa Mulimo, ibambilidwe kutugwasya kuyaambele mukuba bakambausi. Ikuti twasolekesya kulibambila akujanika kumiswaangano eeyi alimwi akwiibelesya mizeezo iipegwa, tuyoogwasyigwa kapati.—2 Kor. 9:6.
4 Alimwi tweelede kugwasyanya kuyaambele. (Tus. 27:17) Kuswiililisya kunzila yabukambausi njaabelesya ngotubeleka limwi mumulimo kuyootugwasya kuyaambele. Kuyungizya waawo, mulangizi wesu waciiyo cabbuku inga wacita bubambe bwakuti tugwasyigwe cacigaminina. Elo ncoolwe citalikomeneni kaka kugwasyigwa amupainiya naa sikumwaya uumbi uucibwene kutegwa tucikonzye kucita kabotu alimwi akuukkomanina mulimo! Sena kuli sikumwaya mupya mukakamu kesu kaciiyo cabbuku? Ambweni tulakonzya kupangana kuti tubeleke antoomwe anguwe.
5 Imulimo uuyandika kapati uucitwa mazuba aano mmulimo wakukambuka uucitwa a Banakristo. Notupa Jehova “cipaizyo cakulumba,” tuyanda kumupa zintu ziinda kubota. (Heb. 13:15) Ikuti twasoleka kuyaambele mumulimo wesu wakukambauka, tuyooba ‘basimilimo batakwe cintu cibausya insoni, ibapandulula makani aalusinizyo mbukweelede.’—2 Tim. 2:15.